ബെർലിൻ: ജർമനിയിലെ ഡ്യൂസൽഡോർഫിൽ ഞായറാഴ്ച നടന്ന IFAF ലോക ചാമ്പ്യൻഷിപ്പിൽ മെക്സിക്കോയെ 34-26 എന്ന സ്കോറിന് കീഴടക്കി കാനഡയുടെ പുരുഷ ഫ്ലാഗ് ഫുട്ബോൾ ടീം വിജയം സ്വന്തമാക്കി. ടൂർണമെന്റിൽ മൂന്നാം സ്ഥാനം നേടിയതോടെയാണ് ടീം ഒളിമ്പിക്സ് യോഗ്യത എന്ന ലക്ഷ്യം കൈവരിച്ചത്. ശക്തമായ മുന്നേറ്റ നിരയുടെ പ്രകടനമാണ് മത്സരത്തിൽ കാനഡയ്ക്ക് തുണയായത്.
മൈക്കൽ ഒ’കോണറിന്റെ നിർണായക പ്രകടനം
കാനഡയുടെ ക്വാർട്ടർബാക്ക് മൈക്കൽ ഒ’കോണർ 294 യാർഡും അഞ്ച് ടച്ച്ഡൗണുകളും നേടി ടീമിന്റെ വിജയത്തിൽ നിർണായക പങ്കുവഹിച്ചു. മുൻ എൻഎഫ്എൽ താരം ആന്റണി ഓക്ലെയർ 149 റിസീവിംഗ് യാർഡുകൾ സ്വന്തമാക്കുകയും ഒ’കോണറിന്റെ രണ്ട് ടച്ച്ഡൗൺ പാസുകൾ സ്വീകരിക്കുകയും ചെയ്തു. കൂടാതെ ഡാനിയൽ പീറ്റർമാൻ രണ്ടും ജെയിംസ് ഡ്രൈസ്ഡെയിൽ ഒരു ടച്ച്ഡൗണും നേടി കാനഡയുടെ സ്കോർ ഉയർത്തി.
ഒളിമ്പിക്സ് യോഗ്യത നിശ്ചയിച്ച പോരാട്ടം
സെമിഫൈനൽ മത്സരത്തിൽ ഇറ്റലിയോട് കാനഡ പരാജയപ്പെട്ടിരുന്നു. എന്നാൽ അമേരിക്ക ഫൈനലിൽ എത്തിയതോടെ, മൂന്നാം സ്ഥാനത്തിനായുള്ള കാനഡ – മെക്സിക്കോ മത്സരം ഒളിമ്പിക് യോഗ്യത തീരുമാനിക്കുന്ന നിർണായക പോരാട്ടമായി മാറുകയായിരുന്നു. ഫൈനലിൽ കളിച്ച അമേരിക്കയ്ക്ക് ആതിഥേയർ എന്ന നിലയിൽ നേരത്തെ തന്നെ ഒളിമ്പിക്സ് യോഗ്യതയുള്ളതിനാൽ, മൂന്നാം സ്ഥാനം നേടുന്ന ടീമിന് നേരിട്ട് ലോസ് ആഞ്ചലസിലേക്ക് വഴിതുറക്കുകയായിരുന്നു.
വനിതാ ടീമിന് പിന്നാലെ പുരുഷന്മാരും
കഴിഞ്ഞ ദിവസം സെമിഫൈനലിൽ മെക്സിക്കോയെ തോൽപ്പിച്ച് വനിതാ ടീം ഒളിമ്പിക് യോഗ്യത നേടുകയും അമേരിക്കയെ വീഴ്ത്തി സ്വർണം കരസ്ഥമാക്കുകയും ചെയ്തിരുന്നു. തൊട്ടുപിന്നാലെ പുരുഷ ടീമും വിജയം കണ്ടതോടെ ഇരട്ട ഒളിമ്പിക്സ് യോഗ്യതയുടെ സന്തോഷത്തിലാണ് കനേഡിയൻ കായിക ലോകം. പുരുഷ ഫൈനലിൽ ഇറ്റലിയെ 42-26ന് തോൽപ്പിച്ച് അമേരിക്ക ലോക ചാമ്പ്യന്മാരായി.
Read more: സീരിയൽ കില്ലർ കഥാപാത്രങ്ങളോടുള്ള താൽപര്യം; ഒന്റാറിയോയിൽ അധ്യാപികയെ കുത്തിക്കൊന്ന് 14കാരൻ
2028 ലോസ് ആഞ്ചലസ് ഒളിമ്പിക്സ്
2028-ൽ നടക്കുന്ന ലോസ് ആഞ്ചലസ് ഒളിമ്പിക്സിലാണ് ഫ്ലാഗ് ഫുട്ബോൾ ആദ്യമായി ഒരു മത്സര ഇനമായി അരങ്ങേറുന്നത്. ഒളിമ്പിക് ചരിത്രത്തിൽ ആദ്യമായി ഈ ഇനം ഉൾപ്പെടുത്തുമ്പോൾ കാനഡയുടെ വനിതാ ടീമിനൊപ്പം പുരുഷ ടീമിനും രാജ്യത്തെ പ്രതിനിധീകരിക്കാൻ സാധിക്കും. ഇത് വരും വർഷങ്ങളിൽ രാജ്യത്ത് കായികവിനോദത്തിന് കൂടുതൽ പ്രാധാന്യം നൽകാൻ സഹായിക്കും.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=hq1tcla
IFAF World Championship: Following the women's team, the men's flag football team also qualifies for the Los Angeles Olympics.
