ഓട്ടവ: ഓട്ടവ-ഗാറ്റിനോ മേഖലയിൽ ജീവനക്കാരില്ലാത്ത സ്വയംസേവന ഗ്രോസറി സ്റ്റോറായ ‘Aisle 24’ പ്രവർത്തനമാരംഭിച്ചു. മൊബൈൽ ആപ്പ് ഉപയോഗിച്ച് വാതിൽ തുറന്ന്, ഉപഭോക്താക്കൾ തന്നെ സാധനങ്ങൾ തിരഞ്ഞെടുത്ത് പണം നൽകുന്ന രീതിയിലാണ് ഈ സ്ഥാപനം പ്രവർത്തിക്കുന്നത്. 24 മണിക്കൂറും പ്രവർത്തിക്കുന്ന ഈ കടകൾ ജനങ്ങൾക്ക് ഏറെ സൗകര്യപ്രദമാണെങ്കിലും, കാഷ്യർമാർ ഇല്ലാത്തതും സാങ്കേതികവിദ്യയുടെ ഉപയോഗവും ചില ഉപഭോക്താക്കളിൽ ആശങ്കയും തടസ്സവും ഉണ്ടാക്കുന്നുണ്ട്.
രാത്രി വൈകി എത്തുന്നവർക്കും പെട്ടെന്ന് സാധനങ്ങൾ വാങ്ങേണ്ടവർക്കും ഈ സംവിധാനം വലിയ ആശ്വാസമാണെന്ന് ഒരു വിഭാഗം ഉപഭോക്താക്കൾ അഭിപ്രായപ്പെടുന്നു. എന്നാൽ ഫോൺ ആപ്പ് ഡൗൺലോഡ് ചെയ്യേണ്ടി വരുന്നതും, ആളുകളുമായി നേരിട്ടുള്ള ആശയവിനിമയം ഇല്ലാത്തതും, ഡിജിറ്റൽ സുരക്ഷാ പ്രശ്നങ്ങളും കാരണം പലരും ഈ കടകളിൽ കയറാൻ മടിക്കുന്നു. പാൽ, ഫ്രോസൺ ഫുഡ്സ്, മറ്റ് വീട്ടുസാധനങ്ങൾ എന്നിവയാണ് ഇവിടെ പ്രധാനമായും വിൽപ്പനയ്ക്കുള്ളത്.
Also Read; മെട്രോ വാൻകൂവറിൽ വൻ തൊഴിലവസരങ്ങൾ: പ്രമുഖ കമ്പനികളിലായി നൂറുകണക്കിന് ഒഴിവുകൾ
ഈ പുതിയ രീതി ഭാവിയിലെ പൊതുവായ മാറ്റമായി മാറാൻ സാധ്യതയില്ലെന്നാണ് റീട്ടെയിൽ രംഗത്തെ വിദഗ്ദ്ധരുടെ വിലയിരുത്തൽ. എഐ (AI) സാങ്കേതികവിദ്യ തൊഴിലവസരങ്ങൾ ഇല്ലാതാക്കുമോ എന്ന ഭയവും ഉപഭോക്താക്കളുടെ മടിക്ക് കാരണമാകുന്നുണ്ട്. എന്നാൽ സുരക്ഷാ സംവിധാനങ്ങൾ ശക്തമാണെന്നും, ജീവനക്കാർ കൃത്യമായി എത്തി സാധനങ്ങൾ നിറയ്ക്കുകയും ശുചീകരണം നടത്തുകയും ചെയ്യുന്നുണ്ടെന്നുമാണ് കമ്പനി വെബ്സൈറ്റിലെ വിശദീകരണം.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/BtwqAqvdF2uKsGDzfK81Nq
