മാനിറ്റോബ: ഒരൊറ്റ വൈറസിന് ഒരു വ്യവസായത്തെ മുഴുവൻ തുടച്ചുനീക്കാൻ കഴിയും. ആഫ്രിക്കൻ പന്നിപ്പനി എന്ന മഹാമാരിയുടെ ഭീഷണിയിൽ വിറങ്ങലിച്ചു നിൽക്കുകയാണ് മാനിറ്റോബ പ്രവിശ്യ. ലക്ഷക്കണക്കിന് പന്നികളെ കൂട്ടമായി കൊന്നൊടുക്കാൻ അധികൃതർ പദ്ധതിയിടുന്നു. ആഫ്രിക്കൻ പന്നിപ്പനി പടർന്നാൽ ഉണ്ടായേക്കാവുന്ന ഈ ‘സാമ്പത്തിക, മൃഗക്ഷേമ ദുരന്തം’ പ്രവിശ്യക്ക് പ്രതിവർഷം 300 കോടി ഡോളറിന്റെ വരുമാന നഷ്ടം ഉണ്ടാക്കുമെന്നാണ് കണക്കുകൂട്ടൽ. ആഫ്രിക്കൻ പന്നിപ്പനി പടർന്നുപിടിച്ചാൽ സ്വീകരിക്കേണ്ട അടിയന്തര പ്രതിരോധ പദ്ധതി തയ്യാറാക്കുന്നതിനായി മാനിറ്റോബ സർക്കാർ കൺസൾട്ടിങ് സ്ഥാപനങ്ങളിൽ നിന്ന് നിർദേശങ്ങൾ ക്ഷണിച്ചു.
വൈറസ് ബാധയേൽക്കുന്ന പന്നികളെ ദയാവധം ചെയ്യുകയും തുടർന്ന് സംസ്കരിക്കുകയും ചെയ്യേണ്ടി വരുമെന്ന് പ്രവിശ്യയുടെ മൃഗാരോഗ്യ, ക്ഷേമ വിഭാഗം വ്യക്തമാക്കുന്നു. ഏഷ്യയിലും മധ്യ, കിഴക്കൻ യൂറോപ്പിലും സഹാറൻ ആഫ്രിക്കയിലും ലക്ഷക്കണക്കിന് പന്നികളുടെ ജീവനാണ് ഈ രോഗം കവർന്നെടുത്തത്. ആഫ്രിക്കൻ പന്നിപ്പനി (ASF) ഒരു നൂറ്റാണ്ടിലേറെ മുൻപ് കണ്ടെത്തിയതാണെങ്കിലും, 2018 മുതൽ ഏഷ്യയിൽ അതിവേഗം പടർന്നു. ഹെയ്തിയിലും ഡൊമിനിക്കൻ റിപ്പബ്ലിക്കിലും രോഗം പടർന്നതോടെ വൈറസ് പടിഞ്ഞാറൻ അർദ്ധഗോളത്തിലും എത്തിയിട്ടുണ്ട്.
കാനഡയിൽ ഈ വൈറസ് എത്തിയാൽ, ‘കമ്പോളത്തിലേക്ക് അയക്കാൻ സാധിക്കാത്ത ലക്ഷക്കണക്കിന് പന്നികളെ ദയാപൂർവം കൊന്നൊടുക്കി സംസ്കരിക്കേണ്ടി വരും’ എന്ന് മാനിറ്റോബ അഗ്രികൾച്ചറിന്റെ മൃഗാരോഗ്യ, ക്ഷേമ വിഭാഗം പറയുന്നു. “കാനഡയിൽ ASF പടർന്നാൽ അന്താരാഷ്ട്ര വ്യാപാര പങ്കാളികൾ അതിർത്തികൾ ഉടൻ അടയ്ക്കും. ഇത് മാനിറ്റോബയിലെ പന്നി വളർത്തൽ മേഖലയ്ക്ക് മൂന്ന് മാസത്തിനുള്ളിൽ 120 കോടി ഡോളറിന്റെയും ഒരു വർഷത്തിനുള്ളിൽ 310 കോടി ഡോളറിന്റെയും നഷ്ടമുണ്ടാക്കും,” മാനിറ്റോബ അഗ്രികൾച്ചർ അറിയിച്ചു.
