സസ്കാറ്റൂൺ: വെസ്റ്റേൺ കാനഡയിലെ ഏറ്റവും മികച്ച വാട്ടർ സ്കീയിങ് താരങ്ങൾ മാറ്റുരച്ച വെസ്റ്റേൺ കനേഡിയൻ ചാമ്പ്യൻഷിപ്പിന് സസ്കാറ്റൂണിൽ ആവേശോജ്ജ്വലമായ സമാപനം. വാരാന്ത്യത്തിൽ നടന്ന മത്സരങ്ങളിൽ ആൽബർട്ട, ബ്രിട്ടീഷ് കൊളംബിയ, മാനിറ്റോബ, സസ്കാച്ചെവൻ എന്നിവിടങ്ങളിൽ നിന്നായി അമ്പതിലധികം പ്രതിഭകളാണ് പങ്കെടുത്തത്. സസ്കാറ്റൂൺ വാട്ടർ-സ്കീ ക്ലബ്ബിന്റെ ആഭിമുഖ്യത്തിൽ വടക്കൻ സസ്കാറ്റൂണിലെ ക്ലബ്ബ് അങ്കണത്തിലായിരുന്നു മത്സരങ്ങൾ. സ്ലാലോം (slalom), ജമ്പ്, ട്രിക്ക് ഇനങ്ങളിലാണ് താരങ്ങൾ തങ്ങളുടെ കഴിവ് പ്രകടിപ്പിച്ചത്.
വെസ്റ്റിലെ ഏറ്റവും മികച്ച താരം ആരാണെന്ന് കണ്ടെത്താനുള്ള പോരാട്ടമാണിത്, മത്സരത്തിൽ പങ്കെടുത്ത പതിനേഴുകാരനായ എൻസോ ക്രിസ്റ്റ്യൻ ആവേശം പങ്കുവെച്ചു. കനേഡിയൻ നാഷണൽ വാട്ടർ സ്കീ ചാമ്പ്യൻഷിപ്പിലേക്കുള്ള യോഗ്യതാ മത്സരം കൂടിയായിരുന്നു ഇത്. ഈ ടൂർണമെന്റിൽ വിജയിക്കുകയോ അല്ലെങ്കിൽ മികച്ച സ്കോർ നേടുകയോ ചെയ്താൽ ദേശീയ ചാമ്പ്യൻഷിപ്പിലേക്ക് യോഗ്യത നേടാം. അവിടെ നിന്ന് ലോക ചാമ്പ്യൻഷിപ്പ്, പാൻ അമേരിക്കൻ ചാമ്പ്യൻഷിപ്പ് തുടങ്ങിയ അന്താരാഷ്ട്ര ടൂർണമെന്റുകളിലേക്കുള്ള ദേശീയ ടീമിലിടം നേടാനും താരങ്ങൾക്ക് സാധിക്കും, എൻസോ ക്രിസ്റ്റ്യൻ കൂട്ടിച്ചേർത്തു.
പ്രാദേശിക സ്കീയിങ് താരം കാർട്ടർ ലൂക്കാസിനെ സംബന്ധിച്ചിടത്തോളം, വളർന്നു വരുന്ന യുവതാരങ്ങൾക്ക് ഇതൊരു മികച്ച വേദിയാണ്. കുട്ടികൾക്കും സ്കീയിങ് മേഖലയിലേക്ക് പുതുതായി കടന്നുവരുന്നവർക്കും വേണ്ടിയുള്ള ടൂർണമെന്റാണിത്. ഇതിന് ആതിഥേയത്വം വഹിക്കാൻ കഴിഞ്ഞതിൽ വലിയ സന്തോഷമുണ്ട്. കുട്ടികൾക്ക് ഇതൊരു മികച്ച അവസരമാണെന്ന് കാർട്ടർ ലൂക്കാസ് പറഞ്ഞു.
ലോകോത്തര നിലവാരമുള്ള സൗകര്യങ്ങളാണ് തങ്ങൾ ഇവിടെ ഒരുക്കിയിട്ടുള്ളതെന്ന് സസ്കാറ്റൂൺ വാട്ടർ-സ്കീ ക്ലബ് പ്രസിഡന്റ് നോം ലൂക്കാസ് വ്യക്തമാക്കി. സസ്കാച്ചെവനിലെ അത്ലറ്റുകൾക്ക് ഈ സൗകര്യങ്ങൾ പ്രയോജനപ്പെടുത്താൻ കഴിയുന്നത് മികച്ച കാര്യമാണെന്നും മറ്റ് പ്രവിശ്യകൾക്ക് മുന്നിൽ തങ്ങളുടെ മികവ് തെളിയിക്കാനുള്ള അവസരമാണിതെന്നും അദ്ദേഹം പറഞ്ഞു.
അടുത്ത വർഷം നടക്കാനിരിക്കുന്ന ‘2027 അഡാപ്റ്റീവ് വേൾഡ് വാട്ടർ സ്കീ ചാമ്പ്യൻഷിപ്പിന്’ (Adaptive World Water Ski Championships) ആതിഥേയത്വം വഹിക്കാനുള്ള അവകാശം സസ്കാറ്റൂൺ ക്ലബ്ബ് സ്വന്തമാക്കി കഴിഞ്ഞു. ഇതിലൂടെ അന്താരാഷ്ട്ര തലത്തിലേക്ക് വീണ്ടും തിരിച്ചെത്താനുള്ള ഒരുക്കത്തിലാണ് ക്ലബ്ബ്. ഒരു വർഷം മുൻപേ തന്നെ ഇതിനായുള്ള ഒരുക്കങ്ങൾ ഞങ്ങൾ ആരംഭിച്ചു കഴിഞ്ഞു. ഒരുപാട് കാര്യങ്ങൾ ചെയ്തു തീർക്കാനുണ്ട്,” നോം ലൂക്കാസ് പറഞ്ഞു. തന്റെ സ്വന്തം ഹോം കോർട്ടിലേക്ക് ലോക ചാമ്പ്യൻഷിപ്പ് എത്തുന്നതിന്റെ ആവേശത്തിലാണ് അഡാപ്റ്റീവ് വാട്ടർ സ്കീയിങ് താരം ആഷ്ലി ബെർഗ്. ലോക ചാമ്പ്യൻഷിപ്പ് സസ്കാറ്റൂണിൽ നടക്കുന്നു എന്നത് വലിയൊരു കാര്യമാണ്. എന്റെ സ്വന്തം മണ്ണിൽ ഇത് നടക്കുമെന്ന് ഞാൻ കരുതിയിരുന്നില്ല. ഞാൻ ഏറെ ആവേശത്തിലാണെന്ന് ആഷ്ലി ബെർഗ് പറഞ്ഞു നിർത്തി.
Western Canadian Water Skiing Championship: Teenage stars make waves; next stop, the world stage.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt
