ആയിരങ്ങളുടെ സ്വപ്നയാത്രകൾ പ്രതിസന്ധിയിൽ; എയർ കാനഡ ജീവനക്കാർ സമരത്തിലേക്ക്

എയർ കാനഡ ഫ്ലൈറ്റ് അറ്റൻഡൻ്റുമാർ ഈ വാരാന്ത്യം മുതൽ പണിമുടക്കുമെന്ന് സൂചന. ശനിയാഴ്ച പുലർച്ചെ മുതൽ പണിമുടക്കാനുള്ള നീക്കവുമായി മുന്നോട്ട് പോകുമെന്ന് തൊഴിലാളികളുടെ യൂണിയനായ കനേഡിയൻ യൂണിയൻ ഓഫ് പബ്ലിക് എംപ്ലോയീസ് (CUPE) അറിയിച്ചു. പണിമുടക്ക് നോട്ടീസ് ലഭിച്ചതിനെത്തുടർന്ന് എയർ കാനഡ ലോക്കൗട്ട് നോട്ടീസും നൽകിയിട്ടുണ്ട്. ഏകദേശം 10,000-ത്തിലധികം വരുന്ന ജീവനക്കാരെ പ്രതിനിധീകരിക്കുന്ന CUPE, ചർച്ചകൾ തടസ്സപ്പെട്ടതിനെ തുടർന്നാണ് എയർ കാനഡയ്ക്ക് 72 മണിക്കൂർ പണിമുടക്ക് നോട്ടീസ് നൽകിയത്.

ഇതോടെ, ശനിയാഴ്ച പുലർച്ചെ 12:58 ET (ഈസ്റ്റേൺ ടൈം) മുതൽ ജീവനക്കാർക്ക് ജോലിയിൽ നിന്ന് വിട്ടുനിൽക്കാം. ഇതിന് മറുപടിയായി, ശനിയാഴ്ച പുലർച്ചെ 1:30 ET മുതൽ ലോക്കൗട്ട് ചെയ്യുമെന്ന് എയർ കാനഡയും അറിയിച്ചു. മാർച്ച് മാസം മുതൽ യൂണിയനും എയർ കാനഡയും തമ്മിൽ പുതിയ കരാറിനായി ചർച്ചകൾ നടക്കുന്നുണ്ട്. വേതനം, ജോലി സംബന്ധമായ നിയമങ്ങൾ, ശമ്പളമില്ലാത്ത തൊഴിൽ സമയം തുടങ്ങിയ വിഷയങ്ങളാണ് ചർച്ചയിലുണ്ടായിരുന്നത്. “വേതന വർദ്ധന ഉൾപ്പെടെയുള്ള വിഷയങ്ങളിൽ ഞങ്ങൾക്ക് വലിയ അകലം ഉണ്ടായിരുന്നു,” എയർ കാനഡയുടെ കോർപ്പറേറ്റ് കമ്മ്യൂണിക്കേഷൻസ് വൈസ് പ്രസിഡന്റ് ക്രിസ്റ്റോഫ് ഹെനബെല്ലെ പറഞ്ഞു.

എയർ കാനഡ 38 ശതമാനത്തിലധികം വേതന വർദ്ധനവ് വാഗ്ദാനം ചെയ്തിരുന്നുവെങ്കിലും യൂണിയൻ ഇത് നിരസിച്ചു. “ഞങ്ങൾ ഇപ്പോഴും എയർ കാനഡ ഒരു തീരുമാനത്തിലെത്തുമെന്നും ചർച്ചകൾക്ക് വരുമെന്നും പ്രതീക്ഷിക്കുന്നു,” CUPE എയർ കാനഡ കോമ്പോണൻ്റ് പ്രസിഡന്റ് വെസ്‌ലി ലെസോസ്‌കി അറിയിച്ചു. അതേസമയം, എയർ കാനഡ മുന്നോട്ടുവെച്ച നിർദ്ദേശങ്ങൾ അംഗീകരിക്കാൻ കഴിയില്ലെന്ന് യൂണിയൻ വ്യക്തമാക്കി. എയർ കാനഡയുമായി നടത്തിയ ചർച്ചകൾക്ക് ശേഷമാണ് പണിമുടക്ക് പ്രഖ്യാപിക്കാൻ യൂണിയൻ തീരുമാനിച്ചത്.

നിലവിൽ ജോലികളിൽ നിന്ന് വിട്ടുനിൽക്കാത്ത ജീവനക്കാരെ എയർലൈൻ തിരിച്ച് കൊണ്ടുവരുമെന്ന് പ്രതീക്ഷിക്കുന്നതായും ലെസോസ്‌കി പറഞ്ഞു. യാത്രക്കാരെ ബുദ്ധിമുട്ടിച്ചതിൽ ഖേദമുണ്ടെന്നും, എന്നാൽ ജീവനക്കാരുടെ ആവശ്യങ്ങൾ പരിഹരിക്കാൻ പുതിയൊരു കരാർ ആവശ്യമാണെന്നും ലെസോസ്‌കി കൂട്ടിച്ചേർത്തു.

പണിമുടക്ക് മുന്നറിയിപ്പിനെ തുടർന്ന്, ഓഗസ്റ്റ് 15-നും 18-നും ഇടയിൽ യാത്ര ചെയ്യുന്നവർക്ക് ആവശ്യമെങ്കിൽ അവരുടെ ടിക്കറ്റ് മാറ്റാനുള്ള സൗകര്യം എയർ കാനഡ ഒരുക്കിയിട്ടുണ്ട്. 120-ൽ അധികം അന്താരാഷ്ട്ര, ആഭ്യന്തര വിമാനങ്ങളുമായി സഹകരിച്ച് യാത്രക്കാർക്ക് മറ്റ് സൗകര്യങ്ങൾ ഒരുക്കുമെന്നും എയർ കാനഡ വെബ്സൈറ്റിലൂടെ അറിയിച്ചു. വിമാനം റദ്ദാക്കിയാൽ യാത്രക്കാർക്ക് ടിക്കറ്റ് തുക തിരികെ ലഭിക്കുന്നതിനുള്ള സൗകര്യവും എയർ കാനഡ ഒരുക്കിയിട്ടുണ്ട്.