ആൽബർട്ടയിലെ വീടുകളിലും വാണിജ്യ ആവശ്യങ്ങൾക്കും പ്രകൃതി വാതകത്തിൽ ഹൈഡ്രജൻ കലർത്തി ചൂടാക്കാനുള്ള പുതിയ നിയമനിർമ്മാണം സർക്കാർ അവതരിപ്പിച്ചു. ആൽബർട്ടയുടെ ഹൈഡ്രജൻ ഉൽപ്പാദന സാധ്യത ഉപയോഗപ്പെടുത്തുകയും അതുവഴി കാർബൺ പുറന്തള്ളൽ കുറയ്ക്കുകയുമാണ് യൂട്ടിലിറ്റീസ് മന്ത്രി നഥാൻ ന്യൂഡോർഫ് അവതരിപ്പിച്ച ഈ ബില്ലിന്റെ ലക്ഷ്യം. എന്നിരുന്നാലും, ഉപഭോക്താക്കൾക്ക് തെരഞ്ഞെടുക്കാനും ഹൈഡ്രജൻ മിശ്രിതം ഉപയോഗിക്കുന്നതുമായി ബന്ധപ്പെട്ട അധിക ചിലവുകൾ നൽകാനും വ്യവസ്ഥയുണ്ട്. ഇത് ഘട്ടം ഘട്ടമായി നടപ്പാക്കും.
സുരക്ഷയും ഉപഭോക്താക്കളുടെ താൽപ്പര്യവും ഉറപ്പാക്കുകയാണ് ലക്ഷ്യമെന്ന് ന്യൂഡോർഫ് പറഞ്ഞു. നിലവിൽ നടക്കുന്ന പൈലറ്റ് പ്രോഗ്രാമുകളുടെ അടിസ്ഥാനത്തിൽ, ഹൈഡ്രജൻ മിശ്രിതത്തിന്റെ അളവ് അഞ്ച് ശതമാനത്തിൽ കൂടാതെ ശ്രദ്ധിക്കും. കുറഞ്ഞ കാർബൺ പുറന്തള്ളുന്നതിനുള്ള ഈ രീതിക്ക് ആവശ്യക്കാർ ഏറുമെന്നാണ് സർക്കാർ പ്രതീക്ഷിക്കുന്നത്. എന്നാൽ ആൽബർട്ട യൂണിവേഴ്സിറ്റി നടത്തിയ പഠനത്തിൽ ഇത് പരിസ്ഥിതിക്ക് കാര്യമായ ഗുണങ്ങളൊന്നും നൽകുന്നില്ലെന്നും ഉപഭോക്താക്കൾക്ക് അധിക ചിലവുണ്ടാക്കുമെന്നും പറയുന്നു.
ഈ നിയമം ആൽബർട്ടയുടെ വൈദ്യുതി വിപണിയിൽ വലിയ പരിഷ്കരണങ്ങൾ വരുത്താൻ സഹായിക്കും. ഗ്രിഡ് വികസിപ്പിക്കുന്നതിനുള്ള അധിക ചിലവ് ഉപഭോക്താക്കളിൽ നിന്ന് ഊർജ്ജ ഉത്പാദകരിലേക്ക് മാറ്റുന്നതാണ് ഇതിൽ പ്രധാനപ്പെട്ട ഒന്ന്. ഇത് കാര്യക്ഷമത വർദ്ധിപ്പിക്കാൻ സഹായിക്കുമെങ്കിലും, പുനരുപയോഗ ഊർജ്ജ പദ്ധതികളെ ഇത് പ്രതികൂലമായി ബാധിക്കുമെന്നും, ഊർജ്ജ ശേഷി വർദ്ധിപ്പിക്കുന്നതിനുള്ള ശ്രമങ്ങളെ ദുർബലപ്പെടുത്തുമെന്നും വിമർശകർ വാദിക്കുന്നു.
2027 ഓടെ പൂർണ്ണമായ പരിഷ്കരണം പ്രതീക്ഷിക്കുന്നു. പ്രതിപക്ഷ പാർട്ടികളും പുനരുപയോഗ ഊർജ്ജ മേഖലയിലുള്ളവരും ഈ പരിഷ്കാരങ്ങൾ ഹരിത ഊർജ്ജത്തിന്റെ വളർച്ചയെ തടസ്സപ്പെടുത്തുമെന്ന് മുന്നറിയിപ്പ് നൽകുന്നു. പുതിയ ചെലവ് ഘടനയും വിപണി ലഭ്യതയിലുള്ള ആശങ്കകളും ശുദ്ധമായ ഊർജ്ജ നിക്ഷേപങ്ങളെ പിന്തിരിപ്പിക്കാൻ സാധ്യതയുണ്ടെന്നും ഇത് ആൽബർട്ടയുടെ കാലാവസ്ഥാ ലക്ഷ്യങ്ങൾക്ക് വിരുദ്ധമാണെന്നും അവർ പറയുന്നു.
