ഓട്ടവ: കാനഡയിൽ നിന്നുള്ള ചില ഉൽപ്പന്നങ്ങൾ യുഎസ് വിപണിയിലെത്തുന്നത് തടയാൻ പ്രഖ്യാപിച്ച പുതിയ നിയന്ത്രണങ്ങൾ ചൊവ്വാഴ്ച (സെപ്റ്റംബർ 29) മുതൽ പ്രാബല്യത്തിൽ വരും. തെരഞ്ഞെടുത്ത മദ്യ ഉല്പ്പന്നങ്ങള്, വേ പ്രോട്ടീന്, ചില പാലുല്പ്പന്നങ്ങള്, മോളാസിസ്, മോട്ടോര്സൈക്കിളുകള് എന്നിവയാണ് പുതിയ നിയന്ത്രണങ്ങളുടെ പരിധിയില് വരുന്നത്.
ബിയര്, വൈന്, വിസ്കി, ബര്ബണ്, റം, വോഡ്ക, വെര്മൗത്ത്, ടെകീല, മെസ്കല്, ബ്രാന്ഡി തുടങ്ങിയ മദ്യ ഉല്പ്പന്നങ്ങള് വിലക്കില് ഉള്പ്പെടും. കഴിഞ്ഞ വര്ഷം ഏകദേശം 120 കോടി യുഎസ് ഡോളറിന്റെ മദ്യ ഉല്പ്പന്നങ്ങളാണ് കാനഡ യുഎസിലേക്ക് കയറ്റുമതി ചെയ്തത്.
കാനഡയില് പ്രതിവര്ഷം ഉല്പ്പാദിപ്പിക്കുന്ന ഏകദേശം 200 കോടി ഡോളറിന്റെ സ്പിരിറ്റുകളില് പകുതിയോളം യുഎസ് വിപണിയിലാണ് വിറ്റഴിക്കുന്നത്. 50 ശതമാനം യുഎസ് തീരുവ നിലവില് വന്നതോടെ അമേരിക്കന് വിപണിയില് കനേഡിയന് ഉല്പ്പന്നങ്ങള്ക്ക് മത്സരിക്കാന് ബുദ്ധിമുട്ടുണ്ടായതായി നിര്മാതാക്കള് പറയുന്നു.
ചീസ് നിര്മാണത്തിന്റെ ഉപോല്പ്പന്നമായ വേയുടെ ചില വിഭാഗങ്ങള്ക്കും നിയന്ത്രണമുണ്ട്. പ്രോട്ടീന് ഉല്പ്പന്നങ്ങള്, സ്പോര്ട്സ് പോഷകാഹാര ഉല്പ്പന്നങ്ങള്, ഭക്ഷ്യനിര്മാണം എന്നിവയില് വേ വ്യാപകമായി ഉപയോഗിക്കുന്നുണ്ട്. കഴിഞ്ഞ വര്ഷം യുഎസിലേക്ക് ഇറക്കുമതി ചെയ്ത ഏകദേശം 7.3 കോടി ഡോളറിന്റെ ജനറല്, മോഡിഫൈഡ് വേയില് പകുതിയോളം കാനഡയില് നിന്നായിരുന്നു.
കരിമ്പില് നിന്നുള്ള മോളാസിസും മറ്റ് ചില മോളാസിസ് ഉല്പ്പന്നങ്ങളും വിലക്കില് ഉള്പ്പെടും. വിലകുറഞ്ഞ വിദേശ ഉല്പ്പന്നങ്ങള് യുഎസ് നിര്മാതാക്കളെ ബാധിക്കുന്നുവെന്ന അമേരിക്കന് പഞ്ചസാര ഉല്പ്പാദകരുടെ വാദത്തിന് പിന്നാലെയാണ് നടപടി. കാനഡയിലെ ചില റിഫൈനറികള് അസംസ്കൃത പഞ്ചസാര, മോളാസിസ്, വെള്ളം എന്നിവ അടങ്ങിയ മിശ്രിതങ്ങള് ഇറക്കുമതി ചെയ്ത് തീരുവയും ക്വാട്ടയും ഒഴിവാക്കാന് മോളാസിസ് എന്ന പേരില് വിപണനം ചെയ്യുന്നതായും യുഎസ് അധികൃതര് ആരോപിച്ചിരുന്നു.
മോട്ടോര്സൈക്കിളുകളുടെ കാര്യത്തില് കാനഡയുടെ ആകെ കയറ്റുമതിയിലെ ആഘാതം താരതമ്യേന കുറവാണ്. 2025-ല് ഏകദേശം 5,092 മോട്ടോര്സൈക്കിളുകളാണ് കാനഡയില് നിന്ന് യുഎസിലേക്ക് കയറ്റുമതി ചെയ്തത്. അതേസമയം, ക്യുബെക് ആസ്ഥാനമായുള്ള BRP-യുടെ ചില മോഡലുകളെയും പുതിയ നിയന്ത്രണം ബാധിക്കും. വാല്ക്കോര്ട്ടില് നിര്മിക്കുന്ന Can-Am Spyder, Can-Am Canyon എന്നീ മൂന്ന് ചക്ര റോഡ്സ്റ്റര് മോഡലുകള് യുഎസ് വിപണിയില് പ്രവേശിപ്പിക്കില്ലെന്ന് കമ്പനി അറിയിച്ചു. നിലവിലെ സീസണിലെ ഭൂരിഭാഗം ഉല്പ്പാദനവും കയറ്റുമതിയും ഇതിനകം പൂര്ത്തിയായതിനാല് ഇപ്പോഴത്തെ സാമ്പത്തിക ആഘാതം കുറവായിരിക്കുമെന്ന് BRP വ്യക്തമാക്കി.
പുതിയ നിയന്ത്രണങ്ങള് കാനഡയുടെ സമ്പദ്വ്യവസ്ഥയില് വലിയ ആഘാതം സൃഷ്ടിക്കില്ലെന്നാണ് സാമ്പത്തിക വിദഗ്ധരുടെ വിലയിരുത്തല്. കാരണം, വിലക്ക് ബാധിക്കുന്ന ഉല്പ്പന്നങ്ങളുടെ കയറ്റുമതി കാനഡയുടെ ആകെ യുഎസ് കയറ്റുമതിയുടെ ചെറിയൊരു ഭാഗമാണ്. എന്നാല് ബാധിക്കപ്പെടുന്ന വ്യവസായങ്ങള്ക്ക് തിരിച്ചടി ശക്തമായേക്കാം. കാനഡയും യുഎസും തമ്മിലുള്ള വ്യാപാര തര്ക്കം തുടരുന്നതിനിടെയാണ് പുതിയ നിയന്ത്രണങ്ങള് വരുന്നത്. സെപ്റ്റംബര് 8 മുതല് 2760 കോടി ഡോളറിന്റെ യുഎസ് ഉല്പ്പന്നങ്ങള്ക്ക് കാനഡ 15, 25, 50 ശതമാനം വരെ തിരിച്ചുതീരുവ ഏര്പ്പെടുത്തിയിരുന്നു. ഇതോടെ പുതിയ നിയന്ത്രണങ്ങള് കാനഡ-യുഎസ് വ്യാപാര തര്ക്കത്തില് മറ്റൊരു സമ്മര്ദത്തിലേക്ക് വഴിവെച്ചിരിക്കുകയാണ്.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/BtwqAqvdF2uKsGDzfK81Nq
‘US to Ban Canadian Products’
