ഓൺലൈൻ ബാങ്കിങ് തട്ടിപ്പുകൾക്കും ഒടിപി മോഷണത്തിനുമെതിരെ നിർണ്ണായക ചുവടുവെപ്പുമായി പ്രമുഖ ടെലികോം സേവനദാതാക്കളായ ഭാരതി എയർടെൽ. ഉപഭോക്താക്കളുടെ ബാങ്ക് വിവരങ്ങളും ഒടിപികളും തട്ടിയെടുക്കുന്ന നൂതന രീതികളെ പ്രതിരോധിക്കാൻ ആർട്ടിഫിഷ്യൽ ഇന്റലിജൻസ് (AI) അധിഷ്ഠിത ‘ഫ്രോഡ് അലേർട്ട്’ സംവിധാനമാണ് കമ്പനി അവതരിപ്പിച്ചത്. നിലവിൽ ഹരിയാനയിൽ പ്രവർത്തനമാരംഭിച്ച ഈ സുരക്ഷാ സേവനം, അടുത്ത രണ്ടാഴ്ചയ്ക്കുള്ളിൽ രാജ്യത്തെ നൂറ് ശതമാനം എയർടെൽ ഉപഭോക്താക്കളിലേക്കും വ്യാപിപ്പിക്കുമെന്ന് കമ്പനി ഔദ്യോഗികമായി അറിയിച്ചു.
സാധനങ്ങൾ ഡെലിവറി ചെയ്യാനെന്ന വ്യാജേന വിളിച്ച് ഫോണിലേക്ക് വരുന്ന ഒടിപികൾ കൈക്കലാക്കുന്ന തട്ടിപ്പിനെയാണ് പുതിയ സംവിധാനം പ്രധാനമായും ലക്ഷ്യമിടുന്നത്. ഒരു സംശയാസ്പദമായ കോൾ നടന്നുകൊണ്ടിരിക്കെ ഉപഭോക്താവിന്റെ ഫോണിലേക്ക് ബാങ്ക് ഒടിപി വരികയാണെങ്കിൽ, എയർടെല്ലിന്റെ എഐ സിസ്റ്റം ഇത് തത്സമയം തിരിച്ചറിയും. ഉടൻ തന്നെ ആ സംഭാഷണത്തിനിടയിൽ പണം നഷ്ടപ്പെടാൻ സാധ്യതയുണ്ടെന്ന കൃത്യമായ മുന്നറിയിപ്പ് ഉപഭോക്താവിന് നൽകും. തട്ടിപ്പുകാർ ഫോൺ കട്ട് ചെയ്യാൻ അനുവദിക്കാതെ സംസാരിച്ചുകൊണ്ടിരിക്കുന്ന സാഹചര്യങ്ങളിൽ ഈ മുന്നറിയിപ്പ് വലിയ സുരക്ഷയാകും നൽകുക.
നെറ്റ്വർക്ക് ലെയറിൽ തന്നെ പ്രവർത്തിക്കുന്ന ഈ സാങ്കേതികവിദ്യ വഴി തട്ടിപ്പുകാർക്കെതിരെ ശക്തമായ പ്രതിരോധം തീർക്കാൻ കഴിയുമെന്ന് എയർടെൽ ഇന്ത്യ സിഇഒ ശാശ്വത് ശർമ്മ വ്യക്തമാക്കി. എഐ സാങ്കേതികവിദ്യയുടെ വേഗതയും മനുഷ്യന്റെ വിവേചനബുദ്ധിയും സംയോജിപ്പിക്കുന്നതോടെ തട്ടിപ്പുകൾ തിരിച്ചറിയാനും ഇടപാടുകൾ ഉറപ്പുവരുത്താനും ഉപഭോക്താവിന് ആവശ്യമായ സമയം ലഭിക്കുന്നു. ഒടിപികൾ അട്ടിമറിക്കപ്പെടുന്ന സാഹചര്യങ്ങൾ ഇല്ലാതാക്കി എയർടെൽ നെറ്റ്വർക്കിനെ ഇന്ത്യയിലെ ഏറ്റവും സുരക്ഷിതമായ ആശയവിനിമയ ശൃംഖലയാക്കി മാറ്റുകയാണ് ഈ ദൗത്യത്തിന്റെ ലക്ഷ്യം.
ai-will-lock-down-otp-fraud-airtel-brings-new-security-shield-for-customers
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/JNSnrvnSqw1DUJljLTLp82
