ന്യൂ ബ്രൺസ്വിക്ക്: ന്യൂ ബ്രൺസ്വിക്കിൽ നൂറ്റാണ്ടിലധികം പഴക്കമുള്ള ചരിത്രപ്രസിദ്ധമായ ‘കൗച്ചിബോഗ്വാക്’ (Kouchibouguac) ഡാം പൊളിച്ചുനീക്കുന്നു. 1917-ൽ നിർമ്മിച്ച ഈ അണക്കെട്ട് പ്രദേശവാസികളുടെ ഓർമ്മകളിലും ചരിത്രത്തിലും വലിയൊരു ഭാഗമാണ്.റിച്ചാർഡ് ഒ’ലിയറി എന്ന പ്രാദേശിക സംരംഭകൻ ഒരു തടിമില്ലിനോട് ചേർന്ന് നിർമ്മിച്ച ഈ കെട്ടിടം പിന്നീട് 1939-ൽ എൻ.ബി പവർ (NB Power) ഏറ്റെടുക്കുകയായിരുന്നു. ന്യൂ ബ്രൺസ്വിക്കിലെ ആദ്യത്തെ ഹൈഡ്രോ ഇലക്ട്രിക് ഡാമുകളിൽ ഒന്നായിരുന്നു ഇത്. പ്രദേശത്തെ റിച്ചിബുക്റ്റോ, റെക്സ്റ്റൺ, സെന്റ്-ലൂയിസ് ഡി കെന്റ് എന്നീ ഗ്രാമങ്ങളിലേക്ക് വൈദ്യുതി എത്തിച്ചിരുന്നത് ഈ ഡാമിൽ നിന്നായിരുന്നു. 1953-ൽ പ്രവർത്തനം നിർത്തിയെങ്കിലും, ഈ പ്രദേശം ഒരു ചരിത്ര സ്മാരകം പോലെയാണ് നാട്ടുകാർ കണ്ടിരുന്നത്.
അണക്കെട്ട് മത്സ്യങ്ങളുടെ സ്വാഭാവിക സഞ്ചാരത്തിന് തടസ്സമാകുന്നുവെന്ന് കാണിച്ച് ‘ഫിഷറീസ് ആൻഡ് ഓഷ്യൻസ് കാനഡ’ (DFO) ആണ് ഡാം പൊളിച്ചുനീക്കാൻ തീരുമാനിച്ചത്. അറ്റ്ലാന്റിക് സാൽമൺ, അമേരിക്കൻ ഈൽ, ബ്രൂക്ക് ട്രൗട്ട് തുടങ്ങിയ മത്സ്യങ്ങൾക്ക് നദിയിലൂടെ സ്വതന്ത്രമായി സഞ്ചരിക്കാൻ അവസരമൊരുക്കുകയാണ് ഇതിന്റെ ലക്ഷ്യമെന്ന് അധികൃതർ വ്യക്തമാക്കുന്നു. ഈ വർഷം ശരത്കാലത്തോടെ പദ്ധതി പൂർത്തിയാകും.
ഡാം പൊളിക്കുന്നതിൽ പ്രദേശവാസികൾ കടുത്ത അതൃപ്തിയിലാണ്. യാതൊരുവിധ മുന്നറിയിപ്പുമില്ലാതെയാണ് തങ്ങളുടെ ചരിത്രം ഇല്ലാതാക്കുന്നതെന്ന് മുറെ ട്വീഡി എന്ന നാട്ടുകാരൻ പറയുന്നു. തന്റെ പിതാവ് ജനിച്ചത് ഡാമിനോട് ചേർന്നുള്ള ഒരു കല്ല് വീട്ടിലാണ്. ഇത്തരമൊരു പൈതൃകം ഇല്ലാതാകുന്നത് വേദനിപ്പിക്കുന്നതാണെന്ന് അദ്ദേഹം കൂട്ടിച്ചേർത്തു. കൂടാതെ, ഡാം ഇല്ലാതാകുന്നതോടെ ശൈത്യകാലത്ത് മഞ്ഞ് കുന്നുകൂടി പ്രദേശത്ത് വെള്ളപ്പൊക്കത്തിന് കാരണമാകുമോ എന്ന ആശങ്കയും നാട്ടുകാർ പങ്കുവെക്കുന്നു.
Historic New Brunswick dam being demolished
📢 കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=hq1tcla
