ഒട്ടാവ: കനേഡിയൻ പൗരത്വ സർട്ടിഫിക്കറ്റുകൾക്കായി ലോകമെമ്പാടുമുള്ള അപേക്ഷകരുടെ എണ്ണത്തിൽ വൻ വർദ്ധനവ്. അമേരിക്കയിൽ നിന്നുള്ള അപേക്ഷകളുടെ പ്രവാഹമാണ് ഈ പെട്ടെന്നുള്ള കുതിച്ചുചാട്ടത്തിന് പ്രധാന കാരണം. ‘ലോസ്റ്റ് കനേഡിയൻ’ നിയമ നിർമ്മാണത്തെ (ബിൽ സി-3) തുടർന്ന് പൗരത്വ സർട്ടിഫിക്കറ്റുകൾ ലഭിച്ചവരുടെ എണ്ണം ഏപ്രിൽ 1 മുതൽ മേയ് 31 വരെയുള്ള രണ്ടു മാസത്തിനിടെ 50 ശതമാനത്തോളം ഉയർന്നതായി ഇമിഗ്രേഷൻ, റെഫ്യൂജീസ് ആൻഡ് സിറ്റിസൺഷിപ്പ് കാനഡ പുറത്തുവിട്ട പുതിയ കണക്കുകൾ വ്യക്തമാക്കുന്നു. മുൻതലമുറയിലെ പരമ്പരാഗത ബന്ധം തെളിയിക്കാൻ സാധിക്കുന്ന വിദേശത്തു ജനിച്ചവർക്ക് പൗരത്വം നൽകുന്നതാണ് ഈ പുതിയ നിയമം.
പകുതിയോളം പേർ അമേരിക്കക്കാർ; കെട്ടിക്കിടക്കുന്നത് 1.2 ലക്ഷത്തിലേറെ അപേക്ഷകൾ
കഴിഞ്ഞ ഡിസംബറിൽ നിയമം നിലവിൽ വന്നതിനു ശേഷം മെയ് 31 വരെ 6,100 പേർക്കാണ് ബിൽ സി-3 പ്രകാരം പൗരത്വ സർട്ടിഫിക്കറ്റ് നൽകിയത്. മാതാപിതാക്കളിൽ ഒരാൾ കനേഡിയൻ പൗരനായതിന്റെ പേരിൽ വേറെയും 17,390 പേർക്ക് സർട്ടിഫിക്കറ്റ് ലഭിച്ചിട്ടുണ്ട്. പൗരത്വം ലഭിച്ചവരിൽ പകുതിയോളം പേർ യു.എസ് പൗരന്മാരാണ്. അതേസമയം, തീരുമാനമെടുക്കാതെ കെട്ടിക്കിടക്കുന്ന അപേക്ഷകളുടെ എണ്ണം 1,21,800 ആയി ഉയർന്നിട്ടുണ്ട്.
കാത്തിരിപ്പ് സമയം ഇരട്ടിയായി; ആർക്കൈവ്സുകളിൽ വൻ ജോലിഭാരം
ഏപ്രിലിൽ 56,000 ആയിരുന്ന അപേക്ഷകളാണ് ചുരുങ്ങിയ മാസങ്ങൾ കൊണ്ട് ഇത്രയധികം കുതിച്ചുയർന്നത്. ഇതോടെ അപേക്ഷകളിൽ തീരുമാനമെടുക്കാനുള്ള ശരാശരി കാത്തിരിപ്പ് സമയം 12 മാസത്തിൽ നിന്ന് 25 മാസമായി വർദ്ധിച്ചു. അപേക്ഷകൾ കുതിച്ചുയർന്നതോടെ പൂർവ്വികരുടെ രേഖകൾ പരിശോധിച്ചു നൽകേണ്ട കാനഡയിലെ ആർക്കൈവ്സ് സ്ഥാപനങ്ങളും വലിയ ജോലിഭാരത്തിലാണ്. നൂറ്റാണ്ടുകൾ പഴക്കമുള്ള പള്ളിരേഖകളും കൈയെഴുത്തു രേഖകളും പരിശോധിക്കുന്നത് ജീവനക്കാരുടെ ജോലിഭാരം ഇരട്ടിയാക്കിയിട്ടുണ്ട്.
രേഖകൾ തിരയുന്നതിൽ 300% വർദ്ധനവ്; സർട്ടിഫിക്കറ്റുകൾ സസ്പെൻഡ് ചെയ്തതിൽ ആശങ്ക
പല സ്ഥാപനങ്ങളിലും രേഖകൾ തിരഞ്ഞുള്ള അപേക്ഷകളിൽ 100 മുതൽ 300 ശതമാനം വരെ വർദ്ധനവാണ് രേഖപ്പെടുത്തിയിരിക്കുന്നത്. അതിനിടെ, രേഖകളിലെ അപാകതകൾ ചൂണ്ടിക്കാട്ടി നേരത്തെ നൽകിയ നൂറോളം സർട്ടിഫിക്കറ്റുകൾ ഐ.ആർ.സി.സി സസ്പെൻഡ് ചെയ്തത് അപേക്ഷകരിൽ വലിയ ആശങ്കയ്ക്കും വഴിവെച്ചിട്ടുണ്ട്. ഇതിൽ 83 എണ്ണത്തിന്റെ പ്രശ്നങ്ങൾ പരിഹരിച്ചെങ്കിലും ബാക്കിയുള്ളവരിൽ നിന്ന് കൂടുതൽ വ്യക്തത തേടിയിരിക്കുകയാണ് അധികൃതർ.
Huge rush of Americans for Canadian citizenship certificates; Report says over 1,20,000 files are pending
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=hq1tcla
