ടൊറന്റോ: കാലം എത്ര കഴിഞ്ഞാലും പഴയ കുടിശ്ശികകൾ നമ്മളെ തേടിവരുമെന്ന് ബോധ്യപ്പെട്ടിരിക്കുകയാണ് കാനഡയിലെ ഒന്റാറിയോ സ്വദേശിയായ ജിയോഫ് ക്ലെൻഡെന്നിങ്ങിന്. കൃത്യമായി പറഞ്ഞാൽ 30 വർഷം മുൻപ്, അതായത് 1996-ൽ കിട്ടിയ ഒരു ചെറിയ പാർക്കിങ് ടിക്കറ്റിലെ ബാക്കി തുകയുടെ പേരിൽ ഇദ്ദേഹത്തിന്റെ ഡ്രൈവിങ് ലൈസൻസ് മോട്ടോർ വാഹന വകുപ്പ് പെട്ടെന്ന് സസ്പെൻഡ് ചെയ്യുകയായിരുന്നു. കഴിഞ്ഞ ദിവസം തപാലിൽ വന്ന കത്ത് കണ്ടപ്പോൾ ജിയോഫ് കരുതിയത് ഇതാരോ പറ്റിക്കാൻ അയച്ച വ്യാജക്കത്ത് ആണെന്നാണ്. എന്നാൽ അന്വേഷിച്ചപ്പോഴാണ് കളി കാര്യമാണെന്നും ടൊറന്റോ സിറ്റി പഴയ ഫൈനുകൾ ഈടാക്കാൻ തുടങ്ങിയതാണെന്നും ബോധ്യപ്പെട്ടത്.
അന്ന് പാർക്കിങ് നിയമം ലംഘിച്ചതിന് കേവലം 32.75 ഡോളർ മാത്രമായിരുന്നു ഇദ്ദേഹം അടയ്ക്കാനുണ്ടായിരുന്നത്. ഇതിൽ ചെറിയൊരു പങ്ക് അന്ന് അടച്ചിരുന്നെങ്കിലും ബാക്കി തുക കുടിശ്ശികയായി കിടക്കുകയായിരുന്നു. 30 വർഷമായിട്ടും ഈ തുക അടച്ചുതീർക്കാത്തതിനെ തുടർന്നാണ് അധികൃതർ ഇപ്പോൾ കർശന നടപടിയിലേക്ക് കടന്നത്. ഒരു മുൻകൂർ മുന്നറിയിപ്പ് പോലും നൽകാതെയാണ് ലൈസൻസ് റദ്ദാക്കിയതെന്ന് ജിയോഫ് ആരോപിക്കുന്നു. കുടിശ്ശിക അടച്ചുതീർക്കാൻ കുറച്ചു ദിവസത്തെ സമയം അനുവദിച്ചുകൊണ്ട് ഒരു കത്ത് എങ്കിലും അയക്കാമായിരുന്നുവെന്നും അദ്ദേഹം പറയുന്നു.
ലൈസൻസ് തിരികെ ലഭിക്കാനായി ജിയോഫ് പഴയ പാർക്കിങ് ടിക്കറ്റ് തുക ഉടനടി അടച്ചുതീർത്തു. എന്നാൽ പണി അവിടെയും തീർന്നില്ല, സസ്പെൻഡ് ചെയ്ത ലൈസൻസ് പുനഃസ്ഥാപിക്കാൻ 281 ഡോളർ അധികമായി കെട്ടിവെക്കേണ്ടി വന്നു ഇദ്ദേഹത്തിന്. സാധാരണക്കാരായ ആളുകൾക്ക് ഈ തുക വലിയൊരു ബാധ്യതയാണെന്നും, ഒരു കാറിന്റെ അടവോ അല്ലെങ്കിൽ മരുന്നിനും ഭക്ഷണത്തിനുമുള്ള കാശോ ആണ് അധികൃതർ ഇത്തരത്തിൽ ഈടാക്കുന്നതെന്നും അദ്ദേഹം നിരാശയോടെ കൂട്ടിച്ചേർത്തു.
ഇതേക്കുറിച്ച് ഒന്റാറിയോ ഗതാഗത മന്ത്രാലയത്തോട് ചോദിച്ചപ്പോൾ അടയ്ക്കാത്ത പിഴകൾക്ക് കാലാവധി എന്നൊന്നില്ല എന്നായിരുന്നു മറുപടി. കോർട്ട് വിധിച്ച പിഴകൾ പൂർണ്ണമായി അടച്ചുതീർക്കുന്നത് വരെ അത് നിലനിൽക്കുമെന്നും, പിഴ അടയ്ക്കാതിരുന്നാൽ ലൈസൻസ് സസ്പെൻഡ് ചെയ്യാൻ മന്ത്രാലയത്തിന് പൂർണ്ണ അധികാരമുണ്ടെന്നും അവർ വ്യക്തമാക്കി. ടൊറന്റോ നഗരസഭ ഇപ്പോൾ പഴയകാലത്തെ കുടിശ്ശികകൾ പിടിച്ചെടുക്കാനുള്ള തീവ്ര ശ്രമത്തിലാണ്. അതുകൊണ്ട് തന്നെ ട്രാഫിക് ടിക്കറ്റുകളോ പാർക്കിങ് ഫൈനുകളോ ലഭിച്ചാൽ അത് അപ്പോൾത്തന്നെ തീർപ്പാക്കാൻ ശ്രദ്ധിക്കുക, അല്ലാത്തപക്ഷം ഭാവിയിൽ ലൈസൻസ് റദ്ദാക്കപ്പെടാനും വൻ തുക നഷ്ടമാകാനും ഇത് കാരണമാകും.
Ontario man’s licence suspended over decades-old $32.75 parking ticket
📢 കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=hq1tcla
