ഒട്ടാവ: കാനഡയിലെ ഫെഡറൽ കോടതികളിൽ എത്തുന്ന കുടിയേറ്റ കേസുകളുടെ എണ്ണത്തിൽ വൻ വർധനവ്. വിസ അപേക്ഷകൾ വേഗത്തിൽ തീർപ്പാക്കാൻ കാനഡ സർക്കാർ ആർട്ടിഫിഷ്യൽ ഇന്റലിജൻസും (AI) ഓട്ടോമേഷൻ സംവിധാനങ്ങളും വ്യാപകമായി ഉപയോഗിക്കുന്നതാണ് കേസുകൾ പെരുകാൻ കാരണമെന്ന് കുടിയേറ്റ അഭിഭാഷകർ ആരോപിക്കുന്നു. എന്നാൽ ഈ ആരോപണം തള്ളിയ ഇമിഗ്രേഷൻ വകുപ്പ്, അപേക്ഷകളുടെ എണ്ണത്തിലുണ്ടായ പൊതുവായ വർധനവാണ് കോടതി കേസുകൾ കൂടാൻ കാരണമെന്ന് വ്യക്തമാക്കി.
ലഭ്യമായ പുതിയ കണക്കുകൾ പ്രകാരം 2020-ൽ 6,400 ആയിരുന്ന കുടിയേറ്റ കേസുകൾ, കഴിഞ്ഞ വർഷം 28,000 കടന്നു. ഈ വർഷത്തെ ആദ്യ മൂന്ന് മാസങ്ങളിൽ മാത്രം ആറായിരത്തിലധികം കേസുകളാണ് കോടതിയിലെത്തിയത്. കമ്പ്യൂട്ടർ സോഫ്റ്റ്വെയറുകൾ ഉപയോഗിച്ച് അപേക്ഷകൾ പരിശോധിക്കുമ്പോൾ പലതിലും കൃത്യമായ വിലയിരുത്തൽ നടക്കുന്നില്ലെന്നും, മുൻകാലങ്ങളെ അപേക്ഷിച്ച് വിസ നിരസിക്കുന്നതിനുള്ള കാരണങ്ങൾ പൊതുവായ വാചകങ്ങളിൽ ഒതുക്കുകയാണെന്നുമാണ് അഭിഭാഷകരുടെ പ്രധാന പരാതി. ഇത് വിസ നടപടികളിൽ പിഴവുകൾ വരുത്തുകയും ആളുകളെ കോടതിയെ സമീപിക്കാൻ നിർബന്ധിതരാക്കുകയും ചെയ്യുന്നു.
അതേസമയം, അപേക്ഷകൾ തരംതിരിക്കാനും ഫയലുകൾ വേഗത്തിൽ നീക്കാനും മാത്രമാണ് സാങ്കേതികവിദ്യ ഉപയോഗിക്കുന്നതെന്നും അന്തിമ തീരുമാനങ്ങൾ എടുക്കുന്നത് ഉദ്യോഗസ്ഥർ നേരിട്ടാണെന്നും ഇമിഗ്രേഷൻ മന്ത്രാലയം വിശദീകരിച്ചു. കോടതിയിലെത്തുന്ന കേസുകളിൽ 86 ശതമാനവും കുടിയേറ്റവുമായി ബന്ധപ്പെട്ടതാണെന്നിരിക്കെ, നിലവിലുള്ള കുറഞ്ഞ എണ്ണം ജഡ്ജിമാരെ വെച്ച് ഇത്രയും ഫയലുകൾ കൈകാര്യം ചെയ്യുന്നത് പ്രതിസന്ധി സൃഷ്ടിക്കുന്നുണ്ട്. ജഡ്ജിമാരുടെ എണ്ണം വർധിപ്പിക്കുകയാണ് ഇതിന് ശാശ്വത പരിഹാരമെന്നാണ് നിയമവിദഗ്ദ്ധർ ചൂണ്ടിക്കാണിക്കുന്നത്.
📢 കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=hq1tcla
Immigration cases are increasing sharply in Canada; Allegation that the villain is 'AI': Immigration Ministry denies the allegation
