റഫറണ്ടം അടുക്കവെ ആൽബർട്ടയിൽ വംശീയ അധിക്രമങ്ങൾ ശക്തമാകുന്നു; സിഖ്, മുസ്ലിം സമൂഹങ്ങൾ ഭീതിയിൽ

കാൽഗറി: ആൽബർട്ട പ്രവിശ്യയിൽ റഫറണ്ടം തീയതി അടുത്തുവരുന്നതിനിടെ കുടിയേറ്റ സമൂഹങ്ങൾക്കിടയിലും സിഖ്, മുസ്ലിം വിഭാഗങ്ങൾക്കിടയിലും ആശങ്ക ശക്തമാകുന്നു. ഒക്ടോബർ 19-ന് നടക്കാനിരിക്കുന്ന റഫറണ്ടത്തിന് മുന്നോടിയായി ഓൺലൈൻ മാധ്യമങ്ങളിലടക്കം കുടിയേറ്റ വിരുദ്ധ പ്രചാരണങ്ങളും ഭീഷണികളും വർധിച്ചുവരുന്നതായി പ്രവിശ്യയിലെ വിവിധ സമുദായ നേതാക്കൾ വ്യക്തമാക്കുന്നു. അടുത്തിടെ എഡ്മിന്റണിലെ സിഖ് ഗുരുദ്വാരയിൽ രണ്ട് പേർക്ക് കുത്തേറ്റ സംഭവവും കാൽഗറിയിലെ മുസ്ലിം ഹെറിറ്റേജ് ദിന പരിപാടിക്ക് നേരെയുണ്ടായ ഭീഷണികളും മേഖലയിലെ സംഘർഷാവസ്ഥ വർധിപ്പിച്ചിട്ടുണ്ട്. സംഭവങ്ങളിൽ വിദ്വേഷ സാധ്യത മുൻനിർത്തി പൊലീസ് അന്വേഷണം നടത്തിവരികയാണ്.

പൊലീസ് കണക്കുകളും റഫറണ്ടം വിഷയങ്ങളും

പ്രവിശ്യയിലെ പ്രധാന നഗരങ്ങളായ എഡ്മിന്റണിലും കാൽഗറിയിലും വിദ്വേഷ അതിക്രമങ്ങൾ വർധിക്കുന്നതായി പൊലീസ് കണക്കുകൾ സ്ഥിരീകരിക്കുന്നു. ഈ വർഷം ഇതുവരെ എഡ്മിന്റണിൽ 139 വിദ്വേഷ സംഭവങ്ങളും 43 കുറ്റകൃത്യങ്ങളും റിപ്പോർട്ട് ചെയ്തപ്പോൾ, കാൽഗറിയിൽ ലഭിച്ച 272 പരാതികളിൽ 44 എണ്ണം വിദ്വേഷത്തോടെയുള്ളതാണെന്ന് പൊലീസ് സ്ഥിരീകരിച്ചു. പ്രധാനമായും പുതിയതായി എത്തിയ കുടിയേറ്റക്കാരാണ് ഇത്തരം ആക്രമണങ്ങൾക്ക് ഇരയാകുന്നത്. വരാനിരിക്കുന്ന റഫറണ്ടത്തിലെ 10 ചോദ്യങ്ങളിൽ അഞ്ചെണ്ണം കുടിയേറ്റ നിയന്ത്രണം, പ്രാദേശിക തൊഴിൽ മുൻഗണന, പൊതുസേവനങ്ങൾ കനേഡിയൻ പൗരന്മാർക്ക് മാത്രമായി പരിമിതപ്പെടുത്തൽ എന്നിവയെക്കുറിച്ചാണ്.

Also Read : തീരുവ ഉയർത്തി അമേരിക്ക, തിരിച്ചടിച്ച് കാനഡ; വ്യാപാര യുദ്ധത്തിന് വഴിയൊരുക്കിയ ആ 5 പ്രധാന വിഷയങ്ങൾ ഇവയാണ്

സർക്കാരിന്റെ വിശദീകരണം

റഫറണ്ടത്തിലെ ചോദ്യങ്ങൾ ജനങ്ങൾക്കിടയിൽ വലിയ സ്വാധീനം ചെലുത്തുന്നുണ്ടെന്ന് ആൽബർട്ട സർവകലാശാലയിലെ പ്രൊഫസർ ജാരെഡ് വെസ്‌ലി പറഞ്ഞു. പ്രവിശ്യ വേർപിരിയുന്നതിനെക്കുറിച്ചുള്ള ചർച്ചകളിൽ ചില തീവ്ര വംശീയ ആശയങ്ങൾ ഉയർന്നുവരുന്നുണ്ടെന്നും അദ്ദേഹം ചൂണ്ടിക്കാട്ടുന്നു. എന്നാൽ ഈ ആരോപണങ്ങൾ ആൽബർട്ട സർക്കാർ പൂർണ്ണമായും തള്ളി. കുടിയേറ്റക്കാരുടെ എണ്ണം കൂടിയത് മൂലം ആശുപത്രികൾ, സ്കൂളുകൾ തുടങ്ങിയ പൊതുസേവന മേഖലകളിൽ വലിയ ഭാരമാണ് ഉണ്ടാകുന്നത്. ഈ പ്രശ്നം പരിഹരിക്കാനും നാടിന്റെ ഭാവി സുരക്ഷിതമാക്കാനുമാണ് വോട്ടെടുപ്പ് നടത്തുന്നതെന്ന് പ്രീമിയർ ഡാനിയേൽ സ്മിത്തിന്റെ പ്രതിനിധി വ്യക്തമാക്കി.

കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/BtwqAqvdF2uKsGDzfK81Nq

Racist attacks intensify in Alberta as the referendum approaches; Sikh and Muslim communities live in fear.