ടൊറോന്റോ: ഒന്റാറിയോയിലെ വാഹന ഉടമകൾക്കും കാനഡയിലെ കുടിയേറ്റക്കാർക്കും ആശ്വാസമായി പ്രമുഖ ഇൻഷുറൻസ് കമ്പനികൾ കാർ ഇൻഷുറൻസ് പ്രീമിയം നിരക്കുകളിൽ ഇളവ് പ്രഖ്യാപിച്ചു. ഫിനാൻഷ്യൽ സർവീസസ് റെഗുലേറ്ററി അതോറിറ്റി ഓഫ് ഒന്റാറിയോ (FSRA) അംഗീകരിച്ച ഈ പുതിയ നിരക്കിളവുകൾ 2026 സെപ്റ്റംബർ 1 മുതൽ ഘട്ടങ്ങളായി ഉപഭോക്താക്കൾക്ക് ലഭ്യമായിത്തുടങ്ങും.
പ്രവിശ്യയിലെ എട്ടോളം പ്രധാന ഇൻഷുറൻസ് കമ്പനികൾക്കാണ് നിരക്ക് കുറയ്ക്കാൻ അനുമതി ലഭിച്ചിട്ടുള്ളത്. 0.23 ശതമാനം മുതൽ 5.30 ശതമാനം വരെയാണ് ശരാശരി പ്രീമിയത്തിൽ കുറവ് വരുന്നത്. ഇതിൽ ഓഗസ്റ്റ് 15 മുതൽ ഹാർട്ട്ലാന്റ് ഫാം മ്യൂച്വൽ 4.62 ശതമാനം ഇളവ് നൽകിത്തുടങ്ങിയിട്ടുണ്ട്. സെപ്റ്റംബർ 1 മുതൽ അവിവ ജനറൽ 1.64 ശതമാനവും, ഡിഫിനിറ്റി 1.31 ശതമാനവും, വാവനെസ 0.23 ശതമാനവും നിരക്ക് കുറയ്ക്കും. സെപ്റ്റംബർ 15 മുതൽ ആൾസ്റ്റേറ്റ് 1.64 ശതമാനവും പെംബ്രിഡ്ജ് 1.45 ശതമാനവും ഇളവുകൾ നൽകും. ഡെസ്ജാർഡിൻസ് ഗ്രൂപ്പിന് കീഴിലുള്ള സെർട്ടിസ് ഡയറക്ട്, സെർട്ടിസ് ഹോം & ഓട്ടോ എന്നിവ 2 ശതമാനം വീതവും, ദ പേഴ്സണൽ കമ്പനി ഏറ്റവും ഉയർന്ന ഇളവായ 5.30 ശതമാനവും നിരക്ക് ഇളവ് പ്രഖ്യാപിച്ചിട്ടുണ്ട്. ഇവരുടെ ഇളവുകൾ നവംബർ 28 മുതലായിരിക്കും പ്രാബല്യത്തിൽ വരിക.
എന്നാൽ എല്ലാ കമ്പനികളും നിരക്ക് കുറച്ചിട്ടില്ലെന്നതും ശ്രദ്ധേയമാണ്. അവിവ ഗ്രൂപ്പിന്റെ തന്നെ ഭാഗമായ എസ് & വൈ ഇൻഷുറൻസ് സെപ്റ്റംബർ 1 മുതൽ ശരാശരി 1.19 ശതമാനം നിരക്ക് വർധിപ്പിക്കാൻ അനുമതി നേടിയിട്ടുണ്ട്. കൂടാതെ, കമ്പനികൾ പ്രഖ്യാപിച്ചിരിക്കുന്നത് ശരാശരി നിരക്കിലെ മാറ്റമായതിനാൽ ഓരോ ഡ്രൈവർക്കും ലഭിക്കുന്ന ഇളവുകളിൽ വ്യത്യാസമുണ്ടാകാം. താമസിക്കുന്ന സ്ഥലം, ഡ്രൈവിംഗ് ട്രാക്ക് റെക്കോർഡ്, വാഹനത്തിന്റെ മോഡൽ എന്നിവ അടിസ്ഥാനമാക്കിയാണ് വ്യക്തിഗത പ്രീമിയം തീരുമാനിക്കുന്നത്.
2026 ജൂലൈ 1-ന് ഒന്റാറിയോയിൽ നടപ്പിലാക്കിയ ഓട്ടോ ഇൻഷുറൻസ് പരിഷ്കാരങ്ങളുടെ തുടർച്ചയായാണ് ഈ മാറ്റങ്ങൾ വരുത്തുന്നത്. ആക്സിഡന്റ് ബെനഫിറ്റുകളിൽ മെഡിക്കൽ, പുനരധിവാസ ചെലവുകൾ ഒഴികെയുള്ളവ ഓപ്ഷണൽ ആക്കിയതിലൂടെ കമ്പനികൾക്കുണ്ടായ ചെലവുചുരുക്കലാണ് പ്രീമിയം കുറയ്ക്കാൻ വഴിയൊരുക്കിയത്.
വാഹന ഉടമകൾ സ്വന്തം പോളിസിയുടെ പുതുക്കൽ തീയതി പരിശോധിച്ച് ഈ ഇളവുകൾ ലഭിക്കുന്നുണ്ടെന്ന് ഉറപ്പുവരുത്തേണ്ടതാണ്. പ്രീമിയം പുതുക്കുന്നതിന് മുൻപായി മറ്റ് കമ്പനികളുടെ നിരക്കുകൾ കൂടി താരതമ്യം ചെയ്യുന്നതും വീട്, വാഹനം എന്നിവയുടെ ഇൻഷുറൻസുകൾ ഒന്നിച്ച് ബണ്ടിൽ ചെയ്യുന്നതും കൂടുതൽ തുക ലാഭിക്കാൻ സഹായിക്കും.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=hq1tcla
