വൻകൂവർ: മെക്സിക്കോയിൽനിന്ന് വൻകൂവറിലേക്കുള്ള വിമാനയാത്രയ്ക്കിടെ ചെക്ക്-ഇൻ ബാഗേജിൽ സൂക്ഷിച്ചിരുന്ന സ്വർണാഭരണങ്ങൾ നഷ്ടപ്പെട്ട സംഭവത്തിൽ യാത്രക്കാരിക്ക് നഷ്ടപരിഹാരം നൽകാൻ എയർലൈൻ കമ്പനിയോട് ഉത്തരവിട്ട് ബ്രിട്ടീഷ് കൊളംബിയ (B.C.) സിവിൽ റെസല്യൂഷൻ ട്രിബ്യൂണൽ. ഫ്ലെയർ എയർലൈൻസിൽ (Flair Airlines) യാത്ര ചെയ്ത ഹെൻറിയറ്റ് ടാംസ് എന്ന വനിതയ്ക്കാണ് ട്രിബ്യൂണൽ അനുകൂല വിധി പുറപ്പെടുവിച്ചത്. നഷ്ടപരിഹാരവും നടപടിക്രമങ്ങളുടെ ഫീസും ഉൾപ്പെടെ മൊത്തം 606.18 കനേഡിയൻ ഡോളർ നൽകാനാണ് ട്രിബ്യൂണൽ അംഗം അമാൻഡ ബിന്നി ഉത്തരവിട്ടിരിക്കുന്നത്.
2024 ഫെബ്രുവരിയിലായിരുന്നു കേസിനാസ്പദമായ സംഭവം.വൻകൂവറിൽ വിമാനമിറങ്ങി പിറ്റേന്ന് രാവിലെ ബാഗ് തുറന്നു പരിശോധിച്ചപ്പോഴാണ് വീണ്ടും അടുക്കിവെച്ച നിലയിലും അതിലുണ്ടായിരുന്ന ആഭരണ പൗച്ച് കാണാതായതായും ടാംസ് തിരിച്ചറിഞ്ഞത്. ഒമ്പത് ആഭരണങ്ങൾ അടങ്ങിയ പൗച്ചിന് 868.73 ഡോളർ മൂല്യമുണ്ടെന്ന് അവർ അവകാശപ്പെട്ടെങ്കിലും, രസീതുകളോ മറ്റ് തെളിവുകളോ ഹാജരാക്കാൻ അവർക്ക് സാധിച്ചിരുന്നില്ല. തുടർന്ന് വിമാനക്കമ്പനിയെ സമീപിച്ചെങ്കിലും കൃത്യമായ ബില്ലുകളോ രേഖകളോ ഇല്ലെന്ന കാരണം പറഞ്ഞ് എയർലൈൻ നഷ്ടപരിഹാര അപേക്ഷ നിരസിക്കുകയായിരുന്നു.
വിലപിടിപ്പുള്ള വസ്തുക്കൾ ചെക്ക്-ഇൻ ബാഗേജിൽ കൊണ്ടുപോകാൻ പാടില്ലെന്ന രാജ്യാന്തര വ്യവസ്ഥ ചൂണ്ടിക്കാട്ടിയാണ് എയർലൈൻ ട്രിബ്യൂണലിൽ വാദിച്ചത്. കൂടാതെ വിമാനത്താവള ജീവനക്കാരോ മറ്റ് യാത്രക്കാരോ ആകാം ഇതിന് ഉത്തരവാദികളെന്നും കമ്പനി വാദിച്ചു. എന്നാൽ, ഇത്തരം നിയമങ്ങൾ മുൻകൂട്ടി യാത്രക്കാരിയെ അറിയിച്ചതിനോ തങ്ങളുടെ വ്യവസ്ഥാ രേഖകൾക്കോ (Tariff) തെളിവ് ഹാജരാക്കാൻ കമ്പനിക്ക് കഴിഞ്ഞില്ലെന്ന് ട്രിബ്യൂണൽ ചൂണ്ടിക്കാട്ടി. ‘കാര്യേജ് ബൈ എയർ ആക്ട്’, ‘മോൺട്രിയൽ കൺവെൻഷൻ’ എന്നിവ പ്രകാരം രജിസ്റ്റർ ചെയ്ത ബാഗേജുകൾ കമ്പനിയുടെ മേൽനോട്ടത്തിലിരിക്കുമ്പോൾ നഷ്ടപ്പെട്ടാൽ അതിന്റെ പൂർണ്ണ ഉത്തരവാദിത്തം എയർലൈനിനാണെന്ന് ട്രിബ്യൂണൽ വ്യക്തമാക്കി.
ആഭരണങ്ങളുടെ യഥാർത്ഥ മൂല്യം തെളിയിക്കുന്ന രേഖകൾ ഇല്ലാത്തതിനാൽ, വ്യക്തിക്ക് അർഹമായതിലും കൂടുതൽ തുക ലഭിക്കാൻ പാടില്ലെന്ന ‘ബെറ്റർമെന്റ്’ (Betterment) എന്ന നിയമതത്വം പരിഗണിച്ചാണ് ട്രിബ്യൂണൽ നഷ്ടപരിഹാരം 500 ഡോളറായി നിജപ്പെടുത്തിയത്. ഇതിനൊപ്പം മുൻകാല പലിശയായി 38.68 ഡോളറും ട്രിബ്യൂണൽ ഫീസായ 67.50 ഡോളറും ചേർത്ത് ആകെ 606.18 ഡോളർ ഹെൻറിയറ്റ് ടാംസിന് കൈമാറാൻ ഉത്തരവിടുകയായിരുന്നു.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/BtwqAqvdF2uKsGDzfK81Nq
