ടൊറന്റോ: ഉയർന്ന ഭവനച്ചെലവ്, ഉത്പന്നങ്ങളുടെ വിലക്കയറ്റം, ഇന്ധനവില വർധനവ് എന്നിവയെത്തുടർന്ന് കാനഡയിൽ സാധാരണക്കാരായ ജനങ്ങൾ കടുത്ത കടബാധ്യതയിലേക്ക് നീങ്ങുന്നതായി റിപ്പോർട്ട്. 2026-ന്റെ ആദ്യ മൂന്ന് മാസങ്ങളിൽ മാത്രം മുപ്പത്തേഴായിരത്തിലധികം ആളുകളാണ് രാജ്യത്ത് സാമ്പത്തിക തകർച്ച നേരിടുന്നവർക്കുള്ള ഇൻസോൾവൻസി നടപടികൾക്കായി അപേക്ഷ നൽകിയത്. ആഗോള സാമ്പത്തിക മാന്ദ്യമുണ്ടായ 2009-ന് ശേഷമുള്ള ഏറ്റവും ഉയർന്ന നിരക്കാണിത്. ക്രെഡിറ്റ് കാർഡുകളുടെ അമിത ഉപയോഗവും ‘Buy now, pay later’ തുടങ്ങിയ പദ്ധതികളും കൃത്യമായ സാമ്പത്തിക ആസൂത്രണമില്ലായ്മയുമാണ് പലരെയും വലിയ കടക്കെണിയിൽ എത്തിക്കുന്നത്.
വർഷങ്ങളോളം കടബാധ്യത ഒളിച്ചുവെക്കുന്നതും സഹായം തേടാൻ മടിക്കുന്നതും പ്രതിസന്ധി ഇരട്ടിയാക്കുന്നതായി ധനകാര്യ വിദഗ്ദ്ധർ ചൂണ്ടിക്കാണിക്കുന്നു. വരുമാനത്തിൽ കൂടുതൽ തുക കടം വീട്ടാൻ ഉപയോഗിക്കേണ്ടി വരുന്നത് സാധാരണക്കാരുടെ ദൈനംദിന ജീവിതത്തെ ബാധിക്കുന്നുണ്ട്. ഇന്റർനെറ്റിലെ തെറ്റായ വിവരങ്ങളും ഒറ്റപ്പെട്ടുപോകുമെന്ന ഭയവുമാണ് പലരെയും കൃത്യമായ സമയത്ത് സഹായം തേടുന്നതിൽ നിന്ന് പിന്തിരിപ്പിക്കുന്നത്. നിലവിൽ മികച്ച ശമ്പളമുള്ള ഉദ്യോഗസ്ഥരും ഭവനവായ്പ എടുത്തവരും വരെ ഈ പ്രതിസന്ധി നേരിടുന്നുണ്ടെന്ന് ഇൻസോൾവൻസി ട്രസ്റ്റിമാർ വ്യക്തമാക്കുന്നു.
എന്നാൽ, കൃത്യമായ സാമ്പത്തിക ഉപദേശങ്ങളിലൂടെയും നിയമപരമായ മാർഗങ്ങളിലൂടെയും ഈ പ്രതിസന്ധി മറികടക്കാൻ സാധിക്കുമെന്ന് വിദഗ്ദ്ധർ പറയുന്നു. കടബാധ്യതയുള്ളവർക്കായി കാനഡയിൽ ലാഭേച്ഛയില്ലാതെ പ്രവർത്തിക്കുന്ന ക്രെഡിറ്റ് കൗൺസലിംഗ് ഏജൻസികൾ നിലവിലുണ്ട്. വായ്പ നൽകിയവരുമായി സംസാരിച്ച് പലിശ നിരക്ക് കുറയ്ക്കുകയോ തിരിച്ചടവിന് കൂടുതൽ സമയം വാങ്ങുകയോ ചെയ്യുന്ന ‘കൺസ്യൂമർ പ്രൊപ്പോസൽ’ പോലുള്ള നിയമപരമായ സംവിധാനങ്ങൾ ഇതിനായി പ്രയോജനപ്പെടുത്താം. കാനഡയിലെ ടൊറന്റോ സ്വദേശിയായ ഷോൺ പിക്കാർഡ് രണ്ടു വർഷം മുൻപ് ഇത്തരം ഒരു ഏജൻസിയുടെ സഹായത്തോടെ അഞ്ച് വർഷത്തെ പലിശരഹിത തിരിച്ചടവ് പദ്ധതി ആരംഭിച്ച് സാമ്പത്തിക ഭദ്രത തിരിച്ചുപിടിച്ചിരുന്നു. കടബാധ്യതകളിൽ ലജ്ജിക്കാതെ, തുടക്കത്തിൽ തന്നെ ഉത്തരവാദിത്തത്തോടെ സഹായം തേടാൻ തയ്യാറായാൽ ഏത് സാമ്പത്തിക പ്രതിസന്ധിയും പരിഹരിക്കാൻ സാധിക്കുമെന്നാണ് ഈ രംഗത്തെ വിദഗ്ദ്ധർ നൽകുന്ന നിർദേശം.
📢 കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=hq1tcla
Report: Canadians are in deep debt trap; More than 37,000 people filed for insolvency in three months
