കൊച്ചി: വിവാഹിതയാകാൻ പോകുന്നുവെന്ന സന്തോഷവാർത്ത പങ്കുവെച്ചതിന് പിന്നാലെ വരനെ പരിചയപ്പെടുത്തി ഗായിക റിമി ടോമി. തന്റെ ജിം ട്രെയിനറും ബോഡി ബിൽഡറുമായ ലിബിൻ മാത്യുവാണ് വരനെന്ന് റിമി തന്റെ യൂട്യൂബ് ചാനലിലൂടെയാണ് വെളിപ്പെടുത്തിയത്. നവംബർ 14-ന് മുംബൈ ഡോംബിവല്ലി മാർത്തോമ പള്ളിയിൽ വെച്ചാണ് വിവാഹം.
മാർച്ചിലാണ് ഇരുവരും ആദ്യമായി കണ്ടുമുട്ടിയതെന്നും എന്നാൽ കാണുന്നതിന് മുൻപ് തന്നെ വിവാഹത്തെക്കുറിച്ചുള്ള തീരുമാനത്തിലേക്ക് എത്തിയിരുന്നുവെന്നും റിമി പറഞ്ഞു. മലയാളി കൂടിയായ ലിബിൻ മാത്യുവിനൊപ്പം ജീവിക്കുമ്പോൾ വലിയ സമാധാനവും പോസിറ്റിവിറ്റിയും ലഭിക്കുന്നുണ്ടെന്നും, എന്തുവന്നാലും കൂടെയുണ്ടാകുമെന്ന ഉറപ്പാണ് നൽകുന്നതെന്നും താരം വ്യക്തമാക്കി.
വിവാഹത്തിന് ശേഷം കൂടുതൽ സമയവും മുംബൈയിലായിരിക്കുമെന്നും ആരാധകരുടെ സ്നേഹവും പ്രാർത്ഥനയും ഒപ്പമുണ്ടാകണമെന്നും റിമി അഭ്യർത്ഥിച്ചു. അഭ്യൂഹങ്ങൾ ഒഴിവാക്കാനാണ് വിശേഷങ്ങൾ നേരിട്ട് പങ്കുവെച്ചതെന്നും താരം കൂട്ടിച്ചേർത്തു.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/GIh0npbq3d1GgGCL00k37z
