ഊർജ സ്രോതസ്സുകൾ വൈവിധ്യവത്കരിക്കുന്നതിന്റെ ഭാഗമായി കാനഡയിൽ നിന്നുള്ള ദ്രവീകൃത പ്രകൃതിവാതകം (LNG) കൂടുതൽ അളവിൽ വാങ്ങാൻ രാജ്യം തയ്യാറാണെന്ന് ജർമൻ വിദേശകാര്യ മന്ത്രി ജോഹാൻ വാഡെഫുൾ വ്യക്തമാക്കി. സി.ടി.വി ‘ക്വസ്റ്റ്യൻ പീരിയഡ്’ അഭിമുഖത്തിൽ സംസാരിക്കവെ, കനേഡിയൻ എൽ.എൻ.ജിക്ക് യൂറോപ്പിൽ ഉറപ്പായും വിപണിയുണ്ടെന്ന് അദ്ദേഹം പറഞ്ഞു. യുക്രൈനിലെ റഷ്യൻ അധിനിവേശം മാത്രമല്ല, ഹോർമുസ് കടലിടുക്കിലും ബാബ്-എൽ-മന്ദെബിലും നിലനിൽക്കുന്ന സംഘർഷങ്ങൾ കാരണം വിതരണ ശൃംഖലകൾ വലിയ ഭീഷണി നേരിടുകയാണെന്നും, അതിനാൽ ഊർജ സ്രോതസ്സുകൾ വൈവിധ്യവത്കരിക്കേണ്ടത് അനിവാര്യമാണെന്നും അദ്ദേഹം ചൂണ്ടിക്കാട്ടി. റഷ്യൻ വാതക ആശ്രയത്വം കുറയ്ക്കാൻ ലക്ഷ്യമിട്ട് ആഫ്രിക്കൻ രാജ്യങ്ങളിലേക്കും നൈജീരിയ, കാനഡ, അമേരിക്ക എന്നിവിടങ്ങളിലേക്കുമാണ് ജർമനി ഇപ്പോൾ ശ്രദ്ധ കേന്ദ്രീകരിക്കുന്നത്.
പുനരുപയോഗ ഊർജ സംവിധാനങ്ങളിലേക്ക് രാജ്യം വേഗത്തിൽ മാറിക്കൊണ്ടിരിക്കുകയാണെങ്കിലും, അത് കാനഡയുമായുള്ള പരമ്പരാഗത എൽ.എൻ.ജി വ്യാപാരത്തെ ബാധിക്കില്ലെന്ന് വാഡെഫുൾ കൂട്ടിച്ചേർത്തു. സമ്പൂർണ്ണ ഹരിതോർജത്തിലേക്കുള്ള മാറ്റത്തിന് ഇനിയും സമയമെടുക്കുമെന്നതിനാൽ വാതകം ഇപ്പോഴും ഒരു അത്യന്താപേക്ഷിത സ്രോതസ്സാണ്. അതേസമയം, ഹരിതോർജ സാങ്കേതികവിദ്യയിലും ഇരുരാജ്യങ്ങൾക്കും സഹകരിക്കാവുന്ന മേഖലകളുണ്ട്. മുൻ പ്രധാനമന്ത്രി ജസ്റ്റിൻ ട്രൂഡോയുടെ ഭരണകാലത്ത് ഒപ്പുവെച്ച 2022-ലെ ‘കാനഡ-ജർമനി ഹൈഡ്രജൻ സഖ്യം’ 2025-ൽ കയറ്റുമതി ആരംഭിക്കാനായിരുന്നു ലക്ഷ്യമിട്ടിരുന്നതെങ്കിലും പദ്ധതി വൈകുകയാണ് ഉണ്ടായത്. എന്നിരുന്നാലും, ഇരു സർക്കാരുകളും ഈ സഹകരണത്തിന് തുടർന്നും പിന്തുണ പ്രഖ്യാപിച്ചിട്ടുണ്ട്.
കനേഡിയൻ എൽ.എൻ.ജി വാങ്ങാൻ ഗ്രീസ്, പോളണ്ട് തുടങ്ങിയ യൂറോപ്യൻ രാജ്യങ്ങൾ നേരത്തെ തന്നെ സന്നദ്ധത പ്രകടിപ്പിച്ചിരുന്നു. യൂറോപ്പിലേക്കുള്ള എൽ.എൻ.ജി കയറ്റുമതി സാമ്പത്തികമായി പ്രായോഗികമല്ലെന്ന മുൻ ട്രൂഡോ സർക്കാരിന്റെ നിലപാടിൽ നിന്ന് വിഭിന്നമായി, പ്രധാനമന്ത്രി മാർക്ക് കാർണിയുടെ നേതൃത്വത്തിലുള്ള നിലവിലെ സർക്കാർ കയറ്റുമതിയെ ശക്തമായി പിന്തുണയ്ക്കുകയാണ്. നിലവിൽ ബ്രിട്ടിഷ് കൊളംബിയയിലെ കിറ്റിമാറ്റിലുള്ള എൽ.എൻ.ജി കാനഡ ടെർമിനൽ വഴി 2025 വേനൽക്കാലം മുതൽ വാതക കയറ്റുമതി ആരംഭിച്ചിട്ടുണ്ട്. ഇതിന്റെ ഉത്പാദനം ഇരട്ടിയാക്കിക്കൊണ്ടുള്ള ‘ഫേസ് 2’ വികസന പ്രഖ്യാപനം അടുത്ത ആഴ്ച ഉണ്ടാകുമെന്നാണ് സൂചനകൾ. കൂടാതെ, ബി.സി. തീരത്തെ ക്സി ലിസിംസ് എൽ.എൻ.ജിയിൽ നിന്ന് പ്രതിവർഷം 10 ലക്ഷം ടൺ വീതം 20 വർഷത്തേക്ക് വാങ്ങാൻ ജർമനിയുടെ എസ്.ഇ.എഫ്.ഇ (SEFE) ധാരണാപത്രത്തിൽ ഒപ്പുവെച്ചിട്ടുണ്ട്.
യുക്രൈനെ പിന്തുണയ്ക്കുന്ന യൂറോപ്യൻ രാജ്യങ്ങൾക്ക് നേരെ റഷ്യ ആക്രമണാത്മക നിലപാടുകൾ കടുപ്പിക്കുന്ന സാഹചര്യത്തിലാണ് ഈ നയതന്ത്ര ചർച്ചകൾ നടക്കുന്നത്. അതോടൊപ്പം, യൂറോപ്യൻ കമ്മീഷൻ പ്രസിഡന്റ് ഉർസുല വോൺ ഡെർ ലെയ്ൻ മുന്നോട്ടുവെച്ച, കാനഡയെ യൂറോപ്യൻ യൂണിയന്റെ ആദ്യ അസോസിയേറ്റ് അംഗമാക്കാനുള്ള നിർദ്ദേശവും ശ്രദ്ധേയമായ മറ്റൊരു വിഷയമായി മാറുകയാണ്.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/BtwqAqvdF2uKsGDzfK81Nq
