മോങ്ക്ടൺ : ന്യൂ ബ്രൺസ്വിക്കിൽ ജനസംഖ്യ വീണ്ടും കുറയുന്ന പശ്ചാത്തലത്തിൽ, നിർമാണ മേഖല ഉൾപ്പെടെയുള്ള രംഗങ്ങളിൽ വിദഗ്ധ തൊഴിലാളികൾക്കായുള്ള ആവശ്യകത റെക്കോർഡ് നിരക്കിലെത്തിയതായി റിപ്പോർട്ടുകൾ വ്യക്തമാക്കുന്നു. കഴിഞ്ഞ 20 വർഷത്തിനിടയിൽ ആദ്യമായി പ്രവിശ്യയിലെ ജനസംഖ്യ തുടർച്ചയായി ഒൻപത് മാസമായി കുറയുകയാണെന്ന് സ്റ്റാറ്റിസ്റ്റിക്സ് കാനഡയുടെ കണക്കുകൾ വ്യക്തമാക്കുന്നു. ഈ വർഷത്തിന്റെ തുടക്കം മുതൽ പ്രവിശ്യയിലെ ജനസംഖ്യയിൽ 886 പേരുടെ കുറവാണ് രേഖപ്പെടുത്തിയത്. ജനസംഖ്യാ ഇടിവും തൊഴിലാളികളുടെ പ്രായധിക്യവും പ്രവിശ്യയുടെ സമ്പദ്വ്യവസ്ഥയ്ക്കും വികസനത്തിനും വലിയ ഭീഷണിയാണെന്ന് സാമ്പത്തിക വികസന കൺസൾട്ടന്റായ ഡേവിഡ് കാംപ്ബെൽ അഭിപ്രായപ്പെട്ടു.
തൊഴിലാളികളുടെ കുറവ് കാരണം പ്രവിശ്യയിലെ പ്രധാന നിർമാണ പദ്ധതികൾ വൈകാൻ സാധ്യതയുണ്ടെന്ന് കൺസ്ട്രക്ഷൻ അസോസിയേഷൻ ന്യൂ ബ്രൺസ്വിക്ക് എക്സിക്യൂട്ടീവ് ഡയറക്ടർ ജോൺ-റയാൻ മോറിസൺ വ്യക്തമാക്കി. നിലവിൽ മാക്റ്റാക്വാക് അണക്കെട്ടിന്റെ ആയുസ്സ് വർധിപ്പിക്കുന്നതിനുള്ള 900 കോടി ഡോളറിന്റെ പദ്ധതിയും, സെന്റ് ജോണിലെ 1.5 മില്യൺ ഡോളറിന്റെ പ്രൊജക്ട് നെക്സ്റ്റ്ജെൻ തുടങ്ങിയ വൻകിട പദ്ധതികളും പുരോഗമിക്കുകയാണ്. തൊഴിലാളികളുടെ ക്ഷാമം കൂലി വർധിക്കുന്നതിനും യു.എസ് ഏർപ്പെടുത്തിയ താരിഫുകൾ അസംസ്കൃത വസ്തുക്കളുടെ വില കൂടുന്നതിനും കാരണമാകുന്നുണ്ടെന്ന് മോറിസൺ ചൂണ്ടിക്കാണിച്ചു.
ഡേവിഡ് കാംപ്ബെൽ പുറത്തുവിട്ട ‘ഹെൽപ് വാണ്ടഡ്’ റിപ്പോർട്ട് പ്രകാരം, 2025 മുതൽ 2035 വരെയുള്ള ദശകത്തിൽ ന്യൂ ബ്രൺസ്വിക്കിൽ 1,35,700 തൊഴിലവസരങ്ങൾ ഒഴിഞ്ഞുകിടക്കുമെന്നാണ് പ്രവചനം. ഇതിൽ ആരോഗ്യ സംരക്ഷണ-സാമൂഹിക സഹായ മേഖലയിൽ 30,100 ഒഴിവുകളും നിർമാണ മേഖലയിൽ 16,300 ഒഴിവുകളും ഉണ്ടാകും. നിലവിലെ തൊഴിൽശക്തിയുടെ 20 ശതമാനത്തോളം പേർ 55 വയസ്സിന് മുകളിലുള്ളവരാണെന്നും അടുത്ത 10 വർഷത്തിനുള്ളിൽ ഇവർ വിരമിക്കുമെന്നും റിപ്പോർട്ടിൽ പറയുന്നു. താൽക്കാലിക താമസക്കാരുടെ എണ്ണം കുറയ്ക്കാനുള്ള ഫെഡറൽ സർക്കാരിന്റെ നയങ്ങളാണ് ജനസംഖ്യാ ഇടിവിന് കാരണമെന്നും പ്രവിശ്യയുടെ വളർച്ചയ്ക്ക് കുടിയേറ്റം അനിവാര്യമാണെന്നും കാംപ്ബെൽ വിലയിരുത്തി.
പ്രതിസന്ധി പരിഹരിക്കാൻ കുടിയേറ്റ നയങ്ങളിൽ മാറ്റം വരുത്തണമെന്ന് പ്രവിശ്യാ കുടിയേറ്റ കാര്യ മന്ത്രി ജീൻ-ക്ലോഡ് ഡി അമോർസ് ഇമെയിൽ വഴി അറിയിച്ചു. വിദ്യാലയങ്ങളിൽ വിദഗ്ധ തൊഴിൽ പരിശീലനം നേരത്തെ ലഭ്യമാക്കണമെന്ന് കൺസ്ട്രക്ഷൻ അസോസിയേഷൻ ആവശ്യപ്പെട്ടു. അതേസമയം, പ്രവിശ്യയിൽ വിദഗ്ധ തൊഴിൽ കോഴ്സുകൾ തിരഞ്ഞെടുക്കുന്ന വിദ്യാർഥികളുടെ എണ്ണത്തിൽ വലിയ വർധനവുണ്ടായതായി വിദ്യാഭ്യാസ വകുപ്പും ന്യൂ ബ്രൺസ്വിക്ക് കമ്മ്യൂണിറ്റി കോളേജ് അധികൃതരും വ്യക്തമാക്കുന്നുണ്ട്. എങ്കിലും നിലവിലെ പ്രതിസന്ധി മറികടക്കാൻ നിർമാണ മേഖലയ്ക്കായി മാത്രമായി പ്രത്യേക ഫെഡറൽ കുടിയേറ്റ പദ്ധതി നടപ്പിലാക്കണമെന്ന് മോറിസൺ കേന്ദ്ര സർക്കാരിനോട് ആവശ്യപ്പെട്ടു.
New Brunswick’s population decline; report says record demand for skilled workers
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=hq1tcla
