ടൊറന്റോ: മെച്ചപ്പെട്ട ജീവിതസാഹചര്യങ്ങൾ തേടി കാനഡയിലേക്ക് കുടിയേറുന്ന പ്രവാസികളുടെ എണ്ണം വർഷം തോറും വർദ്ധിച്ചുവരികയാണ്. ജോലി കണ്ടെത്തുക എന്നതിനപ്പുറം കാനഡയിൽ സ്വന്തമായി ഒരു ബിസിനസ്സ് സാമ്രാജ്യം കെട്ടിപ്പടുക്കാൻ ആഗ്രഹിക്കുന്ന നിരവധി മലയാളി സംരംഭകർ ഇന്ന് നമുക്കിടയിലുണ്ട്. എന്നാൽ പുതിയൊരു രാജ്യത്ത്, അവിടുത്തെ നിയമസംവിധാനങ്ങളെക്കുറിച്ച് കൃത്യമായ ധാരണയില്ലാതെ ബിസിനസ്സ് ആരംഭിക്കുന്നത് വലിയ വെല്ലുവിളികൾക്ക് കാരണമായേക്കാം. കാനഡയിലെ ബിസിനസ്സ് ഘടനകൾ, നികുതി വ്യവസ്ഥകൾ, സർക്കാർ തലത്തിൽ ലഭിക്കുന്ന പിന്തുണകൾ എന്നിവയെക്കുറിച്ച് കൃത്യമായി മനസ്സിലാക്കുകയാണ് വിജയത്തിലേക്കുള്ള ആദ്യപടി. ഒരു പുതിയ സംരംഭം ആസൂത്രണം ചെയ്യുമ്പോൾ പ്രവാസികൾ പ്രധാനമായും ശ്രദ്ധിക്കേണ്ട അഞ്ച് ഘട്ടങ്ങൾ പരിശോധിക്കാം.
- ബിസിനസ്സ് തുടങ്ങാനുള്ള നിയമപരമായ അനുമതിയുണ്ടോ?
കാനഡയിൽ ഒരു ബിസിനസ്സ് ആരംഭിക്കുന്നതിന് മുൻപ്, പ്രവാസിയായ നിങ്ങൾക്ക് അതിനുള്ള നിയമപരമായ അവകാശമുണ്ടോ എന്ന് ഉറപ്പുവരുത്തുകയാണ് പ്രധാനം. കനേഡിയൻ പൗരത്വം (Citizenship), സ്ഥിരതാമസത്തിനുള്ള അനുമതി (Permanent Residency) എന്നിവയുള്ളവർക്കോ അല്ലെങ്കിൽ സ്വയംതൊഴിൽ ചെയ്യാൻ അനുമതിയുള്ള സാധുവായ വർക്ക് പെർമിറ്റ് കൈവശമുള്ളവർക്കോ മാത്രമേ ഇവിടെ ബിസിനസ്സ് നടത്തുവാൻ സാധിക്കുകയുള്ളൂ. നിങ്ങളുടെ ഇമിഗ്രേഷൻ പദവിക്ക് അനുസരിച്ചായിരിക്കും ബിസിനസ്സിന്റെ സാധ്യതകൾ നിശ്ചയിക്കപ്പെടുന്നത്. കൂടാതെ ചില പ്രത്യേക തൊഴിൽ മേഖലകളിൽ ബിസിനസ്സ് ആരംഭിക്കുന്നതിന് ലൈസൻസുകളോ സർട്ടിഫിക്കറ്റുകളോ ആവശ്യമായി വരാം. പ്രവിശ്യകൾക്ക് അനുസരിച്ച് ഈ നിയമങ്ങളിൽ മാറ്റങ്ങളുണ്ടാകും.
- ബിസിനസ്സിന്റെ ഘടനയും കൃത്യമായ ആസൂത്രണവും
നിയമപരമായ അനുമതി ഉറപ്പാക്കിയ ശേഷം, ബിസിനസ്സ് ഏത് രീതിയിലാണ് പ്രവർത്തിക്കേണ്ടതെന്ന് കൃത്യമായി പ്ലാൻ ചെയ്യണം. സോൾ പ്രൊപ്രൈറ്റർഷിപ്പ് (Sole Proprietorship), പാർട്ണർഷിപ്പ് (Partnership), കോർപ്പറേഷൻ (Corporation) എന്നിവയാണ് കാനഡയിലെ പ്രധാന ബിസിനസ്സ് ഘടനകൾ. ഇവയിൽ ഏത് തിരഞ്ഞെടുക്കുന്നു എന്നതിനെ ആശ്രയിച്ചായിരിക്കും നിങ്ങളുടെ ഉത്തരവാദിത്തങ്ങളും നികുതി നിരക്കുകളും നിശ്ചയിക്കപ്പെടുക.