രോഗം പടർന്നാൽ വിവിധ സർക്കാർ ഏജൻസികൾക്കും സ്വകാര്യ പന്നി ഉൽപ്പന്ന നിർമാതാക്കൾക്കും പന്നി കർഷകർക്കും ഇടയിൽ ഏകോപനം ഉണ്ടാകാൻ ആര് ഉത്തരവാദിത്തം ഏറ്റെടുക്കണമെന്ന് കണ്ടെത്താൻ കൺസൾട്ടന്റുമാരെ തേടുകയാണ് പ്രവിശ്യ. മറ്റ് പന്നി വളർത്തൽ പ്രവിശ്യകളായ ആൽബെർട്ട, സസ്കച്ചെവാൻ, ഒന്റാറിയോ, ക്യൂബെക്ക് എന്നിവിടങ്ങളുമായി സഹകരിച്ച് പദ്ധതി നടപ്പാക്കാനും മാനിറ്റോബ ശ്രമിക്കുന്നുണ്ട്.
“നമ്മൾ ഉൽപ്പാദിപ്പിക്കുന്നതിന്റെ 90 ശതമാനവും മാനിറ്റോബയിൽ നിന്ന് കയറ്റുമതി ചെയ്യുന്നതാണ്,” മാനിറ്റോബ പോർക്ക് ജനറൽ മാനേജർ കാം ഡാൽ പറഞ്ഞു. അതിനാൽ അതിർത്തി അടയ്ക്കുന്നത് വലിയ പ്രഹരമായിരിക്കുമെന്നും അദ്ദേഹം കൂട്ടിച്ചേർത്തു. അതേസമയം, ആഫ്രിക്കൻ പന്നിപ്പനി മനുഷ്യർക്ക് ഭീഷണിയല്ലെന്നും, പന്നികളിലേക്കും പുരാതന ടിക്സുകളിലേക്കും അല്ലാതെ മറ്റ് മൃഗങ്ങളിലേക്ക് പകരില്ലെന്നും മാനിറ്റോബയിലെ ചീഫ് വെറ്ററിനറി ഓഫീസർ ഗ്ലെൻ ഡ്യൂസർ വ്യക്തമാക്കി. വൈറസ് ബാധിച്ച പന്നികളുമായോ അവയുടെ കാഷ്ഠം, രക്തം, ഇറച്ചി ഉൽപ്പന്നങ്ങൾ എന്നിവയുമായോ ഉള്ള നേരിട്ടുള്ള സമ്പർക്കത്തിലൂടെയാണ് പ്രധാനമായും രോഗം പകരുന്നത്.
വിമാനത്താവളങ്ങളിൽ നായകളെ ഉപയോഗിച്ചുള്ള പരിശോധന ഇതിന്റെ ഭാഗമാണ്. 2026 മാർച്ചോടെ അടിയന്തര പ്രതികരണ പദ്ധതി പൂർത്തിയാക്കാനാണ് സർക്കാർ ലക്ഷ്യമിടുന്നത്. കഴിഞ്ഞ ഏഴ് വർഷമായി കാനഡയിൽ ഈ രോഗം പടരാത്തതിൽ സന്തോഷമുണ്ടെന്ന് ഡ്യൂസർ പറഞ്ഞു. “എങ്കിലും രോഗം വരാനുള്ള സാധ്യത ഇപ്പോഴുമുണ്ട്. അത് മുന്നിൽ കണ്ടുകൊണ്ട് രോഗം വരാതെ തടയാനുള്ളതെല്ലാം നമ്മൾ ചെയ്യേണ്ടതുണ്ട്,” അദ്ദേഹം കൂട്ടിച്ചേർത്തു.
