എഡ്മണ്ടൺ: ക്ലാസ്റൂം സങ്കീർണ്ണത പഠിക്കാൻ നിയോഗിച്ച ടീമിന്റെ റിപ്പോർട്ട് പുറത്തുവിട്ട് ആൽബർട്ട സർക്കാർ. സമഗ്ര വിദ്യാഭ്യാസ നയം, ഒപ്പം പ്രാരംഭ ഇടപെടൽ പരിപാടികൾ വിപുലീകരിക്കാനുള്ള നിർദ്ദേശങ്ങൾ എന്നിവയാണ് റിപ്പോർട്ടിലെ പ്രധാന ശുപാർശകൾ.
ആൽബർട്ടയിലെ സ്കൂളുകളിലെ വർധിച്ചുവരുന്ന സങ്കീർണ്ണതയും ആക്രമണ സ്വഭാവവും പഠിക്കാൻ രൂപീകരിച്ച “Aggression and Complexity in Schools Action Team” എന്ന സംഘമാണ് റിപ്പോർട്ട് സർക്കാരിന് സമർപ്പിച്ചത്. കഴിഞ്ഞ മാസം നടന്ന പ്രവിശ്യാതലത്തിലുള്ള അധ്യാപക സമരത്തിലെ പ്രധാന വിഷയങ്ങളിലൊന്ന് ഈ പ്രശ്നങ്ങളായിരുന്നു. റിപ്പോർട്ട് പുറത്തുവിട്ടതിനെ തുടർന്ന് വെള്ളിയാഴ്ച നടന്ന വാർത്താ സമ്മേളനത്തിൽ പ്രീമിയർ ഡാനിയേൽ സ്മിത്തും വിദ്യാഭ്യാസ മന്ത്രി ഡെമെട്രിയോസ് നിക്കോളൈഡ്സും സംസാരിച്ചു. “ഈ റിപ്പോർട്ട് നമ്മുടെ ക്ലാസ്റൂമുകൾ നേരിടുന്ന വെല്ലുവിളികളെ നേരിടാൻ വ്യക്തമായൊരു വഴി നൽകുന്നുണ്ടെന്ന് എനിക്ക് ആത്മവിശ്വാസമുണ്ട്,” വിദ്യാഭ്യാസമന്ത്രി നിക്കോളൈഡ്സ് അഭിപ്രായപ്പെട്ടു.
സൂപ്രണ്ടുമാർ, അധ്യാപകർ, സ്കൂൾ ട്രസ്റ്റിമാർ ഉൾപ്പെടെ 25 അംഗ വിദ്യാഭ്യാസ വിദഗ്ധരാണ് റിപ്പോർട്ട് തയ്യാറാക്കിയത്. ക്ലാസ് വലിപ്പവും സങ്കീർണ്ണതയും വെല്ലുവിളിയാണെന്നും പരിഹാരങ്ങൾ സമയമെടുക്കുമെന്നും മന്ത്രി കൂട്ടിച്ചേർത്തു.
പുതിയ ക്ലാസ് സൈസ് ആൻഡ് കോംപ്ലെക്സിറ്റി കാബിനറ്റ് കമ്മിറ്റി ഈ ശുപാർശകൾക്കനുസരിച്ച് തങ്ങളുടെ പ്രവർത്തനങ്ങൾക്ക് രൂപരേഖ നൽകും. മൂന്ന് വർഷത്തിനുള്ളിൽ ഈ പ്രശ്നങ്ങൾ പരിഹരിക്കുന്നതിനായി 400 മില്യൺ ഡോളറാണ് കമ്മിറ്റിക്ക് അനുവദിച്ചിട്ടുള്ളത്. വിവിധ മന്ത്രാലയങ്ങളുടെ സഹകരണം (Cross-ministry collaboration) പോലുള്ള ചില ശുപാർശകൾ ഇതിനകം തന്നെ നടപ്പിലാക്കി തുടങ്ങിയതായി പ്രീമിയർ ഡാനിയേൽ സ്മിത്ത് വ്യക്തമാക്കി.
വിദ്യാഭ്യാസ മേഖലയിലെ വെല്ലുവിളികൾക്ക് ശാശ്വത പരിഹാരം കാണാൻ സർക്കാർ പ്രതിജ്ഞാബദ്ധമാണെന്ന സൂചനയാണ് റിപ്പോർട്ട് നൽകുന്നത്. കൂടുതൽ വിവരങ്ങൾ ഉടൻ പുറത്തുവരും.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt
Solution to classroom crisis: Alberta government submits report
