ടൊറന്റോ: ഒന്റാരിയോയിലെ വിവിധ യൂണിവേഴ്സിറ്റികളിലും കോളേജുകളിലും പഠിക്കുന്ന നൂറുകണക്കിന് വിദ്യാർത്ഥികൾ ക്ലാസുകൾ ബഹിഷ്‌കരിച്ച് പ്രതിഷേധത്തിൽ. വിദ്യാർത്ഥി സഹായ പദ്ധതിയായ ഒന്റാരിയോ സ്റ്റുഡന്റ് അസിസ്റ്റൻസ് പ്രോഗ്രാമിലെ (OSAP) പുതിയ വെട്ടിക്കുറവുകളും ട്യൂഷൻ ഫീസ് വർദ്ധനവും പിൻവലിക്കണമെന്ന് ആവശ്യപ്പെട്ടായിരുന്നു ഈ സമരം. കനേഡിയൻ ഫെഡറേഷൻ ഓഫ് സ്റ്റുഡന്റ്‌സിന്റെ (സിഎഫ്എസ്) നേതൃത്വത്തിലാണ് പ്രവിശ്യയിലെ വിവിധ കാമ്പസുകളിൽ ഈ വാക്ക്ഔട്ട് നടത്തിയത്.
സർക്കാർ വരുത്തിയ പുതിയ മാറ്റങ്ങൾ വിദ്യാർത്ഥികളുടെ ജീവിതം വലിയ പ്രതിസന്ധിയിലാക്കിയതായി പ്രതിഷേധക്കാർ ആരോപിച്ചു. പഠനച്ചെലവ് ക്രമാതീതമായി ഉയർന്നത് സാധാരണക്കാരായ കുടുംബങ്ങളെയും വിദ്യാർത്ഥികളെയും കനത്ത കടബാധ്യതയിലേക്കാണ് തള്ളിവിടുന്നത്. പലർക്കും വാടക പോലും നൽകാൻ കഴിയാത്ത അവസ്ഥയാണെന്നും, ഭാവിയിൽ പഠനം തുടരാൻ കഴിയുമോ എന്ന ആശങ്കയിലാണ് വിദ്യാർത്ഥികളെന്നും യൂണിയൻ ഭാരവാഹികൾ വ്യക്തമാക്കി.
വിദ്യാർത്ഥി സഹായ പദ്ധതിയായ ഒന്റാറിയോ സ്റ്റുഡന്റ് അസിസ്റ്റൻസ് പ്രോഗ്രാമിൽ (OSAP) പ്രവിശ്യാ സർക്കാർ നടപ്പാക്കിയ പരിഷ്കരണങ്ങളാണ് നിലവിലെ പ്രതിഷേധങ്ങൾക്ക് പ്രധാന കാരണം. ഫെബ്രുവരിയിൽ പ്രഖ്യാപിച്ച പുതിയ മാറ്റങ്ങൾ പ്രകാരം, തിരിച്ചടയ്ക്കേണ്ടാത്ത ഗ്രാന്റുകളുടെ പരമാവധി തുക 85 ശതമാനത്തിൽ നിന്ന് 25 ശതമാനമായി സർക്കാർ വെട്ടിക്കുറച്ചിരുന്നു. ഇതിനുപകരം വായ്പയായി ലഭിക്കുന്ന തുകയുടെ ശതമാനം വർദ്ധിപ്പിച്ചതാണ് വിദ്യാർത്ഥികളെയും യുവജനങ്ങളെയും പ്രകോപിപ്പിച്ചത്.
ഈ വർഷം ആദ്യം പ്രവിശ്യ ഏഴ് വർഷത്തെ ട്യൂഷൻ ഫ്രീസ് പിൻവലിച്ചതും സ്ഥിതി കൂടുതൽ വഷളാക്കി. പുതിയ തീരുമാനപ്രകാരം സർവകലാശാലകൾക്കും കോളേജുകൾക്കും അടുത്ത മൂന്ന് വർഷത്തേക്ക് ഓരോ വർഷവും രണ്ട് ശതമാനം വരെ ഫീസ് വർദ്ധിപ്പിക്കാൻ അനുവാദമുണ്ട്. ഇതിനെത്തുടർന്ന് കനത്ത സാമ്പത്തിക അനിശ്ചിതത്വവും ഉയർന്ന കടബാധ്യതയും നേരിടേണ്ടിവരുമെന്ന് ചൂണ്ടിക്കാട്ടിയാണ് വിദ്യാർത്ഥികൾ പ്രക്ഷോഭത്തിലേക്ക് തിരിഞ്ഞത്.
വിദ്യാർത്ഥികൾ പ്രതിഷേധം ശക്തമാക്കുമ്പോഴും എടുത്ത തീരുമാനങ്ങളിൽ മാറ്റമില്ലെന്ന നിലപാടിലാണ് സർക്കാർ. പദ്ധതി ദീർഘകാലത്തേക്ക് മുന്നോട്ടുകൊണ്ടുപോകാനാണ് വിഹിതത്തിൽ മാറ്റം വരുത്തിയതെന്ന് കോളേജ്-സർവകലാശാലാ മന്ത്രി നോളൻ ക്വിൻ പറഞ്ഞു. ഉന്നത വിദ്യാഭ്യാസ മേഖലയ്ക്കായി അടുത്ത നാല് വർഷത്തിനുള്ളിൽ 6.4 ബില്യൺ ഡോളറിന്റെ പുതിയ നിക്ഷേപം നടത്തുമെന്നും അദ്ദേഹം വ്യക്തമാക്കി.
Also Read: വിമാനയാത്രക്കാർക്ക് പുതിയ തിരിച്ചടി; ലഗേജ് ഫീസ് ഉയർത്തി പ്രമുഖ എയർലൈൻ
ഈ സാമ്പത്തിക സഹായം വഴി സ്ഥാപനങ്ങൾക്ക് മെച്ചപ്പെട്ട വിദ്യാഭ്യാസവും ആധുനിക സൗകര്യങ്ങളും നൽകാൻ സാധിക്കുമെന്നാണ് സർക്കാർ വാദം. എന്നാൽ സർക്കാരിന്റെ ഈ വിശദീകരണങ്ങൾ അംഗീകരിക്കാൻ വിദ്യാർത്ഥി സംഘടനകളും പ്രതിപക്ഷ പാർട്ടികളും തയ്യാറായിട്ടില്ല. OSAP വെട്ടിക്കുറവുകൾ പൂർണ്ണമായും പിൻവലിക്കണമെന്നും, വിദ്യാർത്ഥി വായ്പകളുടെ പലിശ ഒഴിവാക്കണമെന്നും ആവശ്യപ്പെട്ട് പ്രതിപക്ഷ നേതാക്കളും പ്രതിഷേധങ്ങൾക്ക് പിന്തുണ പ്രഖ്യാപിച്ചിട്ടുണ്ട്.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/GIh0npbq3d1GgGCL00k37z
