മണിക്കൂറുകളോളം ഫോൺ ഉപയോഗിക്കുന്നവരാണോ? ടെക്സ്റ്റ് നെക്ക് സിൻഡ്രോമിനെ നിസാരമാക്കരുത്

സ്മാർട്ട്ഫോൺ ഉപയോഗം വർധിച്ചതോടെ കഴുത്തുവേദനയും അനുബന്ധ ആരോഗ്യപ്രശ്നങ്ങളും നേരിടുന്നവരുടെ എണ്ണവും കൂടുകയാണ്. ഫോൺ നോക്കാനായി ദീർഘനേരം തല താഴ്ത്തിയിരിക്കുന്ന ശീലം കഴുത്തിലെ പേശികൾക്കും സന്ധികൾക്കും സമ്മർദമുണ്ടാക്കുകയും കാലക്രമേണ വേദനയ്ക്കും മറ്റ് അസ്വസ്ഥതകൾക്കും കാരണമാകുകയും ചെയ്യാം. ടെക്സ്റ്റ് നെക്ക് സിൻഡ്രോം എന്നറിയപ്പെടുന്ന ഈ അവസ്ഥ കുട്ടികളിലും മുതിർന്നവരിലും ഒരുപോലെ ശ്രദ്ധിക്കേണ്ട ആരോഗ്യപ്രശ്നമാണെന്ന് വിദഗ്ധർ മുന്നറിയിപ്പ് നൽകുന്നു.

അമിതമായ ഫോൺ ഉപയോഗത്തെത്തുടർന്ന് ചലച്ചിത്രതാരം ഷക്കീലയുടെ കഴുത്തിന് പ്രശ്നമുണ്ടായെന്ന വാർത്തകൾ പുറത്തുവന്നതോടെയാണ് ഈ ആരോഗ്യപ്രശ്നം വീണ്ടും ചർച്ചയായത്. മണിക്കൂറുകളോളം ഒരു വശത്തേക്ക് ചരിഞ്ഞുകിടന്ന് ഫോൺ ഉപയോഗിച്ചിരുന്നതായും തുടർച്ചയായി നാലു മണിക്കൂർ വരെ ഗെയിമുകൾ കളിച്ചിരുന്നതായും താരം വിഡിയോയിൽ വെളിപ്പെടുത്തിയിരുന്നു. തെറ്റായ ശരീരനിലയിൽ ഫോൺ ഉപയോഗിച്ചതിനെത്തുടർന്ന് ശസ്ത്രക്രിയ ആവശ്യമായ അവസ്ഥയിലായെന്നും ഷക്കീല വ്യക്തമാക്കിയിരുന്നു.

ALSO READ: ഓൺലൈൻ ചതിക്കുഴികളിൽ നിന്ന് കുട്ടികളെ രക്ഷിക്കാൻ ന്യൂ ബ്രൺസ്വിക്; കടുത്ത ശിക്ഷയുമായി പുതിയ നിയമം

എന്താണ് ടെക്സ്റ്റ് നെക്ക് സിൻഡ്രോം?

മൊബൈൽ ഫോൺ, ലാപ്ടോപ്, ടാബ്‌ലെറ്റ് തുടങ്ങിയ ഉപകരണങ്ങൾ ഉപയോഗിക്കുമ്പോൾ തല ദീർഘനേരം മുന്നോട്ടും താഴേക്കും കുനിച്ചിരിക്കുന്നതാണ് ടെക്സ്റ്റ് നെക്ക് സിൻഡ്രോമിന് പ്രധാന കാരണം. ഈ ശീലം കഴുത്തിലെ പേശികൾക്കും സന്ധികൾക്കും അമിത സമ്മർദമുണ്ടാക്കുന്നു. ഇതിന്റെ ഫലമായി കഴുത്തുവേദന, പേശികളുടെ മുറുക്കം, ചലനത്തിലെ ബുദ്ധിമുട്ട് തുടങ്ങിയ പ്രശ്നങ്ങൾ ഉണ്ടാകാം.

വിപിഎസ് ലേക്‌ഷോർ ആശുപത്രിയിലെ സീനിയർ ന്യൂറോസർജനായ ഡോ. അരുൺ ഉമ്മൻ പറയുന്നതനുസരിച്ച്, മൊബൈൽ ഫോണിന്റെയും ലാപ്ടോപ്പിന്റെയും സ്ഥിരമായ ഉപയോഗം ഈ അവസ്ഥയ്ക്ക് കാരണമാകാം. കൗമാരക്കാരിലാണ് പ്രധാനമായും പ്രശ്നം കണ്ടുവരുന്നതെങ്കിലും ദീർഘനേരം കംപ്യൂട്ടറിന് മുന്നിലിരുന്ന് ജോലി ചെയ്യുന്നവരിലും ഇത് സാധാരണമാണ്.

