ഓട്ടവ: വരാനിരിക്കുന്ന 2026-27 ശൈത്യകാലത്ത് കാനഡയിലെ വിവിധ പ്രവിശ്യകളിൽ ശക്തമായ തണുപ്പും മഞ്ഞുവീഴ്ചയും അനുഭവപ്പെടുമെന്ന് കാലാവസ്ഥാ പ്രവചനം. ‘ഓൾഡ് ഫാർമേഴ്സ് ആൽമനാക്ക്’ പുറത്തുവിട്ട ഏറ്റവും പുതിയ റിപ്പോർട്ട് പ്രകാരം രാജ്യത്ത് ഇത്തവണ ‘Split Winter’ സാഹചര്യമായിരിക്കും അനുഭവപ്പെടുക. തെക്കൻ പ്രദേശങ്ങളിൽ താരതമ്യേന ശാന്തമായ കാലാവസ്ഥയായിരിക്കുമെങ്കിലും, കിഴക്കൻ-പടിഞ്ഞാറൻ മേഖലകളിൽ അതിശക്തമായ മഞ്ഞുവീഴ്ചയ്ക്കാണ് സാധ്യത.
റിപ്പോർട്ട് അനുസരിച്ച് ബ്രിട്ടീഷ് കൊളംബിയയിലും ആൽബർട്ട, സസ്കാച്വാൻ, മാനിറ്റോബ എന്നീ പ്രവിശ്യകളിലും ഡിസംബർ അവസാന വാരം മുതൽ ഫെബ്രുവരി വരെയുള്ള കാലയളവിലാണ് ശക്തമായ മഞ്ഞുവീഴ്ചയ്ക്കും കുറഞ്ഞ താപനിലയ്ക്കും സാധ്യതയുള്ളത്. ഒന്റാരിയോയിലും ക്യുബെക്കിലും ജനുവരി, ഫെബ്രുവരി മാസങ്ങളിൽ തണുപ്പ് പരമാവധിയിലെത്തും. ക്യുബെക്കിൽ ഡിസംബർ പകുതി മുതൽ മാർച്ച് പകുതി വരെ ഘട്ടംഘട്ടമായി ശക്തമായ മഞ്ഞുവീഴ്ച പ്രതീക്ഷിക്കുന്നുണ്ട്.
ന്യൂ ബ്രൺസ്വിക്ക്, നോവ സ്കോഷ്യ, പി.ഇ.ഐ, ന്യൂഫൗണ്ട്ലാൻഡ് ഉൾപ്പെടുന്ന അറ്റ്ലാന്റിക് പ്രവിശ്യകളിൽ ജനുവരി, ഫെബ്രുവരി മാസങ്ങളിലാണ് ഏറ്റവും തണുപ്പുള്ള ദിവസങ്ങൾ റിപ്പോർട്ട് ചെയ്യപ്പെടുക. അതേസമയം, രാജ്യത്തിന്റെ വടക്കൻ പ്രദേശങ്ങളായ യൂക്കൺ, നോർത്ത്വെസ്റ്റ് ടെറിറ്ററീസ്, നുനാവുട്ട് എന്നിവിടങ്ങളിൽ നവംബർ ആദ്യവാരം തന്നെ മഞ്ഞുവീഴ്ച ആരംഭിക്കും. ഈ മേഖലകളിൽ ഡിസംബർ മുതൽ മാർച്ച് വരെ നീളുന്ന കഠിനമായ തണുപ്പായിരിക്കും അനുഭവപ്പെടുക.
Also Read: അഫ്ഗാൻ യുദ്ധത്തിന് 25 വർഷം: ഓർമ്മ പുതുക്കി കാനഡ
വർഷം തോറും കാലാവസ്ഥാ മുന്നറിയിപ്പുകൾ നൽകുന്ന ഓൾഡ് ഫാർമേഴ്സ് ആൽമനാക്കിന്റെ വിലയിരുത്തലുകൾ കാനഡയിലെ യാത്രാ ക്രമീകരണങ്ങൾക്കും സുരക്ഷാ തയ്യാറെടുപ്പുകൾക്കും മുൻകൂട്ടി സഹായിക്കാറുണ്ട്. കിഴക്കൻ-പടിഞ്ഞാറൻ മേഖലകളിലെ ജനങ്ങൾ വരാനിരിക്കുന്ന കനത്ത മഞ്ഞുവീഴ്ചയെ പ്രതിരോധിക്കാൻ ആവശ്യമായ മുന്നൊരുക്കങ്ങൾ നടത്തണമെന്ന് അധികൃതരും നിർദ്ദേശിക്കുന്നു. വരും ആഴ്ചകളിൽ പ്രാദേശിക തലത്തിലുള്ള കൂടുതൽ കൃത്യമായ കാലാവസ്ഥാ അറിയിപ്പുകൾ ലഭ്യമാകുമെന്നാണ് പ്രതീക്ഷിക്കുന്നത്.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/BtwqAqvdF2uKsGDzfK81Nq
