ഉജ്ജ്വല സെഞ്ച്വറിയും ട്രാവിസ് ഹെഡുമായി 171 റൺസിന്റെ കൂട്ടുകെട്ടും; ഐപിഎൽ 2025-ലെ ത്രസിപ്പിക്കുന്ന മത്സരത്തിൽ പഞ്ചാബ് കിംഗ്സ് പരാജയപ്പെട്ടു
ഇത്തവണത്തെ ഐപിഎൽ സീസണിലെ ഏറ്റവും മികച്ച ഇന്നിംഗ്സുകളിലൊന്നുമായി അഭിഷേക് ശർമ്മ ക്രിക്കറ്റ് ലോകത്തെ ഞെട്ടിച്ചിരിക്കുകയാണ്. വെറും 55 പന്തിൽ 14 ഫോറുകളും 10 സിക്സറുകളും ഉൾപ്പെടെ 141 റൺസെടുത്ത അഭിഷേകിന്റെ ബാറ്റിംഗ് മികവിൽ സൺറൈസേഴ്സ് ഹൈദരാബാദ് പഞ്ചാബ് കിംഗ്സ് ഉയർത്തിയ 246 റൺസ് എന്ന വമ്പൻ ലക്ഷ്യം ഞെട്ടിക്കും വിധത്തിൽ മറികടന്നു. ഓപ്പണിംഗ് വിക്കറ്റിൽ ട്രാവിസ് ഹെഡുമായി (37 പന്തിൽ 66 റൺസ്) ചേർന്ന് 171 റൺസിന്റെ കൂട്ടുകെട്ട് പടുത്തുയർത്തിയ അഭിഷേക്, ഐപിഎലിൽ ഒരു ഇന്ത്യൻ താരം നടത്തിയ ഏറ്റവും തകർപ്പൻ ഇന്നിംഗ്സുകളിലൊന്നാണ് കാഴ്ചവെച്ചത്.
ബാറ്റിംഗ് തിരഞ്ഞെടുത്ത പഞ്ചാബ് കിംഗ്സ് ക്യാപ്റ്റൻ ശ്രേയസ് അയ്യരുടെ തീരുമാനം ആദ്യം ശരിയായതായി തോന്നിച്ചു. പ്രിയാൻഷ് ആര്യയും പ്രഭ്സിംരൻ സിംഗും ചേർന്ന് പവർപ്ലേയിൽ തകർത്തടിച്ചതോടെ പവർപ്ലേയിൽ 66 റൺസാണ് അടിച്ചു കൂട്ടിയത്. ശ്രേയസ് അയ്യർ 22 പന്തിൽ അർദ്ധസെഞ്ച്വറി നേടി. മധ്യ ഓവറുകളിൽ സ്കോറിങ്ങ് നിരക്ക് കുറഞ്ഞെങ്കിലും, അവസാന ഓവറുകളിൽ മാർക്കസ് സ്റ്റോയ്നിസ് കൊടുങ്കാറ്റായി മാറുകയായിരുന്നു. മുഹമ്മദ് ഷമിയുടെ അവസാന ഓവറിൽ തുടർച്ചയായി നാല് സിക്സറുകൾ പറത്തിയ സ്റ്റോയ്നിസ്, ടീമിനെ 245 റൺസ് എന്ന കൂറ്റൻ സ്കോറിലേക്ക് എത്തിച്ചു.
എന്നാൽ, ലക്ഷ്യം പിന്തുടരാനെത്തിയ എസ്ആർഎച്ചിന്റെ ഓപ്പണർമാർ പഞ്ചാബ് ബൗളർമാരുടെ ആത്മവിശ്വാസം തകർത്തുകളഞ്ഞു. അഭിഷേക് ശർമ്മ ആദ്യം മുതൽ തന്നെ ആക്രമണാത്മക സമീപനം സ്വീകരിച്ചു, വെറും 19 പന്തിൽ അർദ്ധസെഞ്ച്വറിയും 40 പന്തിൽ സെഞ്ച്വറിയും പൂർത്തിയാക്കി. പഞ്ചാബിന്റെ ഏതു ബൗളറെയും തിരിച്ചറിയാതെ അടിച്ച അഭിഷേക്, പ്രത്യേകിച്ച് സ്പിന്നർമാർക്കെതിരെ കൂടുതൽ ആധിപത്യം പുലർത്തി. ട്രാവിസ് ഹെഡിന്റെ പുറത്താകലിനു ശേഷവും വേഗം കുറയ്ക്കാതെ അഭിഷേക് ബാറ്റിംഗ് തുടർന്നതോടെ, 16-ാം ഓവറിൽ അഭിഷേക് പുറത്തയെങ്കിലും എസ്ആർഎച്ച് ലക്ഷ്യത്തിന് അടുത്തെത്തിയിരുന്നു, തുടർന്ന് ക്ളാസ്സന്റെയും ഇഷാൻ കിഷാന്റെയും ഫൈനൽ ടച്ചോടെ SRH 8 വിക്കറ്റ് വിജയം സ്വന്തമാക്കി.
സൺറൈസേഴ്സിന്റെ ഈ ചരിത്ര വിജയത്തിന് പിന്നിൽ പഞ്ചാബിന്റെ മോശം ഫീൽഡിംഗും വഴിയൊരുക്കി. നിർണായക സന്ദർഭങ്ങളിൽ ക്യാച്ചുകൾ നഷ്ടപ്പെടുത്തുകയും, ബൗളർമാർ അച്ചടക്കമില്ലാതെ പന്തെറിയുകയും ചെയ്തത് അവരുടെ പരാജയത്തിന് കാരണമായി. “തുടക്കം മുതൽ പന്ത് നന്നായി കാണാൻ കഴിഞ്ഞു, പിച്ച് ബാറ്റിംഗിന് അനുകൂലമായിരുന്നു,” മത്സരശേഷം അഭിഷേക് പറഞ്ഞു. ഐപിഎൽ ചരിത്രത്തിലെ ഏറ്റവും മികച്ച ചേസുകളിലൊന്നായി മാറിയ ഈ ജയത്തോടെ, പോയിന്റ് പട്ടികയിൽ മുന്നേറ്റം നടത്താനും എസ്ആർഎച്ചിന് കഴിഞ്ഞു.
നിരാശാജനകമായ തോൽവിയിൽ പഞ്ചാബ് ക്യാപ്റ്റൻ ശ്രേയസ് അയ്യർ ബൗളർമാരുടെ പ്രകടനത്തിൽ നിരാശ പ്രകടിപ്പിച്ചു. “245 റൺസ് എന്നത് മികച്ച സ്കോറാണെന്ന് ഞങ്ങൾ കരുതി, എന്നാൽ അഭിഷേകിന്റെ അവിശ്വസനീയമായ ബാറ്റിംഗ് ഞങ്ങളുടെ പദ്ധതികൾ തകിടം മറിച്ചു,” അദ്ദേഹം പറഞ്ഞു. ഈ വിജയത്തോടെ സൺറൈസേഴ്സ് ഹൈദരാബാദ് ഐപിഎലിൽ ഏറ്റവും വലിയ ലക്ഷ്യം വിജയകരമായി പിന്തുടർന്ന ടീമുകളുടെ പട്ടികയിൽ ഒന്നാമതെത്തി.
