ഒട്ടാവ : കാനഡയുടെ ആർട്ടിഫിഷ്യൽ ഇന്റലിജൻസ് (എഐ) ഹബ്ബായി ആൽബർട്ടയെ മാറ്റുന്നതിന് നാച്ചുറൽ ഗ്യാസ് നിർണായകമാണെന്ന് പ്രീമിയർ ഡാനിയേൽ സ്മിത്ത് വ്യക്തമാക്കി. എന്നാൽ ഈ തന്ത്രം കാർബൺ പുറന്തള്ളൽ, വൈദ്യുതിയുടെ വർധിച്ച ആവശ്യം എന്നിവയിൽ ആശങ്കയുണ്ടാക്കുന്നതായി വിദഗ്ധരും പ്രദേശവാസികളും ചൂണ്ടിക്കാട്ടുന്നു. ആണവ, ജലവൈദ്യുത പദ്ധതികളുടെ നിർമാണത്തിന് ദശാബ്ദങ്ങൾ എടുത്തേക്കാമെന്നതിനാലും, കാറ്റിൽനിന്നും സൗരോർജ്ജത്തിൽ നിന്നുമുള്ള വൈദ്യുതിക്ക് പകര സംവിധാനം ആവശ്യമായതിനാലും നാച്ചുറൽ ഗ്യാസ് അടിസ്ഥാനപരമായി ആവശ്യമാണെന്ന് ഗ്ലോബൽ എനർജി ഷോയിൽ സ്മിത്ത് പറഞ്ഞു. 2030-ഓടെ ഡാറ്റാ സെന്റർ വികസനത്തിലൂടെ 100 ബില്യൺ ഡോളറിന്റെ നിക്ഷേപം ആകർഷിക്കുകയാണ് ആൽബെർട്ട ലക്ഷ്യമിടുന്നത്.
ആൽബർട്ടയിലെ ഓൾഡ്സ് നഗരത്തിൽ സിനാപ്സ് ഡാറ്റാ സെന്റർ ഇൻകോർപ്പറേറ്റഡ് നിർദ്ദേശിച്ച 10 ബില്യൺ ഡോളറിന്റെ എഐ ഡാറ്റാ സെന്റർ പദ്ധതിക്കെതിരെ പ്രദേശവാസികളിൽ നിന്ന് ശക്തമായ എതിർപ്പാണ് ഉയരുന്നത്. ഇവിടെ നിർമ്മിക്കാൻ ഉദ്ദേശിക്കുന്ന പ്രകൃതിവാതക വൈദ്യുത നിലയത്തിൽ നിന്നുള്ള കാർബൺ പുറന്തള്ളൽ, ശബ്ദമലിനീകരണം, സുരക്ഷ എന്നിവയിൽ നാട്ടുകാർ ആശങ്ക പ്രകടിപ്പിച്ചു. അതേസമയം, ആൽബർട്ടയിൽ കർശനമായ നിയന്ത്രണങ്ങളുണ്ടെന്നും സുരക്ഷയ്ക്കാണ് മുൻഗണനയെന്നും സിനാപ്സ് സിഇഒ ജേസൺ വാൻ ഗാൽ അറിയിച്ചു. പദ്ധതിയിലൂടെ ആയിരത്തിലധികം സ്ഥിരമായ തൊഴിലവസരങ്ങളും രണ്ടായിരത്തോളം നിർമാണ തൊഴിലവസരങ്ങളും ലഭിക്കുമെന്നും അദ്ദേഹം കൂട്ടിച്ചേർത്തു.
സാമ്പത്തിക വളർച്ചയും നികുതി വരുമാനവും തൊഴിലവസരങ്ങളും പദ്ധതി ഉറപ്പുനൽകുന്നുണ്ടെങ്കിലും, സുരക്ഷിതമായും ഉത്തരവാദിത്തത്തോടെയും ജനങ്ങളുടെ ജീവിതത്തെ ബാധിക്കാത്ത രീതിയിലും മാത്രമേ ഇത് നടപ്പിലാക്കാവൂ എന്ന് ഓൾഡ്സ് മേയർ ഡാൻ ഡെയ്ലി വ്യക്തമാക്കി. നിലവിൽ നിർദ്ദിഷ്ട വൈദ്യുത നിലയത്തിന്റെ അനുമതി അപേക്ഷ ആൽബർട്ട യൂട്ടിലിറ്റീസ് കമ്മീഷന്റെ പുനരവലോകനത്തിലാണ്. കമ്പനിയിൽ നിന്ന് കൂടുതൽ വിവരങ്ങൾ ശേഖരിക്കുന്നതിനായി കമ്മീഷൻ ചില നടപടികൾ താൽക്കാലികമായി നിർത്തിവെച്ചിരിക്കുകയാണ്. സിനാപ്സിന്റെ മറുപടികൾ ലഭിച്ച ശേഷം തുടർനടപടികൾ അറിയിക്കുമെന്ന് കമ്മീഷൻ വ്യക്തമാക്കി.
Premier says natural gas is crucial to Alberta’s AI development; experts and locals are concerned
📢 കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=hq1tcla
