നടിയും സോഷ്യൽ മീഡിയ ഇൻഫ്ലുവൻസറുമായ അഹാന കൃഷ്ണയുടെയും കുടുംബത്തിന്റെയും പുതിയ ബിസിനസ് സംരംഭമായ ‘സിയ’യെക്കുറിച്ചുള്ള ചർച്ചകൾ സോഷ്യൽ മീഡിയയിൽ സജീവമാണ്. പരിമിതമായ സാരി ശേഖരങ്ങളുമായി രംഗപ്രവേശം ചെയ്ത ‘സിയ’യുടെ ഉത്പന്നങ്ങൾക്ക് ഉയർന്ന വിലയാണെന്ന് ആരോപണം ഉയർന്നിരുന്നു. ഈ വിമർശനങ്ങളോട് പ്രതികരിച്ച് മുൻ ബിഗ് ബോസ് താരവും വ്ലോഗറുമായ സായി കൃഷ്ണ രംഗത്തെത്തി. അഹാനയും സഹോദരിമാരായ ഇഷാനി, ഹൻസിക, അമ്മ സിന്ധു കൃഷ്ണ എന്നിവർ ചേർന്ന് ഓഗസ്റ്റ് 14-നാണ് ‘സിയ’ എന്ന വസ്ത്ര ബ്രാൻഡ് ആരംഭിച്ചത്.
ഉയർന്ന വില കാരണം പലരും എതിർപ്പ് പ്രകടിപ്പിച്ചെങ്കിലും, വെബ്സൈറ്റിൽ ലഭ്യമായ സാരികളിൽ ഭൂരിഭാഗവും ഇതിനോടകം വിറ്റുപോയെന്നാണ് റിപ്പോർട്ടുകൾ. ഈ സാഹചര്യത്തിലാണ് പലരും അഹാനയുടെ സഹോദരിയായ ദിയ കൃഷ്ണയെ ബിസിനസിൽ നിന്ന് ഒഴിവാക്കിയെന്ന ആരോപണം ഉന്നയിച്ചത്. ഈ വിഷയങ്ങളെല്ലാം ഉൾപ്പെടുത്തിക്കൊണ്ടുള്ള ഒരു വീഡിയോയിലൂടെയാണ് സായി കൃഷ്ണ പ്രതികരണമറിയിച്ചത്.
ദിയയെ ബിസിനസ്സിൽ നിന്ന് ഒഴിവാക്കി എന്ന് ആരും പറഞ്ഞിട്ടില്ലല്ലോ എന്ന് അദ്ദേഹം ചോദിച്ചു. ‘സാധാരണക്കാർക്ക് താങ്ങാനാവുന്ന വിലയല്ല’ എന്ന വിമർശനത്തോട്, ‘ആരാണ് ഇന്ന് സമൂഹത്തിലെ സാധാരണക്കാർ?’ എന്ന് സായ് കൃഷ്ണ തിരിച്ച് ചോദിച്ചു.
അഹാനയുടെ ബ്രാൻഡിൽ ലഭിക്കുന്നത് എക്സ്ക്ലൂസിവായ, പരിമിതമായ സാരികളായിരിക്കുമെന്ന് അദ്ദേഹം ചൂണ്ടിക്കാട്ടി. ‘സിന്ധു കൃഷ്ണയുടേയും മക്കളുടേയും ജീവിതശൈലി ശരാശരിക്ക് മുകളിലാണ്. അവർ ഒരു പരിപാടിക്കായി എടുക്കുന്ന സാരികൾക്ക് നല്ല വിലയുണ്ടാകും.
കേരളത്തിന് പുറത്ത് പോയി ഒരു സാരി വാങ്ങുമ്പോൾ അവർക്ക് ഡിസ്കൗണ്ട് ലഭിക്കില്ല, എന്നാൽ ഉപഭോക്താക്കൾ എന്ന നിലയിൽ സ്വന്തം ഉപയോഗത്തിനായി നാലുപേരും സാരികൾ വാങ്ങുമ്പോൾ അവർക്ക് അത് ലാഭമാണ്. ഈ ആശയം വളരെ നല്ലതാണ്’, സായി കൃഷ്ണ തന്റെ വീഡിയോയിൽ പറഞ്ഞു. സായി കൃഷ്ണയുടെ ഭാര്യ സ്നേഹയും ഈ വീഡിയോയിൽ അദ്ദേഹത്തോടൊപ്പം ചേർന്നിരുന്നു.
സായി കൃഷ്ണയുടെ പ്രതികരണത്തെ അനുകൂലിച്ചും പ്രതികൂലിച്ചും നിരവധി ആളുകളാണ് രംഗത്തെത്തിയിരിക്കുന്നത്. സമൂഹമാധ്യമങ്ങളിൽ ഉയരുന്ന വിമർശനങ്ങൾക്ക് മറുപടി പറയേണ്ടത് അഹാന കൃഷ്ണയാണെന്നും, സായി കൃഷ്ണയുടെ ഈ ഇടപെടൽ ആവശ്യമില്ലായിരുന്നു എന്നും വിമർശകർ ചൂണ്ടിക്കാട്ടുന്നു. ഈ വിഷയത്തിൽ അഹാനയുടെയോ കുടുംബത്തിന്റെയോ ഭാഗത്ത് നിന്ന് ഇതുവരെ പ്രതികരണമൊന്നും വന്നിട്ടില്ല.
