ടൊറന്റോ: ആഗോള ഫുട്ബോൾ മാമാങ്കത്തിന് കിക്കോഫ് കുറിക്കാൻ ആഴ്ചകൾ മാത്രം ബാക്കിനിൽക്കെ, കായികപ്രേമികൾക്ക് ആവേശവാർത്തയുമായി പ്രമുഖ സ്പോർട്സ് ബ്രാൻഡായ അഡിഡാസ്. ലോകകപ്പ് കാലയളവിൽ ടൊറന്റോയിലുള്ള പ്രശസ്തമായ ‘സ്റ്റാക്ക് മാർക്കറ്റ്’ (STACKT Market) അഡിഡാസിന്റെ ഔദ്യോഗിക ‘ഹോം ഓഫ് സോക്കർ’ വേദിയാകും. ജൂൺ 11 മുതൽ ജൂലൈ 19 വരെ നടക്കുന്ന ടൂർണമെന്റിലുടനീളം ഫുട്ബോൾ ആരാധകർക്കായി വിപുലമായ സൗകര്യങ്ങളാണ് ഇവിടെ ഒരുക്കുന്നത്. ലോകകപ്പ് മത്സരങ്ങൾ പൊതുജനങ്ങൾക്ക് പൂർണ്ണമായും സൗജന്യമായി ഇവിടെ തത്സമയം കാണാനാകും.
ബാതർസ്റ്റ് സ്ട്രീറ്റിനും ഫ്രണ്ട് സ്ട്രീറ്റ് വെസ്റ്റിനും സമീപം സ്ഥിതി ചെയ്യുന്ന സ്റ്റാക്ക് മാർക്കറ്റിലെ ഔട്ട്ഡോർ പബ്ലിക് സ്പേസിലാണ് മത്സരങ്ങളുടെ തത്സമയ സംപ്രേഷണം ഒരുക്കുന്നത്. ഇതിനായി 13.5 അടി ഉയരവും 24 അടി വീതിയുമുള്ള കൂറ്റൻ എൽ.ഇ.ഡി സ്ക്രീനാണ് ഇവിടെ സ്ഥാപിക്കുക. മികച്ച ദൃശ്യ-ശ്രാവ്യ വിരുന്നാകും ആരാധകർക്കായി കാത്തിരിക്കുന്നത്. പ്രമുഖ കായികതാരങ്ങളുടെ സന്നിധ്യം, പ്രത്യേക കായിക പരിപാടികൾ, അഡിഡാസിന്റെ റീട്ടെയിൽ പോപ്പ്-അപ്പ് സ്റ്റാളുകൾ എന്നിവയും ലോകകപ്പിനോടനുബന്ധിച്ച് ഈ വേദിയിൽ സജ്ജീകരിക്കും.
തിങ്കളാഴ്ചകൾ ഒഴികെയുള്ള എല്ലാ ദിവസങ്ങളിലും രാവിലെ 11 മണി മുതൽ പൊതുജനങ്ങൾക്ക് ഇവിടേക്ക് പ്രവേശനം ഉണ്ടായിരിക്കും. മത്സരങ്ങൾ കാണുന്നതിനായി മുൻകൂട്ടി രജിസ്റ്റർ ചെയ്യേണ്ടതില്ല. ആദ്യം എത്തുന്നവർക്ക് ആദ്യം എന്ന മുൻഗണനാ ക്രമത്തിലായിരിക്കും പ്രവേശനം അനുവദിക്കുകയെന്ന് അഡിഡാസ് അധികൃതർ വ്യക്തമാക്കി. ലോകകപ്പ് മത്സരങ്ങളുടെ തത്സമയ സംപ്രേഷണത്തിന് പുറമെ, ടൊറന്റോയിലെ ഫുട്ബോൾ സംസ്കാരത്തെ ജനകീയമാക്കുന്ന വിവിധ ആക്ടിവേഷനുകളും ഇതിന്റെ ഭാഗമായി നടക്കും.
വടക്കേ അമേരിക്കൻ രാജ്യങ്ങൾ സംയുക്തമായി ആതിഥേയത്വം വഹിക്കുന്ന ലോകകപ്പിന്റെ പ്രധാന വേദികളിലൊന്നാണ് ടൊറന്റോ. നഗരത്തിലെത്തുന്ന അന്താരാഷ്ട്ര ഫുട്ബോൾ ആരാധകരെയും തദ്ദേശീയരെയും ഒരുപോലെ ആകർഷിക്കുന്ന തരത്തിലാണ് സ്റ്റാക്ക് മാർക്കറ്റിലെ ഈ താല്കാലിക ഫാൻ പാർക്ക് രൂപകൽപ്പന ചെയ്തിരിക്കുന്നത്. ലോകകപ്പ് മത്സരങ്ങളുടെ തത്സമയ വിവരങ്ങളും സ്റ്റാക്ക് മാർക്കറ്റിലെ പരിപാടികളുടെ സമയവിവരങ്ങളും വരും ദിവസങ്ങളിൽ അഡിഡാസ് ഔദ്യോഗികമായി പുറത്തുവിടും.
World Cup football will be shown on the big screen for free; Adidas becomes 'Home of Soccer' for fans
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt
