എഡ്മന്റൺ: കാനഡയിൽ നിന്ന് ആൽബർട്ടയെ വേർപെടുത്തുന്നതിനായുള്ള ഹർജിക്ക് ആവശ്യമായ ഒപ്പുകൾ ലഭിച്ചതായി പ്രസ്ഥാനത്തിന്റെ സംഘാടകർ. ‘സ്റ്റേ ഫ്രീ ആൽബർട്ട’ (Stay Free Alberta) എന്ന സംഘടനയുടെ നേതൃത്വത്തിൽ നടന്ന ഒപ്പുശേഖരണം, പ്രവശ്യയുടെ ‘സിറ്റിസൺ ഇനിഷ്യേറ്റീവ് ആക്ട്’ പ്രകാരമുള്ള നിശ്ചിത പരിധി പിന്നിട്ടതായാണ് വിവരം. തിങ്കളാഴ്ച രാത്രിയോടെയാണ് ലക്ഷ്യമിട്ട എണ്ണം പൂർത്തിയായതായി വിവിധ കേന്ദ്രങ്ങളിൽ നിന്ന് റിപ്പോർട്ടുകൾ പുറത്തുവന്നത്.
യോഗ്യരായ വോട്ടർമാരുടെ പത്ത് ശതമാനം ഒപ്പുകളാണ് ഹർജി ഔദ്യോഗികമായി സമർപ്പിക്കാൻ ആവശ്യമായിരുന്നത്. ഏകദേശം 1,77,000 പേരുടെ പിന്തുണ ഇതോടെ ഉറപ്പാക്കാൻ സംഘാടകർക്ക് സാധിച്ചു. ഈ ഒപ്പുകൾ ‘ഇലക്ഷൻസ് ആൽബർട്ട’ പരിശോധിച്ച് ഉറപ്പുവരുത്തിയാൽ, വരാനിരിക്കുന്ന ഒക്ടോബർ 19-ലെ റഫറണ്ടത്തിൽ (ജനഹിതപരിശോധന) വിഭജന വിഷയവും ഉൾപ്പെടുത്തിയേക്കും. നിലവിൽ മെയ് രണ്ട് വരെ ഹർജിയിൽ ഒപ്പിടാൻ അവസരമുണ്ട്. ഇതിന് ശേഷമായിരിക്കും ഒപ്പുകളുടെ ആധികാരികത പരിശോധിക്കുന്ന നടപടികൾ ആരംഭിക്കുക.
അതേസമയം, ഹർജി നടപടികൾ പുരോഗമിക്കവെ സിറ്റിസൺ ഇനിഷ്യേറ്റീവ് ആക്ട്, റീകോൾ ആക്ട് എന്നിവയിൽ ഭേദഗതികൾ വരുത്താൻ ആൽബർട്ട സർക്കാർ നീക്കം തുടങ്ങി. പൊതുതിരഞ്ഞെടുപ്പിന് 12 മാസം മുൻപും ശേഷവും പുതിയ ഹർജികൾ നൽകുന്നത് തടയാനാണ് ഇതിലൂടെ ലക്ഷ്യമിടുന്നത്. ഈ മാറ്റങ്ങൾ നിലവിലെ ഹർജിയെ ബാധിക്കില്ലെന്ന് ജസ്റ്റിസ് മന്ത്രി മിക്കി അമേരി വ്യക്തമാക്കിയിട്ടുണ്ട്. ഒപ്പുകൾ പരിശോധിക്കുന്ന ഘട്ടത്തിൽ നിരീക്ഷകരെ നിയമിക്കാനുള്ള അനുമതിയും പുതിയ നിയമനിർദ്ദേശങ്ങളിൽ ഉൾപ്പെടുന്നു.
📢 കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=hq1tcla
Alberta to secede from Canada; aims to collect signatures for separation petition
