ടൊറന്റോ: വ്യാജ വിവരങ്ങളും രേഖകളും നൽകി വാഹനങ്ങൾ രജിസ്റ്റർ ചെയ്യുകയും, ടോൾ അടക്കാതെ ലക്ഷക്കണക്കിന് ഡോളറിന്റെ തട്ടിപ്പ് നടത്തുകയും ചെയ്ത സംഭവത്തിൽ നാല് പേർ അറസ്റ്റിൽ. പീൽ റീജിയണൽ പൊലീസാണ് പ്രതികളെ പിടികൂടിയത്. കാനഡയിലെ പ്രധാന പാതയായ 407 ഇ.ടി.ആർ (ETR) ടോൾ റോഡിൽ നിന്ന് മാത്രം ഒരു ലക്ഷത്തിലധികം കനേഡിയൻ ഡോളറാണ് (100,000 CAD) ഇവർ വെട്ടിച്ചത്.
‘പ്രൊജക്റ്റ് ഒക്ടേൻ’ (Project Octane) എന്ന പേരിൽ 2026 മേയിലാണ് പൊലീസിന്റെ പ്രത്യേക സംഘം അന്വേഷണം ആരംഭിച്ചത്. ഗതാഗത മന്ത്രാലയം, 407 ഇ.ടി.ആർ അധികൃതർ എന്നിവരുമായി സഹകരിച്ചായിരുന്നു പീൽ പൊലീസിന്റെ അന്വേഷണം. സർവീസ് ഒന്റാറിയോയുടെ (Service Ontario) വിവിധ കേന്ദ്രങ്ങൾ വഴി വ്യാജ രേഖകൾ സമർപ്പിച്ച് വാഹനങ്ങൾ രജിസ്റ്റർ ചെയ്യുകയായിരുന്നു സംഘത്തിന്റെ പ്രധാന പ്രവർത്തന രീതി.
നിലവിലില്ലാത്ത വ്യാജ കമ്പനികളുടെ പേരിലാണ് പ്രതികൾ വാഹനങ്ങളും നമ്പർ പ്ലേറ്റുകളും രജിസ്റ്റർ ചെയ്തിരുന്നതെന്ന് പൊലീസ് വ്യക്തമാക്കി. ഇത് കാരണം ടോൾ പ്ലാസകളിലും പാർക്കിംഗ് കേന്ദ്രങ്ങളിലും ഉയർന്ന തുകകൾ കുടിശ്ശിക വരുത്തിയാലും നിയമനടപടികളിൽ നിന്നും ഉത്തരവാദിത്തങ്ങളിൽ നിന്നും പ്രതികൾക്ക് എളുപ്പത്തിൽ തടിയൂരാൻ സാധിച്ചിരുന്നു. തട്ടിപ്പ്, വ്യാജരേഖ ചമയ്ക്കൽ, കുറ്റകൃത്യത്തിലൂടെ നേടിയ സ്വത്ത് കൈവശം വെക്കൽ തുടങ്ങിയ ഗുരുതരമായ കുറ്റങ്ങളാണ് അറസ്റ്റിലായവർക്കെതിരെ ചുമത്തിയിരിക്കുന്നത്.
അന്വേഷണത്തിനിടയിൽ മോഷണം പോയ 10 ആഡംബര വാഹനങ്ങളും പൊലീസ് സംഘം കണ്ടെടുത്തു. വ്യാജ വിൻ (VIN – Vehicle Identification Number) നമ്പറുകൾ പതിച്ച് ഉപയോഗിച്ചിരുന്ന ഈ വാഹനങ്ങൾക്ക് വിപണിയിൽ ഏകദേശം 7,50,000 ഡോളർ (ഏകദേശം 4.5 കോടിയിലധികം ഇന്ത്യൻ രൂപ) വിലമതിക്കുമെന്ന് ഉദ്യോഗസ്ഥർ വ്യക്തമാക്കി.
പൊതു സംവിധാനങ്ങളെയും ലൂപ്പ്ഹോളുകളെയും ദുരുപയോഗം ചെയ്ത് ക്രിമിനൽ പ്രവർത്തനങ്ങൾ നടത്തിയ വലിയൊരു സംഘത്തെയാണ് ഈ അന്വേഷണത്തിലൂടെ വലയിലാക്കാൻ സാധിച്ചതെന്ന് പീൽ റീജിയണൽ പൊലീസ് ഡെപ്യൂട്ടി ചീഫ് നിക് മിലിനോവിച്ച് പറഞ്ഞു. മോഷ്ടിച്ച 10 വാഹനങ്ങൾ പിടിച്ചെടുത്തത് വാഹന മോഷണ സംഘങ്ങൾക്ക് വലിയ തിരിച്ചടിയാണെന്നും, ഇത്തരം ക്രിമിനൽ ശൃംഖലകൾക്കെതിരെ ശക്തമായ നടപടികൾ തുടരുമെന്നും അദ്ദേഹം കൂട്ടിച്ചേർത്തു.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/BtwqAqvdF2uKsGDzfK81Nq
