പുണെ: ഇന്ത്യന്‍ സൂപ്പര്‍ ലീഗ് (ഐഎസ്എല്‍) പുതിയ സീസണിലെ ആദ്യ മത്സരത്തില്‍ ഇന്റര്‍ കാശിക്കെതിരെ കേരള ബ്ലാസ്റ്റേഴ്‌സിന് 2-0ന്റെ തകര്‍പ്പന്‍ ജയം. ഞായറാഴ്ച നടന്ന മത്സരത്തില്‍ വിബിന്‍ മോഹനനും ആന്ദ്രേ ഗ്രീനുമാണ് ബ്ലാസ്റ്റേഴ്‌സിനായി ഗോള്‍ നേടിയത്. 18-ാം മിനിറ്റില്‍ വിബിന്‍ ആദ്യ ഗോള്‍ നേടിയപ്പോള്‍, ഇഞ്ചുറി ടൈമിന്റെ നാലാം മിനിറ്റില്‍ ഗ്രീന്‍ രണ്ടാം ഗോളും നേടി.
മത്സരത്തിന്റെ തുടക്കത്തില്‍ തന്നെ ബ്ലാസ്റ്റേഴ്‌സ് ആക്രമണം ശക്തമാക്കി. അഞ്ചാം മിനിറ്റില്‍ ഫ്രെഡി ലല്ലാവ്മാവ്മയുടെ ദൂരത്തുനിന്നുള്ള ഷോട്ട് ഇന്റര്‍ കാശി പ്രതിരോധത്തെ പരീക്ഷിച്ചു. തൊട്ടടുത്ത മിനിറ്റില്‍ റോസന്‍ബര്‍ഗ് ഗബ്രിയേലിന്റെ ഷോട്ട് ബ്ലാസ്റ്റേഴ്‌സ് ഗോള്‍കീപ്പര്‍ അര്‍ഷ് ഷെയ്ഖ് തടഞ്ഞു. മണവീര്‍ സിങ്ങും ഇന്റര്‍ കാശിക്കായി അവസരങ്ങള്‍ സൃഷ്ടിച്ചു.
18-ാം മിനിറ്റില്‍ കൊറൗ സിങ്ങിന്റെ പാസില്‍നിന്നാണ് വിബിന്‍ മോഹനന്‍ ബ്ലാസ്റ്റേഴ്‌സിന്റെ ആദ്യ ഗോള്‍ നേടിയത്. രണ്ടാം പകുതിയിലും ബ്ലാസ്റ്റേഴ്‌സ് ലീഡ് ഉയര്‍ത്താന്‍ ശ്രമിച്ചു. പകരക്കാരനായി ഇറങ്ങിയ മോമോ യന്‍സാനെയുടെ ഷോട്ട് ലക്ഷ്യം കണ്ടില്ല. 65-ാം മിനിറ്റില്‍ ആന്ദ്രേ ഗ്രീനിനും ഗോള്‍ നേടാനുള്ള അവസരം ലഭിച്ചെങ്കിലും ഷോട്ട് പുറത്തുപോയി.
ALSO READ: ഐഎസ്എല്ലിൽ കേരള ബ്ലാസ്റ്റേഴ്‌സ് ഇന്നിറങ്ങുന്നു; എതിരാളികൾ ഇന്റർ കാശി
മറുവശത്ത്, ഇന്റര്‍ കാശിയും സമനില ഗോളിനായി ശ്രമിച്ചു. 61-ാം മിനിറ്റില്‍ മണവീര്‍ സിങ്ങിന്റെ ഹെഡര്‍ അര്‍ഷ് ഷെയ്ഖ് തടഞ്ഞു. 72-ാം മിനിറ്റില്‍ ആയുഷ് ഛിക്കാരയുടെ ഷോട്ട് നേരിയ വ്യത്യാസത്തില്‍ പുറത്തുപോയി.
ഇഞ്ചുറി ടൈമിന്റെ നാലാം മിനിറ്റിലാണ് ബ്ലാസ്റ്റേഴ്‌സ് വിജയം ഉറപ്പിച്ച രണ്ടാം ഗോള്‍ നേടിയത്. മുഹമ്മദ് സനാന്റെ പാസില്‍നിന്ന് ഗ്രീന്‍ ഇടതുകാലുകൊണ്ട് പന്ത് വലയുടെ വലതുകോണിലേക്ക് എത്തിച്ചു. ഇതോടെ ബ്ലാസ്റ്റേഴ്‌സ് സീസണിന് വിജയത്തുടക്കമിട്ടു.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/GIh0npbq3d1GgGCL00k37z
‘Kerala Blasters Beat Inter Kashi 2-0 in ISL Opener’
