ടൊറന്റോ: കാനഡ പോസ്റ്റും തപാൽ തൊഴിലാളികളുടെ യൂണിയനും തമ്മിൽ വർഷങ്ങളായി നിലനിന്നിരുന്ന തർക്കങ്ങൾക്കും പണിമുടക്കുകൾക്കും ഒടുവിൽ പരിഹാരമായി. ജീവനക്കാർക്കായി മാനേജ്മെന്റ് മുന്നോട്ടുവെച്ച പുതിയ താൽക്കാലിക തൊഴിൽ കരാർ വൻ ഭൂരിപക്ഷത്തോടെ തൊഴിലാളികൾ വോട്ട് ചെയ്ത് അംഗീകരിച്ചു. ഏകദേശം 55,000 തപാൽ ജീവനക്കാരെ പ്രതിനിധീകരിക്കുന്ന കനേഡിയൻ യൂണിയൻ ഓഫ് പോസ്റ്റൽ വർക്കേഴ്സ് (CUPW) നടത്തിയ വോട്ടെടുപ്പിൽ 85.9 ശതമാനം പേരും കരാറിനെ അനുകൂലിച്ചതോടെയാണ് ദീർഘകാലമായി തുടർന്നുവന്ന അനിശ്ചിതത്വത്തിന് വിരാമമായത്. ഏപ്രിൽ 20 മുതൽ മേയ് 30 വരെയായിരുന്നു ജീവനക്കാർക്കിടയിൽ വോട്ടെടുപ്പ് നടന്നത്.
ശമ്പള വർധനവ്, തപാൽ സേവനങ്ങളിലെ ഘടനാപരമായ മാറ്റങ്ങൾ എന്നിവയെച്ചൊല്ലി കാനഡ പോസ്റ്റും യൂണിയനും തമ്മിൽ ദീർഘനാളായി ചർച്ചകൾ നടന്നു വരികയായിരുന്നു. ഇതിനിടെ തൊഴിലാളികൾ പലതവണ രാജ്യവ്യാപകമായി സമരരംഗത്തിറങ്ങുകയും ചെയ്തു. എന്നാൽ പുതിയ കരാർ പ്രകാരം ആദ്യവർഷം 6.5 ശതമാനവും രണ്ടാം വർഷം 3 ശതമാനവും ശമ്പള വർധനവ് ജീവനക്കാർക്ക് ലഭിക്കും. കൂടാതെ മൂന്നാം വർഷം മുതൽ അഞ്ചാം വർഷം വരെ പണപ്പെരുപ്പ നിരക്കിന് അനുസരിച്ചുള്ള വേതന വർധനവും വാരാന്ത്യ പാർസൽ വിതരണ സംവിധാനവും കരാറിന്റെ ഭാഗമാണ്. ഏറെ വെല്ലുവിളികൾ നിറഞ്ഞ ചർച്ചകൾക്കൊടുവിലാണ് ഈ നേട്ടമെന്ന് യൂണിയൻ ദേശീയ പ്രസിഡന്റ് ജാൻ സിംപ്സൺ വ്യക്തമാക്കി.
കടുത്ത സാമ്പത്തിക പ്രതിസന്ധിയിലൂടെ കടന്നുപോകുന്ന കാനഡ പോസ്റ്റിന് പുതിയ കരാർ വലിയ ആശ്വാസമാകും. ഈ വർഷത്തെ ആദ്യത്തെ മൂന്ന് മാസങ്ങളിൽ മാത്രം 205 മില്യൺ ഡോളറിന്റെ നഷ്ടമാണ് സ്ഥാപനം രേഖപ്പെടുത്തിയത്. സ്വകാര്യ കൊറിയർ കമ്പനികളിൽ നിന്നുള്ള മത്സരവും വർധിച്ച കടബാധ്യതയുമാണ് കാനഡ പോസ്റ്റിനെ പ്രതിസന്ധിയിലാക്കിയത്. പുതിയ കരാർ നിലവിൽ വന്നതോടെ സ്ഥാപനത്തിൽ തൊഴിൽപരമായ സ്ഥിരത കൈവരുമെന്നും, ജനവിശ്വാസം വീണ്ടെടുത്ത് സേവനങ്ങൾ കൂടുതൽ നവീകരിക്കാൻ സാധിക്കുമെന്നും കാനഡ പോസ്റ്റ് സിഇഓ ഡഗ് എറ്റിംഗർ പ്രതീക്ഷ പ്രകടിപ്പിച്ചു.
📢 കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=hq1tcla
Dispute ends; Canada Post employees agree to temporary contract
