ഒന്റാരിയോ: ഒന്റാരിയോയിലുള്ള മറൈൻലാൻഡ് പാർക്കിൽ ശേഷിക്കുന്ന 30 ബെലൂഗ തിമിംഗലങ്ങളെ സ്പെയിനിലെയും അമേരിക്കയിലെയും വിവിധ അക്വേറിയങ്ങളിലേക്ക് മാറ്റാൻ കാനഡ സർക്കാർ അനുമതി നൽകി. പാർക്ക് അടച്ചുപൂട്ടിയതിനെ തുടർന്ന് കഴിഞ്ഞ വർഷം മുതൽ ദയാവധ ഭീഷണിയിലായിരുന്ന തിമിംഗലങ്ങളെ സംരക്ഷിക്കുന്നതിനാണ് കാനഡയുടെ മത്സ്യ-സമുദ്ര വകുപ്പ് (DFO) കഴിഞ്ഞ ആഴ്ച ഈ രക്ഷാപദ്ധതിക്ക് അംഗീകാരം നൽകിയത്. പുതിയ തീരുമാനപ്രകാരം ഇവയെ സ്പെയിനിലെ ഓഷ്യനോഗ്രാഫിക് വലൻസിയ അക്വേറിയത്തിലേക്കും അമേരിക്കയിലെ ജോർജിയ, ഷെഡ്, സീവേൾഡ് ഉൾപ്പെടെയുള്ള നാല് പ്രമുഖ കേന്ദ്രങ്ങളിലേക്കും വിഭജിച്ച് മാറ്റാനാണ് അധികൃതർ ലക്ഷ്യമിടുന്നത്.
പാർക്കിന്റെ ഉടമകളായ ജോൺ ഹോളർ, മേരി ഹോളർ എന്നിവരുടെ മരണത്തെ തുടർന്ന് 2024-ലാണ് നയാഗ്ര ഫാൾസിലെ ഈ സമുദ്ര പാർക്ക് പൊതുജനങ്ങൾക്കായി അടച്ചത്. തുടർന്ന് 2025-ൽ ഈ തിമിംഗലങ്ങളെ ചൈനയിലെ ഒരു പാർക്കിലേക്ക് മാറ്റാൻ ശ്രമിച്ചെങ്കിലും കാനഡ സർക്കാർ അനുമതി നിഷേധിച്ചിരുന്നു. ഇതോടെയാണ് തിമിംഗലങ്ങൾ കടുത്ത ദയാവധ ഭീഷണിയിലായതും മൃഗക്ഷേമ പ്രവർത്തകർ ആശങ്ക ഉന്നയിച്ചതും. നിലവിൽ പാർക്കിലെ ജീവനക്കാർ തന്നെയാണ് ഈ ജീവികളെ പരിപാലിക്കുന്നത്. യുദ്ധബാധിത പ്രദേശമായ യുക്രൈനിൽ നിന്ന് മുൻപ് വിജയകരമായി ബെലൂഗകളെ രക്ഷപെടുത്തിയ ചരിത്രമുള്ള രാജ്യാന്തര വിദഗ്ധ സംഘമാണ് കാനഡയിലെ ഈ പുനരധിവാസ ദൗത്യത്തിനും നേതൃത്വം നൽകുന്നത്.
വരും ആഴ്ചകളിൽ തന്നെ തിമിംഗലങ്ങളെ മാറ്റാനുള്ള നടപടികൾ ആരംഭിക്കുമെന്ന് ദൗത്യത്തിൽ പങ്കാളികളായ ഷെഡ് അക്വേറിയം അധികൃതർ വ്യക്തമാക്കി. എന്നാൽ യാത്രയ്ക്ക് മുൻപായി ഓരോ തിമിംഗലത്തിന്റെയും ആരോഗ്യനില കാനഡയിലെ മൃഗഡോക്ടർമാർ പരിശോധിച്ച് ഉറപ്പുവരുത്തേണ്ടതുണ്ട്. കൂടാതെ അമേരിക്ക, സ്പെയിൻ എന്നീ രാജ്യങ്ങളുടെ ഇറക്കുമതി അനുമതിയും കാനഡ സർക്കാരിന്റെ അന്തിമ കയറ്റുമതി ലൈസൻസും ലഭിച്ച ശേഷമായിരിക്കും തിമിംഗലങ്ങളുടെ ദീർഘദൂര യാത്ര ആരംഭിക്കുക. പദ്ധതി വിജയകരമായാൽ കാനഡയുടെ ചരിത്രത്തിലെ ഏറ്റവും വലിയ സമുദ്ര ജീവി പുനരധിവാസ ദൗത്യങ്ങളിലൊന്നായി ഇത് മാറും.
📢 കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=hq1tcla
Canada approves relocation of remaining 30 belugas at Marineland to Spain and US