കഴുത്തിന്റെ സ്വാഭാവിക വളവിന് മാറ്റമുണ്ടാകുമോ?

തലയുടെ ഭാരം താങ്ങുന്നതിനായി കഴുത്തിന് സ്വാഭാവികമായി മുന്നോട്ടുള്ള ‘C’ ആകൃതിയിലുള്ള വളവുണ്ട്. സെർവിക്കൽ ലോർഡോസിസ് എന്നറിയപ്പെടുന്ന ഈ വളവ് തലയുടെ ഭാരം സന്തുലിതമായി നിലനിർത്താനും കഴുത്തിന്റെ ചലനങ്ങൾ സുഗമമാക്കാനും സഹായിക്കുന്നു.

എന്നാൽ തുടർച്ചയായി തല താഴ്ത്തി ഫോൺ ഉപയോഗിക്കുന്നത് കഴുത്തിലെ പേശികൾക്കും സന്ധികൾക്കും അധികഭാരം നൽകും. ദീർഘകാലം ഈ ശീലം തുടരുന്നത് ചിലരിൽ കഴുത്തിന്റെ സ്വാഭാവിക വളവിൽ മാറ്റങ്ങൾക്കും തേയ്മാന പ്രശ്നങ്ങൾക്കും കാരണമാകാം. തല മുന്നോട്ടേക്ക് നീങ്ങുന്ന അവസ്ഥയുണ്ടാകുന്നതോടെ കഴുത്തുവേദനയും അസ്വസ്ഥതകളും വർധിക്കാം.

അവഗണിക്കരുത് ഈ ലക്ഷണങ്ങൾ

കഴുത്തിൽ തുടർച്ചയായ വേദനയും മുറുക്കവുമാണ് പ്രധാന ലക്ഷണങ്ങൾ. തോളുകളിലും പുറത്തിന്റെ മുകൾഭാഗത്തും വേദന അനുഭവപ്പെടാം. കഴുത്ത് തിരിക്കുമ്പോഴുള്ള ബുദ്ധിമുട്ട്, ഇടയ്ക്കിടെയുള്ള തലവേദന എന്നിവയും ശ്രദ്ധിക്കണം.

ചിലരിൽ കഴുത്തിലെ പേശികൾക്ക് വലിവ് അനുഭവപ്പെടാം. കഴുത്തിൽനിന്ന് കൈകളിലേക്ക് പടരുന്ന വേദന, കൈകളിലെ മരവിപ്പ്, തരിപ്പ്, സൂചികുത്തുന്നതുപോലുള്ള അനുഭവം എന്നിവയും ഉണ്ടാകാം. ഫോൺ ഉപയോഗം കഴിഞ്ഞാൽ വേദന വർധിക്കുന്നതും ഈ പ്രശ്നത്തിന്റെ സൂചനയാകാം.

തെറ്റായ ശരീരനില മാത്രമല്ല കഴുത്തുവേദനയ്ക്ക് കാരണം. വ്യായാമമില്ലായ്മ, ഉറക്കക്കുറവ്, മാനസിക സമ്മർദം തുടങ്ങിയവയും വേദന വർധിപ്പിക്കാം.

ഫോൺ ഉപയോഗിക്കുമ്പോൾ മാറ്റേണ്ട ശീലങ്ങൾ

ഫോൺ ഉപയോഗിക്കുമ്പോൾ തല താഴ്ത്തുന്നതിനു പകരം കണ്ണിന്റെ ഉയരത്തിൽ ഉപകരണം പിടിക്കാൻ ശ്രദ്ധിക്കണം. ഒരേ ഇരിപ്പിൽ മണിക്കൂറുകളോളം തുടരാതെ ഇടയ്ക്കിടെ എഴുന്നേറ്റ് നടക്കണം. കഴുത്തും തോളുകളും ചലിപ്പിക്കുന്നതിനൊപ്പം ഫോൺ ഉപയോഗത്തിനിടയിൽ ചെറിയ ഇടവേളകളും നൽകണം.

ഇരിക്കുമ്പോൾ പുറത്തിന് ആവശ്യമായ താങ്ങ് നൽകണം. തോളുകൾ അയച്ചുവെച്ച് കഴുത്തും നട്ടെല്ലും സ്വാഭാവികമായ നിലയിൽ സൂക്ഷിക്കണം. കിടന്നുകൊണ്ട് കഴുത്ത് വളച്ചോ വലിയ തലയിണയിൽ തല ഉയർത്തിവെച്ചോ ഫോൺ ഉപയോഗിക്കുന്ന ശീലം ഒഴിവാക്കുന്നതാണ് നല്ലത്.

