വാൻകൂവർ: 2026 ഫിഫ ലോകകപ്പിന് മുന്നോടിയായി ബ്രിട്ടീഷ് കൊളംബിയയിലുള്ള ഗ്രൗസ് മൗണ്ടൻ മലമുകളിൽ ‘മെഗാ’ കനേഡിയൻ പതാക സ്ഥാപിച്ചു. വാൻകൂവർ നഗരത്തിൽ എത്തുന്ന അന്താരാഷ്ട്ര സന്ദർശകരെ സ്വാഗതം ചെയ്യുന്നതിനും കനേഡിയൻ ഫുട്ബോൾ ടീമിന് പിന്തുണ പ്രഖ്യാപിക്കുന്നതിനുമായാണ് ഗ്രൗസ് മൗണ്ടൻ റിസോർട്ട് അധികൃതർ ഈ വമ്പൻ പതാക ഒരുക്കിയത്. മലമുകളിൽ വിരിച്ച ഏറ്റവും വലിയ പതാക എന്ന വിഭാഗത്തിൽ ഗിന്നസ് വേൾഡ് റെക്കോർഡ് നേടുകയാണ് ഈ ശ്രമത്തിന് പിന്നിലെ പ്രധാന ലക്ഷ്യം. 70-ലധികം ആളുകൾ ചേർന്നാണ് വാൻകൂവർ നഗരത്തിന് അഭിമുഖമായുള്ള സ്കീ റണ്ണിൽ ഈ പതാക വിജയകരമായി വിരിച്ചത്.
160 മീറ്റർ നീളവും 80 മീറ്റർ വീതിയുമുള്ള ഈ കനേഡിയൻ പതാകയ്ക്ക് ഏകദേശം രണ്ട് ഫുട്ബോൾ മൈതാനങ്ങളുടെ വലുപ്പമുണ്ട്. ഇതിന്റെ ആകെ ഭാരം 1,360 കിലോഗ്രാമാണ് (3,000 പൗണ്ട്). നിലവിൽ മലമുകളിൽ വിരിച്ച ഏറ്റവും വലിയ പതാകയുടെ റെക്കോർഡ് 140 മീറ്റർ നീളവും 70 മീറ്റർ വീതിയുമുള്ള മംഗോളിയൻ പതാകയുടെ പേരിലാണ്. ഈ റെക്കോർഡ് മറികടക്കാനാണ് കാനഡയുടെ ശ്രമം. മലമുകളിൽ നിന്ന് മാത്രമല്ല, നഗരത്തിന്റെ വിവിധ ഭാഗങ്ങളിൽ നിന്നും ആകാശത്തുനിന്നും വ്യക്തമായി കാണാൻ കഴിയുന്ന രീതിയിലാണ് ഇത് ക്രമീകരിച്ചിരിക്കുന്നതെന്ന് ഗ്രൗസ് മൗണ്ടൻ റിസോർട്ട് മാർക്കറ്റിംഗ് സീനിയർ ഡയറക്ടർ ആഡം റൂട്ട്മാൻ അറിയിച്ചു.
അതേസമയം, പതാകയുടെ പ്രദർശന രീതിയെക്കുറിച്ച് ചില കേന്ദ്രങ്ങളിൽ നിന്ന് വിമർശനങ്ങളും ഉയർന്നിട്ടുണ്ട്. കാനഡ സർക്കാരിന്റെ ഔദ്യോഗിക മാർഗനിർദേശ പ്രകാരം ദേശീയ പതാക നിലത്ത് തൊടാൻ പാടില്ലെന്ന നിയമം ലംഘിക്കപ്പെട്ടു എന്നാണ് പ്രധാന ആക്ഷേപം. എന്നാൽ മലയുടെ ചരിവും വിവിധ കോണുകളിൽ നിന്നുള്ള കാഴ്ചയും പരിഗണിച്ചാണ് പതാക നിലവിൽ കാണുന്ന ദിശയിൽ സ്ഥാപിച്ചതെന്ന് അധികൃതർ വിശദീകരിച്ചു. രാജ്യത്തോടുള്ള ആദരവ് പ്രകടിപ്പിക്കാൻ മാത്രമാണ് ഈ പദ്ധതി ലക്ഷ്യമിട്ടതെന്നും, പതാകയുടെ സ്ഥാനത്തിൽ മാറ്റം വരുത്താൻ ഉദ്ദേശിക്കുന്നില്ലെന്നും റിസോർട്ട് മാനേജ്മെന്റ് വ്യക്തമാക്കി. ഗിന്നസ് അധികൃതരുടെ ഔദ്യോഗിക പരിശോധന വരും ദിവസങ്ങളിൽ നടക്കും.
📢 കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=hq1tcla
Vancouver to welcome the World Cup; 'Mega' Canadian flag unfurls on top of the mountain, aiming for Guinness World Record!
