കാൽഗറി : കാൽഗറിയിലെ രണ്ട് സുപ്രധാന മണ്ഡലങ്ങളിൽ ജനാധിപത്യപരമായ നാമനിർദ്ദേശ പ്രക്രിയ ഒഴിവാക്കി, കൺസർവേറ്റിവ് പാർട്ടി സ്ഥാനാർത്ഥികളെ തിരഞ്ഞെടുത്തത് പ്രാദേശിക പ്രവർത്തകരുടെ വ്യാപകമായ പ്രതിഷേധത്തിന് കാരണമായിരിക്കുന്നു. ദൽവിന്ദർ ഗിൽ, അമൻപ്രീത് സിംഗ് ഗിൽ എന്നിവരെയാണ് ഈ രണ്ട് മണ്ഡലങ്ങളിലേക്ക് യഥാക്രമം നിയമിച്ചത്.
ഒരു വർഷത്തിലധികമായി അംഗത്വങ്ങളെ എത്തിച്ചും പ്രചാരണ പ്രവർത്തനങ്ങൾ നടത്തിയും പ്രവർത്തിച്ച നസീം ചൗധരി, രൺവീർ പർമാർ തുടങ്ങിയ പ്രവർത്തകരെ വ്യക്തമായ വിശദീകരണമൊന്നും നൽകാതെയാണ് അയോഗ്യരാക്കിയത്. നാമനിർദ്ദേശ പ്രക്രിയകൾ അട്ടിമറിച്ച് നേരിട്ടുള്ള നിയമനം നടത്തിയത് പാർട്ടിയിലെ ജനാധിപത്യ മൂല്യങ്ങളെക്കുറിച്ച് ഗുരുതരമായ ചോദ്യങ്ങൾ ഉയർത്തുന്നുണ്ട്.”ആയിരങ്ങളോളം പാർട്ടി അംഗത്വങ്ങളെ എത്തിച്ചു, നിരവധി പൊതുപരിപാടികൾ സംഘടിപ്പിച്ചു, എന്നിട്ടും ഞങ്ങളെ കാരണമൊന്നും പറയാതെ പുറത്താക്കി. പാർട്ടി നേതൃത്വം വാചാലമാകുന്ന ജനാധിപത്യ ആശയങ്ങൾക്ക് നിരക്കാത്ത പെരുമാറ്റമാണിത്,” എന്ന് അവഗണിക്കപ്പെട്ട സ്ഥാനാർത്ഥി കുറ്റപ്പെടുത്തി.
പുറത്താക്കപ്പെട്ട സ്ഥാനാർത്ഥികളുടെ പിന്തുണക്കാർ വരുന്ന തെരഞ്ഞെടുപ്പിൽ വോട്ടിംഗ് ബഹിഷ്കരിക്കുകയോ ലിബറൽ പാർട്ടിയുടെ പക്ഷത്തേക്ക് ചേക്കേറുകയോ ചെയ്തേക്കാമെന്ന ഭീതി പരക്കുന്നുണ്ട്. കാനഡയിലെ മറ്റ് പ്രദേശങ്ങളിലും ഇതേ തരത്തിലുള്ള പ്രശ്നങ്ങൾ റിപ്പോർട്ട് ചെയ്യപ്പെട്ടിട്ടുണ്ട്, ഇത് കൺസർവേറ്റിവ് പാർട്ടിയുടെ സ്ഥാനാർത്ഥി നിയമന പ്രക്രിയയിലുള്ള വിശാലമായ അസംതൃപ്തി വെളിപ്പെടുത്തുന്നു.
