2026-ൽ കാനഡയിൽ നിന്ന് ആൽബർട്ടയുടെ വേർപിരിയൽ സംബന്ധിച്ച റഫറണ്ടം നടത്തുമെന്ന് ആൽബർട്ട പ്രീമിയർ ഡാനിയേൽ സ്മിത്ത് തിങ്കളാഴ്ച നടത്തിയ ലൈവ്സ്ട്രീം പ്രസംഗത്തിൽ പ്രഖ്യാപിച്ചു. ഇതിനുള്ള ഹർജിക്ക് കുറച്ച് പുതിയ ഒപ്പുകൾ ലഭിച്ചാൽ മതിയാകുമെന്ന് അവർ പറഞ്ഞു. ഫെഡറൽ ലിബറൽ നയങ്ങൾ അൽബർട്ടയുടെ സമ്പദ്വ്യവസ്ഥയെ, പ്രത്യേകിച്ച് എണ്ണയും വാതകവും മേഖലയെ സാരമായി ബാധിച്ചതായി അവർ വിമർശിച്ചു. റഫറണ്ടങ്ങൾ നടത്തി തീരുമാനം എടുക്കുന്നത് കൂടുതൽ എളുപ്പമാക്കാൻ, യുണൈറ്റഡ് കൺസർവേറ്റീവ് സർക്കാർ കൊണ്ടുവന്ന പുതിയ ബിൽ പ്രകാരം, വോട്ടർമാരിൽ നിന്ന് ഒപ്പുകൾ ശേഖരിക്കേണ്ട ശതമാനം 20ൽ നിന്ന് 10ലേക്ക് കുറയ്ക്കും. ഒപ്പുകൾ ശേഖരിക്കേണ്ട സമയം 120 ദിവസമായി നീട്ടാനും ഇതിന്റെ ലക്ഷ്യമാണ്.
കാനഡയ്ക്കുള്ളിൽ ആൽബർട്ടയുടെ പരമാധികാരത്തെ സ്മിത്ത് പിന്തുണയ്ക്കുന്നുണ്ടെങ്കിലും, പൊതു ജനങ്ങളുടെ നിരാശയും വളരുന്ന വിഭജന ചിന്തയും എടുത്തു പറഞ്ഞു. ഒട്ടാവയുമായി സംസാരിച്ചു മുന്നോട്ടുപോകാൻ ഒരു സമിതിയെ സർക്കാർ രൂപീകരിക്കാനാണ് ഉദ്ദേശിക്കുന്നത്. പൊതുജനത്തിന്റെ അഭിപ്രായം മനസ്സിലാക്കാൻ “അൽബർട്ട നെക്സ്റ്റ്” എന്നൊരു ഗ്രൂപ്പും ഉണ്ടാകും. ജനകീയമായി പിന്തുണ ലഭിച്ച നിർദ്ദേശങ്ങൾ 2026-ൽ റഫറണ്ടത്തിന് കൊണ്ടു വരാനുള്ള സാധ്യതയും അവർ വ്യക്തമാക്കി.
തന്റെ നടപടികൾ പാർട്ടി പരാജയങ്ങളെക്കുറിച്ചല്ല, മറിച്ച് ഫെഡറൽ നേതൃത്വത്തിനോടുള്ള ദീർഘകാല പരാതികളെക്കുറിച്ചാണെന്ന് സ്മിത്ത് പറഞ്ഞു. ആൽബർട്ടയ്ക്ക് കരാർ ഭൂമികൾ വേർപെടുത്താനുള്ള അധികാരമില്ലെന്ന് ആദിവാസി നേതാക്കൾ വാദിക്കുമ്പോഴും, ആദിവാസി കരാറുകളെ ബഹുമാനിക്കുന്നു എന്ന് ആൽബർട്ട സർക്കാർ വ്യക്തമാക്കി. പ്രാദേശിക അധികാരവും ദേശീയ ഐക്യവും തമ്മിലുള്ള സന്തുലനത്തെക്കുറിച്ചുള്ള പ്രധാന ചോദ്യങ്ങൾ ഉയർത്തിക്കൊണ്ട് ആൽബർട്ടയുടെ ഈ നീക്കം കാനഡയിലെ മറ്റ് പ്രവിശ്യകളുടെ ഇടയിൽ വ്യാപക ചർച്ചകൾക്ക് വഴിവെച്ചിട്ടുണ്ട്.
