ഒന്റാറിയോ: രാജ്യത്ത് പുതിയ എഐ ഡാറ്റാ സെന്ററുകൾ ഉയർന്നു വരുമ്പോൾ പരിസ്ഥിതിക്കും ജനങ്ങൾക്കും ബുദ്ധിമുട്ടുണ്ടാകാതിരിക്കാൻ ഫെഡറൽ സർക്കാർ പുതിയ മാർഗനിർദേശങ്ങൾ പ്രഖ്യാപിച്ചു. കാനഡയിലെ എഐ മന്ത്രി ഇവാൻ സോളമനാണ് ഒന്റാറിയോയിൽ വെച്ച് ഇക്കാര്യം വ്യക്തമാക്കിയത്. വൻകിട കമ്പനികൾ കെട്ടിടങ്ങൾ പണിയുമ്പോൾ പ്രാദേശിക ഭരണകൂടങ്ങൾക്കും നഗരസഭകൾക്കും ഉപയോഗിക്കാൻ വേണ്ടിയാണ് ഈ പുതിയ മാർഗരേഖകൾ തയാറാക്കിയിരിക്കുന്നത്.
ഡാറ്റാ സെന്ററുകൾ പാലിക്കേണ്ട 5 പ്രധാന കാര്യങ്ങൾ
പുതിയ നിർദേശങ്ങൾ അനുസരിച്ച് കാനഡയിൽ ഡാറ്റാ സെന്റർ നടത്തുന്ന കമ്പനികൾ അഞ്ച് നിർബന്ധങ്ങൾ പാലിക്കേണ്ടി വരും. പ്രാദേശികവാസികൾക്ക് പ്രയോജനമുള്ള കാര്യങ്ങൾ ചെയ്യുക, ജനങ്ങളുടെ കറന്റ് ബിൽ കൂട്ടാതിരിക്കുക, വെള്ളത്തിന്റെ ഉപയോഗം കുറയ്ക്കുക, വിവരങ്ങൾ ജനങ്ങളിൽ നിന്ന് മറച്ചുവെക്കാതിരിക്കുക എന്നിവയാണ് ഇതിലെ പ്രധാന ആവശ്യങ്ങൾ. മൈക്രോസോഫ്റ്റ്, ഗൂഗിൾ, ആമസോൺ, മെറ്റ, ഓപ്പൺഎഐ തുടങ്ങിയ വൻകിട ടെക് കമ്പനികൾ ഈ പുതിയ വ്യവസ്ഥകൾ അംഗീകരിച്ചിട്ടുണ്ട്.
എന്തുകൊണ്ടാണ് ജനങ്ങൾ എഐ ഡാറ്റാ സെന്ററുകളെ എതിർക്കുന്നത്?
ഡാറ്റാ സെന്ററുകൾ വരുന്നത് കാരണം വലിയ ശബ്ദശല്യം ഉണ്ടാകുമെന്നും, ഇവയ്ക്ക് പ്രവർത്തിക്കാൻ വലിയ അളവിൽ കറന്റും വെള്ളവും വേണമെന്നതും പ്രദേശവാസികളെ ആശങ്കപ്പെടുത്തുന്നുണ്ട്. അടുത്തിടെ നടന്ന സർവേ പ്രകാരം പകുതിയോളം ആൾക്കാരും തങ്ങളുടെ നാടുകളിൽ ഇത്തരം ഡാറ്റാ സെന്ററുകൾ വരുന്നത് ഇഷ്ടപ്പെടുന്നില്ല. ആൽബർട്ടയിലും വാൻകൂവറിലും വലിയ എഐ സെന്ററുകൾ പണിയാനുള്ള തീരുമാനത്തിനെതിരെ വലിയ രീതിയിലുള്ള പൊതുജന പ്രതിഷേധങ്ങളാണ് ഇപ്പോൾ നടക്കുന്നത്.
Also Read: കാനഡ റെയിൽവേയിൽ 4.7 ബില്യൺ ഡോളറിന്റെ ചരിത്ര നിക്ഷേപം; പ്രഖ്യാപനവുമായി പ്രധാനമന്ത്രി മാർക്ക് കാർണി
നിർമ്മാണം നിർത്തിവെപ്പിച്ച നടപടികളും പുതിയ തീരുമാനങ്ങളും
നാട്ടുകാരുടെ കടുത്ത എതിർപ്പിനെ തുടർന്ന് മാനിറ്റോബയിൽ തുടങ്ങാനിരുന്ന വലിയൊരു ഡാറ്റാ സെന്റർ പദ്ധതി പ്രവിശ്യാ സർക്കാർ പൂർണ്ണമായി റദ്ദാക്കി. എന്നാൽ, ഇത്തരം സ്ഥാപനങ്ങൾ പൂർണ്ണമായി ഒഴിവാക്കാതെ കൃത്യമായ നിബന്ധനകളോടെ നിയന്ത്രിക്കാനാണ് ഒന്റാറിയോ പോലുള്ള മറ്റ് ചില പ്രദേശങ്ങൾ തീരുമാനിച്ചിരിക്കുന്നത്. പുതിയ സാങ്കേതികവിദ്യകൾ കൊണ്ടുവരുമ്പോൾ സാധാരണക്കാർക്ക് സാമ്പത്തികമായോ പരിസ്ഥിതിപരമായോ തിരിച്ചടിയുണ്ടാകില്ലെന്ന് ഉറപ്പുവരുത്താനാണ് സർക്കാരിന്റെ ഈ നീക്കം.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/BtwqAqvdF2uKsGDzfK81Nq
