ആൽബർട്ട ടീച്ചേഴ്സ് അസോസിയേഷൻ പ്രതിഷേധം: ചർച്ച വേണ്ട, നിയമം മതി എന്ന് സർക്കാർ

ആൽബർട്ട: ആൽബർട്ടയിലെ അധ്യാപകരും അവരുടെ പിന്തുണക്കാരും ഒക്ടോബർ 25-ന് വിദ്യാഭ്യാസമന്ത്രി ഡെമെട്രിയോസ് നിക്കോളൈഡ്‌സിന്റെ കാൽഗറി-ബോ മണ്ഡലത്തിൽ ഒത്തുകൂടി പ്രതിഷേധിച്ചു. പ്രവിശ്യാ സർക്കാർ തിങ്കളാഴ്ച ‘ബാക്ക്-ടു-വർക്ക്’ നിയമനിർമ്മാണം (Back to School Act – Bill 2) കൊണ്ടുവരാനിരിക്കെയാണ് പ്രതിഷേധം ശക്തമാക്കിയത്. ഒക്ടോബർ 6 മുതൽ സമരം ചെയ്യുന്ന ഏകദേശം 51,000 പൊതുവിദ്യാലയ അധ്യാപകരെ ബലംപ്രയോഗിച്ച് ജോലിക്ക് തിരികെ എത്തിക്കാൻ ലക്ഷ്യമിട്ടുള്ളതാണ് ഈ നിയമം. മൂന്നാഴ്ചയായി ഏകദേശം 7,50,000 വിദ്യാർത്ഥികളാണ് ക്ലാസുകൾ ഇല്ലാത്ത അവസ്ഥയിലുള്ളത്.

പബ്ലിക് ഇൻററസ്റ്റ് ആൽബെർട്ട എന്ന സംഘടനയുടെ നേതൃത്വത്തിലാണ് അധ്യാപകരും ആൽബർട്ട ടീച്ചേഴ്സ് അസോസിയേഷൻ (ATA) അംഗങ്ങളും മന്ത്രിയുടെ മണ്ഡലമായ വെസ്റ്റ് സ്പ്രിങ്‌സിൽ വീടുകൾ തോറും കയറിയിറങ്ങി പൊതുവിദ്യാഭ്യാസത്തെ പിന്തുണയ്ക്കുന്ന മഞ്ഞ ബോർഡുകൾ സ്ഥാപിച്ചത്. “ഇത് പ്രധാനമന്ത്രി ഡാനിയേൽ സ്മിത്തിന്റെയും മന്ത്രി നിക്കോളൈഡ്‌സിന്റെയും സമരമാണ്. സമരം തുടങ്ങുന്നതിനുമുമ്പ് ഇത് അവസാനിപ്പിക്കാൻ അവർക്ക് കഴിയുമായിരുന്നു,” എന്ന് പബ്ലിക് ഇൻററസ്റ്റ് ആൽബർട്ടയുടെ എക്സിക്യൂട്ടീവ് ഡയറക്ടർ ബ്രാഡ്ലി ലാഫോർച്യൂൺ പറഞ്ഞു.

ക്ലാസ് മുറികളിലെ വിദ്യാർത്ഥികളുടെ എണ്ണക്കൂടുതൽ, ക്ലാസ്റൂം നടത്തിപ്പിലെ സങ്കീർണ്ണതകൾ, പൊതുവിദ്യാഭ്യാസത്തിനായുള്ള സുസ്ഥിരമായ ഫണ്ടിംഗ് തുടങ്ങിയ വിഷയങ്ങൾ ഉന്നയിച്ചാണ് അധ്യാപകർ സമരം ചെയ്യുന്നത്. എന്നാൽ, ചർച്ചകളിലൂടെ പ്രശ്നം പരിഹരിക്കുന്നതിനു പകരം, തിരികെ ജോലിക്ക് പ്രവേശിക്കാനുള്ള അവകാശം എടുത്തു കളയുന്ന ‘ബാക്ക്-ടു-വർക്ക്’ നിയമം കൊണ്ടുവരുന്നത് നിലവിലെ സാഹചര്യത്തെ കൂടുതൽ വഷളാക്കുമെന്ന് ലാഫോർച്യൂൺ ചൂണ്ടിക്കാട്ടി. നിയമനിർമ്മാണത്തിന് പകരം അധ്യാപകരുമായി ചർച്ച നടത്തി പ്രശ്നം പരിഹരിക്കണമെന്നും പൊതുവിദ്യാഭ്യാസത്തിനുള്ള ഫണ്ടിംഗ് വർദ്ധിപ്പിക്കാൻ സർക്കാർ ഉറച്ച പ്രതിബദ്ധത നൽകണമെന്നുമാണ് സമരക്കാരുടെ ആവശ്യം.

അതേസമയം, തിങ്കളാഴ്ച നിയമനിർമ്മാണവുമായി മുന്നോട്ട് പോകുമെന്ന നിലപാടിലാണ് പ്രീമിയർ ഡാനിയേൽ സ്മിത്ത്. എല്ലാ പ്രശ്നങ്ങളും ചർച്ചയിലൂടെ പരിഹരിക്കാനാവില്ലെന്നും, 3,000 പുതിയ അധ്യാപകർക്കുള്ള ഫണ്ടിംഗും നാല് വർഷത്തിനിടെ 12% ശമ്പള വർദ്ധനവും ഉൾപ്പെടുന്ന സർക്കാരിൻ്റെ നിർദ്ദേശങ്ങൾ അംഗീകരിച്ച് അധ്യാപകർ ജോലിക്ക് മടങ്ങണമെന്നും അവർ ആവശ്യപ്പെട്ടു. തുടർന്ന് ക്ലാസ് മുറികളിലെ പ്രശ്നങ്ങൾ പരിഹരിക്കുന്നതിനായി ഒരു പ്രത്യേക ടാസ്ക് ഫോഴ്സിനൊപ്പം പ്രവർത്തിക്കാമെന്നും പ്രീമിയർ ഉറപ്പ് നൽകി. എന്നാൽ, വിദ്യാഭ്യാസമന്ത്രി നിക്കോളൈഡ്‌സിനെ സ്ഥാനത്തുനിന്ന് നീക്കം ചെയ്യാനുള്ള റീക്കോൾ നിവേദനത്തിനായുള്ള ഒപ്പുശേഖരണവും മണ്ഡലത്തിൽ സജീവമായി നടക്കുന്നുണ്ട്.

📢 കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/JNSnrvnSqw1DUJljLTLp82

Alberta Teachers Association protests: Government says no discussion, law is enough