കഴുത്തിലെയും തോളുകളിലെയും പേശികൾക്ക് ശക്തി നൽകുന്ന വ്യായാമങ്ങൾ പതിവാക്കണം. പേശികൾ വലിച്ചുനീട്ടുന്ന പരിശീലനങ്ങളും ഗുണകരമാണ്. വ്യക്തിഗത ആരോഗ്യപ്രശ്നങ്ങളുള്ളവർ വ്യായാമങ്ങൾ തുടങ്ങുന്നതിനു മുമ്പ് വിദഗ്ധരുടെ നിർദേശം തേടണം.

കഴുത്തിന്റെ ആരോഗ്യം സംരക്ഷിക്കാൻ ശ്രദ്ധിക്കാം

ദിവസേനയുള്ള ജീവിതശൈലിയിലും ചില മാറ്റങ്ങൾ ആവശ്യമാണ്. ഉറങ്ങാൻ അനുയോജ്യമായ മെത്തയും തലയിണയും തിരഞ്ഞെടുക്കണം. കംപ്യൂട്ടറും ലാപ്ടോപ്പും കണ്ണിന്റെ ഉയരത്തിൽ ക്രമീകരിക്കണം. ദീർഘനേരം ഇരുന്ന് ജോലി ചെയ്യുന്നവർ ഇടയ്ക്കിടെ എഴുന്നേറ്റ് ശരീരം ചലിപ്പിക്കണം.

വാഹനമോടിക്കുമ്പോഴും ശരിയായ ശരീരനില നിലനിർത്തണം. ഭാരമുള്ള വസ്തുക്കൾ ഉയർത്തുമ്പോൾ ശ്രദ്ധിക്കണം. തലയിൽ ഭാരം ചുമക്കുന്ന ശീലം കഴിയുന്നതും ഒഴിവാക്കുന്നതും കഴുത്തിലെ സമ്മർദം കുറയ്ക്കാൻ സഹായിക്കും.

കഴുത്തുവേദനയ്ക്ക് ചികിത്സ എങ്ങനെ?

കഴുത്തുവേദനയുടെ കാരണം കണ്ടെത്തിയ ശേഷമാണ് ചികിത്സ നിശ്ചയിക്കേണ്ടത്. പേശിവലിവ്, ഡിസ്ക് സംബന്ധമായ പ്രശ്നങ്ങൾ, സന്ധികളുടെ തേയ്മാനം, നാഡീസമ്മർദം എന്നിവയെല്ലാം വേദനയ്ക്ക് കാരണമാകാം.

ലഘുവായ വേദനയ്ക്ക് വിശ്രമം, ചൂടുപ്രയോഗം, ശരിയായ ശരീരനില എന്നിവ ആശ്വാസം നൽകാം. ആവശ്യാനുസരണം ഡോക്ടറുടെ നിർദേശപ്രകാരം വേദനസംഹാരികൾ, മസിൽ റിലാക്സന്റുകൾ, ഫിസിയോതെറാപ്പി, പേശികളുടെ ശക്തി വർധിപ്പിക്കുന്ന വ്യായാമങ്ങൾ എന്നിവയും ചികിത്സയിൽ ഉൾപ്പെടുത്താം.

കൈകളിൽ മരവിപ്പ്, തരിപ്പ്, ബലക്കുറവ്, കൈകളിലേക്ക് പടരുന്ന വേദന തുടങ്ങിയവ അനുഭവപ്പെട്ടാൽ ഡോക്ടറെ സമീപിക്കണം. വേദനയുടെ കാരണം വ്യക്തമാക്കാൻ ആവശ്യാനുസരണം എക്സ്-റേ, എംആർഐ, സിടി സ്കാൻ, നാഡീപരിശോധനകൾ എന്നിവ നടത്താം.

നാഡീസമ്മർദം ഉൾപ്പെടെയുള്ള ഗുരുതരമായ പ്രശ്നങ്ങൾ കണ്ടെത്തുന്ന അപൂർവ സാഹചര്യങ്ങളിൽ മാത്രമാണ് ശസ്ത്രക്രിയ ആവശ്യമായി വരുന്നത്.

സ്മാർട്ട്ഫോൺ പൂർണമായി ഉപേക്ഷിക്കേണ്ടതില്ല. എന്നാൽ എത്രനേരം ഉപയോഗിക്കുന്നു എന്നതിനൊപ്പം ഏത് രീതിയിൽ ഉപയോഗിക്കുന്നു എന്നതും പ്രധാനമാണ്. തല താഴ്ത്തി ദീർഘനേരം ഫോൺ നോക്കുന്ന ശീലം ഒഴിവാക്കി ശരിയായ ശരീരനിലയും ഇടവേളകളും പാലിക്കുന്നത് കഴുത്തിന്റെ ആരോഗ്യം സംരക്ഷിക്കാൻ സഹായിക്കും.

കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/GIh0npbq3d1GgGCL00k37z