ഇന്തോനേഷ്യയിൽ ജാവ ദ്വീപിന് സമീപം യാത്രാഫെറിക്ക് തീപിടിച്ച് അഞ്ച് പേർ മരണപ്പെട്ടു. അപകടത്തിൽപ്പെട്ട 229 പേരെ രക്ഷപ്പെടുത്തിയെങ്കിലും നിരവധി പേരെ കാണാതായതായി ആശങ്കയുണ്ട്. കാണാതായവർക്കായുള്ള തിരച്ചിൽ രക്ഷാപ്രവർത്തകർ തുടരുകയാണ്. കിഴക്കൻ ജാവയിലെ രണ്ടാമത്തെ വലിയ നഗരമായ സുരബായയിൽ നിന്ന് തെക്കൻ സുലവേസിയിലെ മകാസറിലേക്ക് പോവുകയായിരുന്ന ‘മുത്യാര സന്തോഷ് 2’ (Mutiara Sentosa 2) എന്ന ഫെറിക്കാണ് സുമെനെപ് റീജൻസിക്ക് സമീപം കടലിൽ വെച്ച് തീപിടിച്ചത്. പ്രാദേശിക സമയം രാവിലെയോടെയായിരുന്നു അപകടം.

കപ്പലിലെ യാത്രാരേഖകൾ പ്രകാരം 232 യാത്രക്കാരും 39 ജീവനക്കാരുമാണ് ഉണ്ടായിരുന്നതെങ്കിലും, ഇതിലുമധികം ആളുകൾ ഫെറിയിലുണ്ടായിരുന്നുവെന്ന് അധികൃതർ വ്യക്തമാക്കി. ഇന്തോനേഷ്യയിൽ ബോട്ടുകളിലും ഫെറികളിലും രേഖകളിലുള്ളതിനേക്കാൾ കൂടുതൽ യാത്രക്കാരെ കയറ്റുന്നത് പതിവാണെന്നും, ഇത് തിരച്ചിലിനെയും രക്ഷാപ്രവർത്തനത്തെയും പ്രയാസപ്പെടുത്തുന്നുണ്ടെന്നും സുരബായ സെർച്ച് ആൻഡ് റെസ്‌ക്യൂ ഓഫീസ് മേധാവി നനാങ് സിഗിറ്റ് പറഞ്ഞു. ദുരന്തബാധിതരുടെ കുടുംബങ്ങളിൽ നിന്നും രക്ഷപ്പെട്ടവരിൽ നിന്നും ലഭിക്കുന്ന വിവരങ്ങളുടെ അടിസ്ഥാനത്തിലാണ് കാണാതായവരെ കണ്ടെത്താൻ ശ്രമിക്കുന്നത്.

തീപിടുത്തത്തിന്റെ കാരണം ഇതുവരെ വ്യക്തമായിട്ടില്ല. ഫെറിയുടെ അടിഭാഗത്തെ ഡെക്കിൽ നിർത്തിയിട്ടിരുന്ന ഒരു ട്രക്കിൽ നിന്നാണ് തീ പടർന്നതെന്ന് രക്ഷപ്പെട്ട അഹമ്മദ് അബ്ദുൾ കരീം എന്ന യാത്രക്കാരൻ പറഞ്ഞു. ശക്തമായ കാറ്റിൽ അരമണിക്കൂറിനുള്ളിൽ തീ ആളിപ്പടരുകയും യാത്രക്കാരോട് ഫെറിയുടെ മുൻഭാഗത്തേക്ക് മാറുവാൻ നിർദ്ദേശം നൽകുകയുമായിരുന്നു. ട്രക്കുകളും ഒരു മണ്ണുമാന്തി യന്ത്രവും ഉൾപ്പെടെ 180 വാഹനങ്ങളും ഫെറിയിൽ കയറ്റിയിരുന്നു. 1992-ൽ ജപ്പാനിൽ നിർമ്മിച്ച ഈ ഫെറി 2015-ലാണ് ഇന്തോനേഷ്യ വാങ്ങിയത്. 160 മീറ്റർ നീളമുള്ള ഈ കപ്പലിന് 689 യാത്രക്കാരെയും 49 ജീവനക്കാരെയും 181 വാഹനങ്ങളെയും വഹിക്കാൻ ശേഷിയുണ്ട്.

സുരബായയിൽ നിന്നുള്ള രക്ഷാപ്രവർത്തന സംഘത്തിനൊപ്പം ഇന്തോനേഷ്യൻ നാവികസേനയുടെ കപ്പലുകളും സമീപത്തുകൂടി കടന്നുപോയ മറ്റ് യാത്രാ ബോട്ടുകളും രക്ഷാപ്രവർത്തനത്തിൽ പങ്കാളികളായി. രക്ഷപ്പെടുത്തിയവരെ കിഴക്കൻ ജാവയിലെ സുരബായയിലുള്ള തഞ്ചുങ് പെരാക് തുറമുഖത്തെത്തിച്ച് പ്രാഥമിക ചികിത്സ നൽകി. പതിനേഴായിരത്തിലധികം ദ്വീപുകളുള്ള ഇന്തോനേഷ്യയിൽ ദ്വീപുകളെ തമ്മിൽ ബന്ധിപ്പിക്കുന്ന പ്രധാന ഗതാഗത മാർഗ്ഗമാണ് ഫെറികൾ. എന്നാൽ സുരക്ഷാ മാനദണ്ഡങ്ങൾ പാലിക്കാത്തതും പരിശോധനകളിലെ വീഴ്ചയും കാരണം രാജ്യത്ത് ഇത്തരം ഫെറി അപകടങ്ങൾ പതിവാണ്.

Passenger ship catches fire in Indonesia: 5 dead; many missing

കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=hq1tcla