ടൊറന്റോ: കാനഡയിലുടനീളമുള്ള തങ്ങളുടെ റസ്റ്റോറന്റുകളിലേക്ക് പതിനായിരത്തോളം പുതിയ തദ്ദേശീയ ജീവനക്കാരെ നിയമിക്കാനൊരുങ്ങി പ്രമുഖ രാജ്യാന്തര കോഫി വിപണന ശൃംഖലയായ ടിം ഹോർട്ടൻസ്. രാജ്യത്ത് താൽക്കാലിക വിദേശ തൊഴിലാളികളുടെ (TFW) എണ്ണം ഘട്ടങ്ങളായി കുറഞ്ഞുവരുന്ന പശ്ചാത്തലത്തിലാണ് തദ്ദേശീയരായ ഉദ്യോഗാർത്ഥികളെ ലക്ഷ്യമിട്ട് കമ്പനി വിപുലമായ റിക്രൂട്ട്മെന്റ് കാമ്പെയ്ൻ പ്രഖ്യാപിച്ചത്. നിലവിൽ കാനഡയിലെ യുവാക്കൾക്കിടയിൽ തൊഴിലില്ലായ്മ നിരക്ക് വർധിച്ചുവരുന്ന സാഹചര്യത്തിൽ കൂടിയാണ് കമ്പനിയുടെ ഈ നിർണായക നീക്കം.
തിങ്കളാഴ്ച പുറത്തിറക്കിയ വാർത്താക്കുറിപ്പിലാണ് കമ്പനി പുതിയ തൊഴിൽ പദ്ധതികളെക്കുറിച്ചുള്ള വിവരങ്ങൾ വ്യക്തമാക്കിയത്. നിലവിൽ ടിം ഹോർട്ടൻസിനാകെ 1,10,000 ജീവനക്കാരാണുള്ളത്. ഇതിൽ വെറും 4,000 പേർ മാത്രമാണ് താൽക്കാലിക വിദേശ തൊഴിലാളി പദ്ധതി വഴി ജോലി ചെയ്യുന്നത്. 2024 മുതൽ വിദേശ തൊഴിലാളികളുടെ പങ്കാളിത്തത്തിൽ വലിയ രീതിയിലുള്ള കുറവുണ്ടായതായി കമ്പനി അധികൃതർ ചൂണ്ടിക്കാണിക്കുന്നു. നിലവിലെ ആകെ ജീവനക്കാരുടെ എണ്ണത്തിന്റെ 3.6 ശതമാനം മാത്രമാണ് ഇപ്പോൾ വിദേശ തൊഴിലാളികളായുള്ളത്.
കോവിഡ് മഹാമാരിയുടെ സമയത്ത് കാനഡയിലുടനീളം രൂക്ഷമായ തൊഴിലാളി ക്ഷാമം നേരിട്ടിരുന്നു. ഈ പ്രതിസന്ധി മറികടക്കാൻ താൽക്കാലിക വിദേശ തൊഴിലാളി പദ്ധതിയുടെ വ്യവസ്ഥകളിൽ ഇളവ് വരുത്തണമെന്നും വിദേശ ജീവനക്കാരുടെ എണ്ണം വർധിപ്പിക്കാൻ അനുമതി നൽകണമെന്നും കമ്പനി കനേഡിയൻ ഫെഡറൽ സർക്കാരിനോട് ആവശ്യപ്പെട്ടിരുന്നു. എന്നാൽ, പാൻഡെമിക്കിന് ശേഷം വിദേശ തൊഴിലാളികളുടെ അപേക്ഷകൾക്ക് സർക്കാർ നിയന്ത്രണം ഏർപ്പെടുത്താൻ തുടങ്ങിയപ്പോഴും കമ്പനി ഇതിനായി സമ്മർദ്ദം ചെലുത്തിയിരുന്നു. എന്നാൽ നിലവിൽ രാജ്യത്തെ തദ്ദേശീയരായ യുവാക്കൾക്കിടയിൽ തൊഴിലില്ലായ്മ നിരക്ക് ഉയർന്ന സാഹചര്യത്തിൽ, വിദേശ തൊഴിലാളികൾക്കായി ഇനി അത്തരം ആനുകൂല്യങ്ങൾ ആവശ്യപ്പെടേണ്ടതില്ലെന്നാണ് കമ്പനിയുടെ ഇപ്പോഴത്തെ നിലപാട്.
കാനഡയിൽ ബിസിനസ് വിപുലീകരിക്കുന്നതിന്റെ ഭാഗമായാണ് ഈ വൻതോതിലുള്ള നിയമനം നടക്കുന്നത്. രാജ്യത്തുടനീളം 80 പുതിയ റസ്റ്റോറന്റുകൾ ആരംഭിക്കാനും നിലവിലുള്ള 400 എണ്ണം ആധുനിക രീതിയിൽ നവീകരിക്കാനും ടിം ഹോർട്ടൻസ് പദ്ധതിയിടുന്നുണ്ട്. ഇതിനായി രാജ്യത്തെ 340 റസ്റ്റോറന്റ് ഉടമകൾ (ഫ്രാഞ്ചൈസികൾ) 27 കോടി ഡോളറിന്റെ നിക്ഷേപം നടത്തും. ഇതിനുപുറമെ മാതൃ കമ്പനി 13 കോടി ഡോളറിന്റെ അധിക നിക്ഷേപവും ഈ പദ്ധതിക്കായി നീക്കിവെച്ചിട്ടുണ്ട്.
നിലവിൽ 1,500 ഓളം ഫ്രാഞ്ചൈസി ഉടമകളുടെ കീഴിലായി 4,000-ത്തിലധികം റസ്റ്റോറന്റുകളാണ് കാനഡയിലുടനീളം ടിം ഹോർട്ടൻസിനുള്ളത്. കാനഡയിലെ തൊഴിൽ വിപണിയിൽ വലിയ ചലനങ്ങൾ സൃഷ്ടിക്കാൻ പോകുന്നതാണ് കമ്പനിയുടെ പുതിയ തദ്ദേശീയ റിക്രൂട്ട്മെന്റ് ഡ്രൈവ്. കാനഡയിലെ ഏറ്റവും വലിയ കോഫി-ഫുഡ് ബ്രാൻഡുകളിലൊന്നായ ടിം ഹോർട്ടൻസിന്റെ ഈ പുതിയ ചുവടുവെപ്പ് കനേഡിയൻ തൊഴിലന്വേഷകർക്ക്, പ്രത്യേകിച്ച് പാർട്ട് ടൈം, ഫുൾ ടൈം ജോലികൾ തിരയുന്ന യുവാക്കൾക്ക് വലിയ അവസരമായി മാറും.
Golden opportunity for job seekers in Canada; Tim Hortons launches massive recruitment campaign
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt
