ടൊറന്റോ: പ്രവാസജീവിതം അവസാനിപ്പിച്ച് സ്വന്തം നാട്ടിലേക്ക് മടങ്ങുന്നത് വലിയൊരു ആശ്വാസമായിരിക്കുമെന്നാണ് പൊതുവെ എല്ലാവരും കരുതുന്നത്. എന്നാൽ, വർഷങ്ങൾക്ക് ശേഷമുള്ള ഈ മടങ്ങിവരവ് പ്രവാസലോകത്തെക്കാൾ വലിയ ഏകാന്തതയും മാനസിക ബുദ്ധിമുട്ടുകളുമാണ് സമ്മാനിക്കുന്നതെന്ന് തുറന്നുപറയുകയാണ് മരിയ പൊളാൻസ്കി എന്ന യുവതി. അഞ്ച് വർഷത്തെ യുകെ ജീവിതത്തിന് ശേഷം ജന്മനാടായ കാനഡയിലേക്ക് തിരിച്ചെത്തിയപ്പോഴുള്ള തന്റെ അനുഭവങ്ങളാണ് മരിയ ഒരു മാധ്യമത്തിൽ പങ്കുവെച്ച ലേഖനത്തിലൂടെ വ്യക്തമാക്കുന്നത്.
വിദേശത്തേക്ക് പോകുമ്പോൾ പുതിയ സംസ്കാരവുമായി പൊരുത്തപ്പെടാനും ഭാഷാപരമായ ബുദ്ധിമുട്ടുകൾ മറികടക്കാനും ആളുകൾ പ്രയാസപ്പെടാറുണ്ട്. എന്നാൽ അതിനേക്കാൾ കഠിനമാണ് സ്വന്തം നാട്ടിലേക്ക് തിരിച്ചെത്തുമ്പോൾ പഴയ സൗഹൃദങ്ങൾ വീണ്ടെടുക്കുന്നതെന്ന് മരിയ പറയുന്നു. ലോജിസ്റ്റിക്കൽ കാര്യങ്ങളോ പുതിയ അപ്പാർട്ട്മെന്റ് കണ്ടെത്തുന്നതോ ഒക്കെയായിരിക്കും കാനഡയിൽ തിരിച്ചെത്തുമ്പോൾ നേരിടേണ്ടി വരുന്ന പ്രധാന വെല്ലുവിളികൾ എന്നാണ് മരിയ കരുതിയിരുന്നത്. എന്നാൽ ഏറ്റവും കൂടുതൽ നിരാശപ്പെടുത്തിയത് ജീവനുതുല്യം സ്നേഹിച്ച സൗഹൃദങ്ങളുടെ തകർച്ചയായിരുന്നു.
യുകെയിലായിരുന്നപ്പോൾ സോഷ്യൽ മീഡിയ വഴിയും നാട്ടിൽ വരുമ്പോഴും സുഹൃത്തുക്കളുമായി മരിയ നിരന്തരം ബന്ധം പുലർത്തിയിരുന്നു. എന്നാൽ കാനഡയിൽ സ്ഥിരമായി തിരിച്ചെത്തിയപ്പോൾ പഴയ ആവേശം സുഹൃത്തുക്കളിൽ ആർക്കും ഉണ്ടായിരുന്നില്ലെന്ന് മരിയ വ്യക്തമാക്കുന്നു. ഇരുപതുകളിൽ ഒപ്പം നടന്ന് ആഘോഷിച്ചവർ വെറും ‘പാർട്ടി സുഹൃത്തുക്കൾ’ മാത്രമായിരുന്നുവെന്നും ഒരു നിശ്ചിത സമയത്തിനപ്പുറം ആഴത്തിലുള്ള ബന്ധം സൂക്ഷിക്കാൻ പലർക്കും കഴിഞ്ഞിരുന്നില്ലെന്നും മരിയ തിരിച്ചറിയുന്നു.
യുകെയിൽ ആയിരുന്നപ്പോൾ മറ്റ് രാജ്യങ്ങളിൽ നിന്നുള്ളവരുമായി എളുപ്പത്തിൽ സൗഹൃദം സ്ഥാപിക്കാൻ കഴിഞ്ഞിരുന്നു. എന്നാൽ സ്വന്തം നാട്ടിൽ പുതിയൊരു സൗഹൃദവലയം പൂജ്യത്തിൽ നിന്ന് തുടങ്ങേണ്ടി വരുന്നത് കടുത്ത വെല്ലുവിളിയാണ് ഉയർത്തുന്നത്. എങ്കിലും പഴയ പല സൗഹൃദങ്ങളും നഷ്ടപ്പെട്ടതിൽ സങ്കടപ്പെടാതെ പുതിയ മനുഷ്യരെ പരിചയപ്പെടാനും അയൽക്കാരുമായും സഹപ്രവർത്തകരുമായും കൂടുതൽ അടുക്കാനുമുള്ള അവസരമായാണ് മരിയ ഇതിനെ കാണുന്നത്. ചില മനുഷ്യർ നമ്മുടെ ജീവിതത്തിൽ എക്കാലവും ഉണ്ടാകണമെന്നില്ല എന്ന യാഥാർത്ഥ്യം ഉൾക്കൊണ്ട്, പുതിയ സൗഹൃദങ്ങൾക്കായി മനസ്സ് തുറന്നിടുകയാണ് ഈ യുവതി.
A woman's note that returned to Canada after 5 years of exile goes viral
