ഒരാൾക്ക് ആഗ്രഹങ്ങൾ സഫലീകരിക്കാൻ പ്രായം ഒരു തടസ്സമല്ലെന്ന് തെളിയിക്കുകയാണ് സഡ്ബറിയിൽ നിന്നുള്ള കരോൾ ഷിമിൻസ്കി. തന്റെ 85-ാം പിറന്നാളിനോടനുബന്ധിച്ച്, സ്കൈഡൈവിങ് എന്ന സാഹസിക വിനോദം ജീവിതത്തിലെ നേട്ടങ്ങളുടെ പട്ടികയിലേക്ക് ചേർത്തിരിക്കുകയാണ് ഈ മുത്തശ്ശി. കുക്ക്സ്റ്റൗണിൽ വെച്ചാണ് ഇവർ വിമാനത്തിൽ നിന്ന് താഴേക്ക് ചാടി തന്റെ സ്വപ്നം യാഥാർത്ഥ്യമാക്കിയത്.
താഴേക്ക് പതിക്കുമ്പോൾ പലരും ഭയന്ന് നിലവിളിക്കുമെങ്കിലും, ഉയരങ്ങളെ ഒട്ടും ഭയമില്ലാത്തതിനാൽ കരോൾ ശാന്തയായിരുന്നെന്ന് പറയുന്നു. “വളരെ സാവധാനമാണ് താഴേക്ക് വരുന്നതായി തോന്നിയത്. ചുറ്റും നോക്കിയും ഇൻസ്ട്രക്ടറുമായി സംസാരിച്ചുമിരുന്നു,” അവർ തന്റെ അനുഭവം വിവരിച്ചു. താഴേക്ക് വീഴുന്നത് സ്വപ്നം കാണുന്നതിന് സമാനമായ അനുഭവമാണ് സ്കൈഡൈവിങ്ങിനെന്നും അവർ കൂട്ടിച്ചേർത്തു.
“ഒരു കുലുക്കത്തോടെ താഴേക്ക് അതിവേഗം പോകുന്നതുപോലെ തോന്നും, പക്ഷേ ഉണരില്ല,” അവർ പറഞ്ഞു. മുമ്പ് ബ്രെഡ് ഡെലിവറി ഡ്രൈവറായി ജോലി ചെയ്തിരുന്ന കരോൾ, നിലവിൽ സെന്റ് മേരീസ് യുക്രേനിയൻ കാത്തലിക് ചർച്ചിലെ സജീവ സന്നദ്ധപ്രവർത്തകയാണ്. ആരോഗ്യപരമായ പ്രശ്നങ്ങളൊന്നും തനിക്ക് ഈ സാഹസികതയ്ക്ക് തടസ്സമായില്ലെന്ന് അവർ പറയുന്നു. എങ്കിലും, താഴെ ഇറങ്ങുന്നത് അൽപ്പം ബുദ്ധിമുട്ടായിരുന്നുവെന്ന് അവർ സമ്മതിച്ചു.
“എനിക്ക് രണ്ട് കാൽമുട്ടിലും തോളിലും ശസ്ത്രക്രിയ കഴിഞ്ഞതാണ്. അതുകൊണ്ട് ഇറങ്ങുമ്പോൾ കുറച്ചുകൂടി പ്രയാസമായി. ഇപ്പോൾ ഇത് ചെയ്തതിൽ എനിക്ക് സന്തോഷമുണ്ട്. കാരണം കുറച്ചുകൂടി കാത്തിരുന്നെങ്കിൽ ഒരുപക്ഷേ എനിക്ക് ഇത് ചെയ്യാൻ സാധിക്കില്ലായിരുന്നു,” കരോൾ പറഞ്ഞു. മകന്റെയും കൊച്ചുമക്കളുടെയും അവരുടെ മക്കളുടെയും മുത്തശ്ശിയായ കരോൾ, താൻ സ്കൈഡൈവിങ് ചെയ്യാൻ പോകുന്ന വിവരം ആരോടും പറഞ്ഞിരുന്നില്ല.
അവർക്ക് ആശങ്കയുണ്ടാകാതിരിക്കാൻ വേണ്ടിയായിരുന്നു ഇത്. കരോളിന്റെ സാഹസിക മനോഭാവത്തെക്കുറിച്ച് അവരുടെ ഒരു കൊച്ചുമകൻ ഇങ്ങനെ പറഞ്ഞു: “എനിക്ക് ഇത് കേട്ടപ്പോൾ ഒട്ടും അത്ഭുതം തോന്നിയില്ല. എന്റെ മുത്തശ്ശി കാളകൾക്കൊപ്പം ഓടുന്നു എന്ന് കേട്ടാലും ഞാൻ വിശ്വസിക്കും.” കരോൾ തന്റെ അടുത്ത ലക്ഷ്യം എന്താണെന്ന് വെളിപ്പെടുത്തിയിട്ടില്ലെങ്കിലും, സിപ്-ലൈനിങ് ചെയ്യാൻ അവസരം ലഭിച്ചാൽ അത് ചെയ്യുമെന്നും പറഞ്ഞു.
ഏതൊരാഗ്രഹവും സഫലമാക്കാൻ മടിക്കരുതെന്നാണ് കരോളിന്റെ ഉപദേശം. “അത് നിങ്ങൾ ചെയ്യാൻ ആഗ്രഹിക്കുന്ന കാര്യമാണെങ്കിൽ, ഏത് പ്രായത്തിലാണെങ്കിലും അത് ചെയ്യണം. അതിന് മറ്റൊരു കാരണം ഞാൻ കാണുന്നില്ലെന്നാണ് അവർ പറയുന്നത്.
Age is just a number; Canadian grandmother flies into the sky on her 85th birthday
