ബഹാമാസിൽ വെള്ളിയാഴ്ച ഉണ്ടായ ദാരുണമായ വിമാനാപകടത്തിൽ യാത്രക്കാരായ 10 പേരും മരണപ്പെട്ടു. ദ്വീപ് സമൂഹത്തിന്റെ തലസ്ഥാനമായ നസ്സാവുവിന് പടിഞ്ഞാറുള്ള നോർത്ത് ആൻഡ്രോസിന് സമീപം കടലിലാണ് വിമാനം തകർന്നു വീണത്. അപകടത്തിൽപ്പെട്ട ഒരാൾ രക്ഷപ്പെട്ടതായി ബഹാമാസ് പ്രധാനമന്ത്രി ഫിലിപ്പ് ബ്രേവ് ഡേവിസ് ആദ്യം അറിയിച്ചിരുന്നെങ്കിലും, ഗുരുതരമായി പരിക്കേറ്റ ഇയാൾ പിന്നീട് മരണത്തിന് കീഴടങ്ങുകയായിരുന്നു. ബഹാമാസിന്റെ 53-ാം സ്വാതന്ത്ര്യ വാർഷികം ജനങ്ങൾ ആഘോഷിക്കുന്ന വേളയിലാണ് രാജ്യത്തെ കണ്ണീരിലാഴ്ത്തിയ ഈ ദാരുണ സംഭവം നടന്നത്.
നസ്സാവുവിലെ ലിൻഡൻ പിൻഡ്ലിംഗ് അന്താരാഷ്ട്ര വിമാനത്താവളത്തിൽ നിന്ന് സാൻ ആൻഡ്രോസിലേക്ക് പുറപ്പെട്ട വിമാനമാണ് നോർത്ത് ആൻഡ്രോസിലെ കടലിൽ തകർന്നു വീണത്. ബഹാമാസിൽ രജിസ്റ്റർ ചെയ്ത ‘സെസ്ന 402’ (Cessna 402) വിഭാഗത്തിൽപ്പെട്ട ചെറിയ വിമാനമാണ് അപകടത്തിൽപ്പെട്ടതെന്ന് ബഹാമാസ് എയർക്രാഫ്റ്റ് ആക്സിഡന്റ് ഇൻവെസ്റ്റിഗേഷൻ അതോറിറ്റി വ്യക്തമാക്കി. അപകടത്തിൽ മരിച്ച ഇരകളെക്കുറിച്ചുള്ള കൂടുതൽ വിവരങ്ങൾ സുരക്ഷാ ഏജൻസികൾ ഇതുവരെ ഔദ്യോഗികമായി പുറത്തുവിട്ടിട്ടില്ല.
വിമാനാപകടത്തെത്തുടർന്ന് കടുത്ത മുൻകരുതൽ നടപടികളുമായി ബഹാമാസ് സർക്കാർ രംഗത്തെത്തി. അപകടത്തിൽപ്പെട്ട വിമാനക്കമ്പനിയായ ഫ്ലെമിംഗോ എയറിന്റെ എയർ ഓപ്പറേറ്റർ സർട്ടിഫിക്കറ്റ് മിനിസ്ട്രി ഓഫ് എനർജി, യൂട്ടിലിറ്റീസ് ആൻഡ് ഏവിയേഷൻ താല്കാലികമായി റദ്ദാക്കി. ഇതോടെ കമ്പനിയുടെ എല്ലാ സർവീസുകളും തടസ്സപ്പെട്ടു. അന്വേഷണ ഉദ്യോഗസ്ഥർ അപകടത്തിന്റെ കൃത്യമായ കാരണം കണ്ടെത്തി റിപ്പോർട്ട് സമർപ്പിക്കുന്നത് വരെ ഈ നിയന്ത്രണം തുടരുമെന്നാണ് അധികൃതർ വ്യക്തമാക്കുന്നത്.
വെള്ളിയാഴ്ച ഫ്ലെമിംഗോ എയറുമായി ബന്ധപ്പെട്ട് രണ്ട് സുരക്ഷാ വീഴ്ചകൾ ഉണ്ടായതിനെത്തുടർന്നാണ് സർവീസുകൾ നിർത്തിവെക്കാൻ മന്ത്രാലയം ഉത്തരവിട്ടത്. മായാഗുവാനയിലേക്ക് പുറപ്പെട്ട മറ്റൊരു ഫ്ലെമിംഗോ എയർ വിമാനത്തിൽ സാങ്കേതിക പ്രശ്നം ശ്രദ്ധയിൽപ്പെട്ട പൈലറ്റ് നസ്സാവുവിലേക്ക് തന്നെ അടിയന്തിരമായി തിരിച്ചിറക്കിയിരുന്നു. ഈ വിമാനം റൺവേയിൽ ലാൻഡ് ചെയ്ത് യാത്രക്കാർ പുറത്തിറങ്ങിയ ഉടൻ തന്നെ അതിന് തീപിടിക്കുകയായിരുന്നുവെന്ന് ഏവിയേഷൻ മന്ത്രി ജോബെത്ത് കോൾബി-ഡേവിസ് അറിയിച്ചു. ഈ രണ്ട് സംഭവങ്ങളെക്കുറിച്ചും നിലവിൽ വിശദമായ അന്വേഷണം ആരംഭിച്ചിട്ടുണ്ട്.
10 dead in plane crash in Bahamas; flights suspended
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt
