നോക്കുന്നതെല്ലാം റെക്കോർഡ് ചെയ്യപ്പെടാം; ജനപ്രിയമാകുന്നതിനൊപ്പം ഭീഷണിയായി എഐ ഗ്ലാസുകൾ

ഒട്ടാവ: മൊബൈൽ ഫോൺ കൈയിലെടുക്കാതെ തന്നെ മുന്നിൽ നിൽക്കുന്നവരുടെ ഫോട്ടോയും വീഡിയോയും രഹസ്യമായി പകർത്താൻ സാധിക്കുന്ന കണ്ണടകളാണ് സ്മാർട്ട് ഗ്ലാസുകൾ. മെറ്റ കമ്പനിയുടെ റേ-ബാൻ സ്മാർട്ട് ഗ്ലാസുകൾ വിപണിയിൽ എത്തിയതോടെയാണ് ഈ ഭയം കൂടിയത്. തങ്ങൾ അറിയാതെ മറ്റാരെങ്കിലും വീഡിയോ പകർത്തി സമൂഹമാധ്യമങ്ങളിൽ ഇടുമോ എന്ന ആശങ്കയിലാണ് ജനങ്ങൾ. കാനഡയിലെ നിലവിലെ നിയമങ്ങൾ ഉപയോഗിച്ച് ഇത് തടയാൻ കഴിയില്ലെന്ന് പ്രമുഖ അഭിഭാഷകനായ ബ്രെന്റ് ആർണോൾഡ് പറയുന്നു.

പൊതുസ്ഥലത്ത് റെക്കോർഡ് ചെയ്താൽ കേസുണ്ടോ?
കാനഡയിലെ നിയമപ്രകാരം പൊതുസ്ഥലങ്ങളിൽ വെച്ച് ഒരാളെ റെക്കോർഡ് ചെയ്യുന്നത് വലിയ കുറ്റമല്ല. റോഡിലോ പാർക്കിലോ നിൽക്കുന്ന ഒരാളുടെ സമ്മതം ചോദിക്കാതെ വീഡിയോ എടുത്താലും അത് എളുപ്പത്തിൽ നിയമലംഘനമാകില്ല. കാനഡയിലെ നിലവിലെ നിയമങ്ങൾ പ്രധാനമായും വലിയ കമ്പനികൾ ആളുകളുടെ വിവരങ്ങൾ ചോർത്തുന്നത് തടയാനാണ് ഉണ്ടാക്കിയിട്ടുള്ളത്. എന്നാൽ സാധാരണക്കാർ സ്മാർട്ട് ഗ്ലാസ് വെച്ച് മറ്റുള്ളവരെ റെക്കോർഡ് ചെയ്യുന്നത് തടയാൻ അതിൽ വ്യവസ്ഥകളില്ല.

കടകൾക്കും ഹോട്ടലുകൾക്കും ഇത് നിരോധിക്കാമോ?
സ്വകാര്യ വ്യക്തികൾ നടത്തുന്ന കടകൾ, റസ്റ്റോറന്റുകൾ, ബാറുകൾ എന്നിവയ്ക്ക് ഉള്ളിൽ ഇത്തരം സ്മാർട്ട് ഗ്ലാസുകൾ നിരോധിക്കാൻ ഉടമകൾക്ക് അധികാരമുണ്ട്. എന്നാൽ സാധാരണ കണ്ണട ഏതാണ്, ക്യാമറയുള്ള സ്മാർട്ട് ഗ്ലാസ് ഏതാണെന്ന് പെട്ടെന്ന് തിരിച്ചറിയാൻ കഴിയില്ല എന്നതാണ് പ്രധാന പ്രശ്നം. അതുകൊണ്ട് ഗ്ലാസ് നിരോധിക്കുന്നതിന് പകരം, അത് ദുരുപയോഗം ചെയ്യുന്ന ആളുകൾക്കെതിരെ നടപടിയെടുക്കാവുന്ന രീതിയിൽ നിയമം മാറ്റണമെന്നാണ് വിദഗ്ധരുടെ അഭിപ്രായം.

ലോകമെമ്പാടും വിൽപ്പന കൂടുന്നു
കാനഡയിൽ മാത്രമല്ല, ലോകമെമ്പാടും ഈ വിഷയം വലിയ ചർച്ചയാകുന്നുണ്ട്. അമേരിക്കയിലെ ന്യൂയോർക്ക് കോടതികളിലും പ്രമുഖ പൊതുപരിപാടികളിലും ഇത്തരം ഗ്ലാസുകൾ ഇപ്പോൾ തന്നെ നിരോധിച്ചിട്ടുണ്ട്. എന്നാൽ ഈ നിരോധനങ്ങൾക്കിടയിലും സ്മാർട്ട് ഗ്ലാസുകളുടെ വിൽപ്പന വൻതോതിൽ കൂടുകയാണ്. കഴിഞ്ഞ ഒരു വർഷത്തിനിടെ എഴുപത് ലക്ഷത്തിലധികം റേ-ബാൻ സ്മാർട്ട് ഗ്ലാസുകളാണ് വിറ്റഴിഞ്ഞത്.

ഓഫീസുകളിലും ജോലിസ്ഥലങ്ങളിലും വരും ദിവസങ്ങളിൽ ഭീഷണി
ഓഫീസുകളിലും മറ്റ് ജോലിസ്ഥലങ്ങളിലും ഇത്തരം ഗ്ലാസുകൾ ഉപയോഗിക്കുന്നത് ജീവനക്കാരുടെ സ്വകാര്യതയെ ബാധിക്കും. ഗ്ലാസിൽ റെക്കോർഡിംഗ് നടക്കുമ്പോൾ ഒരു ചെറിയ ലൈറ്റ് കത്തുമെങ്കിലും, സാങ്കേതികവിദ്യ അറിയാവുന്നവർക്ക് ആ ലൈറ്റ് ഓഫാക്കാൻ കഴിയും. അതിനാൽ സ്ഥാപനങ്ങളിൽ ഇത്തരം ഗ്ലാസുകൾ ഉപയോഗിക്കുന്നതിന് കൃത്യമായ നിയമങ്ങളും നിയന്ത്രണങ്ങളും അടിയന്തരമായി കൊണ്ടു വരേണ്ടി വരും.

കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=hq1tcla

Everything you look at could be recorded; AI glasses emerge as a threat alongside their growing popularity.