സെന്റ് ജോൺസ്: ന്യൂഫൗണ്ട്ലാന്റിൽ ആളിപ്പടർന്ന കാട്ടുതീയിൽ ജീവൻ പണയം വെച്ച് പോരാടിയ അഗ്നിശമന സേനാംഗങ്ങൾക്ക് അഭയവും ആശ്വാസവും നൽകിയ കാർബണീയറിലെ ‘നൈറ്റ്സ് ഓഫ് കൊളംബസ്’ (Monsignor McCarthy Council 5902) കൗൺസിലിന് അന്താരാഷ്ട്ര അംഗീകാരം. ഡെൻവറിൽ നടന്ന 144-ാമത് സുപ്രീം കൺവെൻഷനിൽ വെച്ചാണ് ഇന്റർനാഷണൽ കമ്മ്യൂണിറ്റി പ്രോഗ്രാം അവാർഡ് നൽകി കൗൺസിലിനെ ആദരിച്ചത്.
കഴിഞ്ഞ വർഷം ഓഗസ്റ്റിൽ കൺസെപ്ഷൻ ബേ നോർത്ത് മേഖലയിൽ കാട്ടുതീ പടർന്നുപിടിച്ചപ്പോഴാണ് കൗൺസിൽ അംഗങ്ങൾ മാതൃകാപരമായ സേവനവുമായി രംഗത്തെത്തിയത്. തീ അണയ്ക്കാനായി എത്തിയ സന്നദ്ധപ്രവർത്തകർക്കും ഫയർഫൈറ്റർമാർക്കുമായി തങ്ങളുടെ യൂത്ത് ക്യാമ്പായ ക്യാമ്പ് മക്കാർത്തിയുടെ വാതിലുകൾ ഇവർ തുറന്നുകൊടുത്തു. നാൽപ്പത്തഞ്ചോളം കൗൺസിൽ അംഗങ്ങൾ ആഴ്ചകളോളം കഠിനാധ്വാനം ചെയ്താണ് ഇവർക്ക് ആവശ്യമായ താമസസൗകര്യവും ഭക്ഷണവും ഒരുക്കിയത്.
ഇതിനുപുറമേ, 500 ബോട്ടിൽ കുടിവെള്ളവും മറ്റ് അവശ്യസാധനങ്ങളും ഇവർ നേരിട്ടെത്തിച്ചു നൽകി. മറ്റ് കൗൺസിലുകളിൽ നിന്നും പ്രാദേശിക കൂട്ടായ്മകളിൽ നിന്നും സഹായങ്ങൾ സമാഹരിച്ച് ഫയർഫൈറ്റർമാർക്ക് ആവശ്യമായ ഉപകരണങ്ങൾ ഉറപ്പാക്കാനും ഇവർ മുൻകൈയെടുത്തു.
10,000 ഹെക്ടറിലധികം പ്രദേശം വിഴുങ്ങിയ കാട്ടുതീയിൽ കിംഗ്സ്റ്റൺ ഉൾപ്പെടെയുള്ള പ്രദേശങ്ങളിലെ ജനങ്ങളെ ഒഴിപ്പിക്കേണ്ടി വന്നിരുന്നു. ഈ കഠിനമായസമയത്ത് കാർബണീയറിലെ കൗൺസിൽ നൽകിയ സ്തുത്യർഹമായ സേവനമാണ് ഇപ്പോൾ അന്താരാഷ്ട്ര തലത്തിൽ ആദരിക്കപ്പെട്ടിരിക്കുന്നത്. 13 രാജ്യങ്ങളിൽ നിന്നായി രണ്ടായിരത്തിലധികം പ്രതിനിധികളും സഭാധ്യക്ഷന്മാരും പങ്കെടുത്ത ചടങ്ങിലാണ് പുരസ്കാരം സമ്മാനിച്ചത്. ഉക്രെയ്ൻ, ഫിലിപ്പീൻസ്, മിഷിഗൺ എന്നിവിടങ്ങളിലെ കൗൺസിലുകൾക്കും വിവിധ വിഭാഗങ്ങളിൽ പുരസ്കാരങ്ങൾ ലഭിച്ചു.
International award for the Knights of Columbus for their supportive role during the wildfires; Newfoundland emerges as a haven of kindness.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=hq1tcla
