കുടുംബ പിന്തുണാ പദ്ധതികൾ നിലച്ചു
2025-2026 സാമ്പത്തിക വർഷത്തേക്കുള്ള ജോർഡാൻസ് പ്രിൻസിപ്പിൾ ഫണ്ടിംഗ് ലഭിക്കാത്തതിനെ തുടർന്ന് കൗൺസിൽ ഓഫ് യൂക്കോൺ ഫസ്റ്റ് നേഷൻസ് (CYFN) ഭക്ഷണം, കുട്ടികളുടെ വസ്ത്രങ്ങൾ, താൽക്കാലിക പാർപ്പിടം, റെസ്പൈറ്റ് കെയർ തുടങ്ങിയ നിരവധി കുടുംബ പിന്തുണാ പദ്ധതികൾ റദ്ദാക്കി. സാധാരണയായി ജനുവരിയിൽ ഫണ്ടിംഗ് സ്ഥിരീകരിക്കപ്പെടാറുണ്ടെങ്കിലും, ഈ വർഷം മാർച്ച് 22-ന് മാത്രമാണ് സ്ഥിരീകരിച്ചത്, എന്നിട്ടും അപേക്ഷകൾ സ്വീകരിക്കാൻ തുടങ്ങിയിട്ടില്ല.
2016-ൽ സ്ഥാപിതമായ ജോർഡാൻസ് പ്രിൻസിപ്പിൾ, അധികാര പരിധി തർക്കങ്ങളില്ലാതെ ഫസ്റ്റ് നേഷൻസ് കുട്ടികൾക്ക് സർക്കാർ ഫണ്ടുള്ള സേവനങ്ങൾ ലഭ്യമാക്കുന്നുണ്ടെന്ന് ഉറപ്പാക്കുന്നു.എന്നിരുന്നാലും, ഇന്ത്യൻ സർവീസസ് കാനഡ (ISC) ഇപ്പോൾ അധിക രേഖകൾ ആവശ്യപ്പെടുകയും, അനുവദനീയമായ സേവനങ്ങളുടെ പട്ടിക വെട്ടിച്ചുരുക്കുകയും ചെയ്തിരിക്കുന്നു. ഈ നടപടികൾ വലിയ കാലതാമസം ഉണ്ടാക്കുകയും, ഗുണഭോക്താക്കളായ കുടുംബങ്ങൾക്ക് സാമ്പത്തികവും മാനസികവുമായ സമ്മർദ്ദം സൃഷ്ടിക്കുകയും ചെയ്യുന്നു.
“ഈ സഹായങ്ങൾ നിലച്ചതോടെ ഞങ്ങൾ പൂർണ്ണമായും നിസ്സഹായരായിരിക്കുന്നു,” എന്ന് ഒറ്റയ്ക്ക് മക്കളെ വളർത്തുന്ന ആഷ്ലി റസ്സൽ തന്റെ വേദന പങ്കുവച്ചു. പദ്ധതിയുടെ അനിശ്ചിതത്വം സംബന്ധിച്ച് കൗൺസിൽ ഓഫ് യൂക്കോൺ ഫസ്റ്റ് നേഷൻസ് (CYFN) ഇന്ത്യൻ സർവീസസ് കാനഡയിൽ (ISC) നിന്ന് കൂടുതൽ വിശദീകരണം ആവശ്യപ്പെട്ടിട്ടുണ്ട്. രാജ്യത്തുടനീളം 135,000-ത്തിലധികം ജോർഡാൻസ് പ്രിൻസിപ്പിൾ അപേക്ഷകൾ തീർപ്പാകാതെ കെട്ടിക്കിടക്കുന്നതായി CYFN അറിയിച്ചു. പദ്ധതിയിൽ വരുത്തിയ മാറ്റങ്ങൾ ദീർഘകാല സുസ്ഥിരതയ്ക്ക് വേണ്ടിയാണെന്ന് സർക്കാർ അവകാശപ്പെടുമ്പോഴും, ഈ പദ്ധതിയെ ആശ്രയിച്ചിരുന്ന നിരവധി കുടുംബങ്ങൾ തങ്ങൾ കൈവിടപ്പെട്ടതായും അവഗണിക്കപ്പെട്ടതായും കണക്കാക്കുന്നു.
