ക്യുബെക് തിരഞ്ഞെടുപ്പ് പൂർത്തിയായി: കേവലഭൂരിപക്ഷം ലക്ഷ്യമിട്ട് പാർട്ടി ക്യുബെക്കോയിസ്

മോൺട്രിയൽ: ക്യുബെക് പ്രവിശ്യയിലെ പുതിയ സർക്കാരിനെ തിരഞ്ഞെടുക്കുന്നതിനുള്ള പോളിംഗ് ഇന്ന് (ഒക്ടോബർ 5-ന്) പൂർത്തിയായി. പ്രവിശ്യയിലാകെ 127 മണ്ഡലങ്ങളിലായി വോട്ടർമാർ ജനവിധി രേഖപ്പെടുത്തി. കഴിഞ്ഞ രണ്ട് തവണയായി അധികാരത്തിലുള്ള കോയലിഷൻ അവനിർ ക്യുബെക് (CAQ) സർക്കാരിന് തിരിച്ചടിയായി പാർട്ടി ക്യുബെക്കോയിസ് (PQ) സർവേകളിൽ മുന്നിലെത്തിയതാണ് ഇത്തവണത്തെ വോട്ടെടുപ്പിനെ നിർണായകമാക്കുന്നത്.

പാർട്ടി ക്യുബെക്കോയിസ് നേതാവ് പോൾ സെന്റ്-പിയർ പ്ലാമോണ്ടൻ, CAQ നേതാവ് ക്രിസ്റ്റിൻ ഫ്രെഷെറ്റ്, ക്യുബെക് ലിബറൽ പാർട്ടി നേതാവ് ചാൾസ് മില്ലിയാർഡ്, ക്യുബെക് സൊലിഡയർ സഹനേതാവ് റൂബ ഗസാൽ, കൺസർവേറ്റീവ് പാർട്ടി നേതാവ് എറിക് ഡുഹൈം എന്നിവരാണ് മത്സരരംഗത്തുള്ള പ്രധാനികൾ. വോട്ടെടുപ്പ് പൂർത്തിയായതോടെ പ്രവിശ്യയിൽ പുതിയ ഭരണമാറ്റമുണ്ടാകുമോ എന്നാണ് രാജ്യം ഉറ്റുനോക്കുന്നത്. എലക്ഷൻസ് ക്യുബെക്കിന്റെ കണക്കുകൾ പ്രകാരം നാലിലൊന്ന് വോട്ടർമാർ മുൻകൂർ വോട്ടെടുപ്പിലൂടെ തന്നെ വോട്ട് രേഖപ്പെടുത്തിയിരുന്നു.

ക്യുബെക്കിന്റെ സ്വാതന്ത്ര്യത്തെക്കുറിച്ചുള്ള ജനഹിതപരിശോധന, ജീവിതച്ചെലവ് വർധന, സാമ്പത്തിക പ്രതിസന്ധി, ഭവനക്ഷാമം എന്നിവയായിരുന്നു ഈ തിരഞ്ഞെടുപ്പിലെ പ്രധാന ചർച്ചാവിഷയങ്ങൾ. തങ്ങൾ അധികാരത്തിലെത്തിയാൽ പ്രവിശ്യയുടെ സ്വയംഭരണത്തിനായി ജനഹിതപരിശോധന നടത്തുമെന്ന് PQ നേതാവ് പ്ലാമോണ്ടൻ വാഗ്ദാനം ചെയ്തിട്ടുണ്ട്. എന്നാൽ 2029-ൽ അമേരിക്കൻ പ്രസിഡന്റ് ഡൊണാൾഡ് ട്രംപ് സ്ഥാനം ഒഴിയുന്നതിന് മുമ്പ് അത്തരമൊരു നീക്കം ഉണ്ടാകില്ലെന്നും അദ്ദേഹം വ്യക്തമാക്കി.

ആദ്യമായി വീട് വാങ്ങുന്നവർക്ക് നികുതി ഇളവ്, വാടക നിയന്ത്രണം, നിർമാണ നടപടിക്രമങ്ങൾ ലളിതമാക്കൽ തുടങ്ങിയ വാഗ്ദാനങ്ങളാണ് പാർട്ടികൾ മുന്നോട്ടുവെച്ചത്. എന്നാൽ ഈ പദ്ധതികൾ നിലവിലെ ഭവന പ്രതിസന്ധിക്ക് ഉടനടി പരിഹാരമാകില്ലെന്ന് മക്ഗിൽ സർവകലാശാലയിലെ അഫോർഡബിൾ ഹൗസിംഗ് പ്രോഗ്രാം ഡയറക്ടർ അവൈഡ് ഫ്രീഡ്മാൻ പറഞ്ഞു. സർക്കാരുകൾ സാമൂഹിക ഭവന നിർമാണ പദ്ധതികളിലേക്ക് ശക്തമായി മടങ്ങിയെത്തിയാൽ മാത്രമേ ദീർഘകാലാടിസ്ഥാനത്തിൽ ഇതിന് പരിഹാരമാകൂ എന്നും അദ്ദേഹം കൂട്ടിച്ചേർത്തു.

നിയമസഭയിൽ അംഗീകൃത പാർലമെന്ററി ഗ്രൂപ്പായി മാറുകയാണ് പാർട്ടിയുടെ ലക്ഷ്യമെന്ന് കൺസർവേറ്റീവ് നേതാവ് എറിക് ഡുഹൈം പറഞ്ഞു. താൻ തികഞ്ഞ ആത്മവിശ്വാസത്തിലാണെന്നും അദ്ദേഹം വ്യക്തമാക്കി. അതേസമയം പ്രോഗ്രസീവ് വേർപിരിയൽ വാദികൾ തങ്ങളെ പിന്തുണയ്ക്കണമെന്ന് ക്യുബെക് സൊലിഡയർ നേതാവ് റൂബ ഗസാൽ അഭ്യർത്ഥിച്ചു. ലിബറൽ പാർട്ടി വരുന്നത് രാഷ്ട്രീയമായി പിന്നോട്ടുള്ള ചുവടുവയ്പ്പായിരിക്കുമെന്നും ഗസാൽ മുന്നറിയിപ്പ് നൽകി.

Also Read: ഫ്ലൈദുബായ് സഹപൈലറ്റിന് ഓസ്‌ട്രേലിയയുമായി ബന്ധമുണ്ടോ? അന്വേഷണം ആരംഭിച്ച് പൊലീസ്

ലഭിക്കുന്ന വോട്ടുശതമാനം സീറ്റുകളാക്കി മാറ്റുന്നതിൽ തിരിച്ചടി നേരിട്ടേക്കാമെന്ന് നിലവിലെ ഭരണകക്ഷിയായ CAQ തലവൻ ക്രിസ്റ്റിൻ ഫ്രെഷെറ്റ് സമ്മതിച്ചു. PQ അധികാരത്തിൽ വന്നാൽ വലിയ രാഷ്ട്രീയ തർക്കങ്ങൾ ഉണ്ടാകുമെന്ന് ലിബറൽ നേതാവ് ചാൾസ് മില്ലിയാർഡ് മുന്നറിയിപ്പ് നൽകി. വോട്ടെണ്ണൽ പുരോഗമിക്കുമ്പോൾ വ്യക്തമായ ഭൂരിപക്ഷം ലഭിക്കുമെന്ന പ്രതീക്ഷയിലാണ് PQ പ്രവർത്തകർ.

കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/BtwqAqvdF2uKsGDzfK81Nq