പ്രാദേശിക വിപണി, ഉപഭോക്താക്കളുടെ താല്പര്യം, എതിരാളികൾ എന്നിവരെക്കുറിച്ച് കൃത്യമായ വിപണി ഗവേഷണം (Market Research) നടത്തേണ്ടതുണ്ട്. ഇതിനായി കാനഡയിലെ പ്രമുഖ ധനകാര്യ സ്ഥാപനമായ ടിഡി ബാങ്കിന്റെ (TD Bank) ബിസിനസ്സ് പേജുകൾ വഴിയും വിവരങ്ങൾ ശേഖരിക്കാം. പുതിയ സംരംഭകരെ പ്രോത്സാഹിപ്പിക്കുന്നതിനായി കാനഡ സർക്കാർ നടപ്പിലാക്കുന്ന ‘സ്റ്റാർട്ട്-അപ്പ് വിസ പ്രോഗ്രാം’ (Start-up Visa Program) പോലുള്ള പദ്ധതികൾ വഴി യോഗ്യരായ സംരംഭകർക്ക് മാർഗ്ഗനിർദ്ദേശങ്ങളും സാമ്പത്തിക സഹായങ്ങളും ലഭ്യമാകാറുണ്ട്.
- ബിസിനസ്സ് രജിസ്ട്രേഷനും ലൈസൻസുകളും
ആസൂത്രണം പൂർത്തിയായാൽ ബിസിനസ്സ് ഔദ്യോഗികമായി രജിസ്റ്റർ ചെയ്യുകയാണ് അടുത്ത പടി. ഫെഡറൽ സർക്കാരിലോ പ്രവിശ്യാ സർക്കാരിലോ ബിസിനസ്സ് രജിസ്റ്റർ ചെയ്ത് ഒരു ബിസിനസ്സ് നമ്പർ സ്വന്തമാക്കണം. നിങ്ങൾ തിരഞ്ഞെടുക്കുന്ന ബിസിനസ്സ് മേഖലയ്ക്ക് അനുസരിച്ച് തദ്ദേശീയമായ മറ്റ് പെർമിറ്റുകളും ലൈസൻസുകളും ആവശ്യമായി വരും. കരാറുകൾ, നിയമപരമായ ബാധ്യതകൾ, ബൗദ്ധിക സ്വത്ത് അവകാശം (Intellectual Property) എന്നിവയുമായി ബന്ധപ്പെട്ട് സംശയങ്ങളുണ്ടെങ്കിൽ ഒന്റാറിയോയിലെ ‘പ്രോ ബോണോ ഒന്റാറിയോ’ (Pro Bono Ontario), ലോ സൊസൈറ്റി റഫറൽ സർവീസ് തുടങ്ങിയ സൌജന്യ നിയമസഹായ വേദികളുടെ സേവനവും തേടാവുന്നതാണ്.
- നികുതി വ്യവസ്ഥകളും ജീവനക്കാരുടെ ഉത്തരവാദിത്തങ്ങളും
കാനഡയിൽ ബിസിനസ്സ് നടത്തുമ്പോൾ കൃത്യമായി നികുതി അടയ്ക്കാൻ ഓരോ സംരംഭകനും ബാധ്യസ്ഥനാണ്. ബിസിനസ്സിന്റെ വാർഷിക വരുമാനവും സ്വഭാവവും അനുസരിച്ച് ഹാർമണൈസ്ഡ് സെയിൽസ് ടാക്സ് (HST) പോലുള്ള നികുതികൾക്കായി രജിസ്റ്റർ ചെയ്യേണ്ടതുണ്ട്. നികുതി കാര്യങ്ങളിൽ ചെറുകിട സംരംഭകരെ സഹായിക്കുന്നതിനായി കാനഡ റവന്യൂ ഏജൻസി (CRA) പ്രത്യേക ലെയ്സൺ ഓഫീസർ പദ്ധതി നടപ്പിലാക്കുന്നുണ്ട്. ബിസിനസ്സിൽ ജീവനക്കാരെ നിയമിക്കുകയാണെങ്കിൽ, പേറോൾ മാനേജ്മെന്റ്, തൊഴിലിടങ്ങളിലെ സുരക്ഷാ മാനദണ്ഡങ്ങൾ എന്നിവ പാലിക്കേണ്ടതുണ്ട്. ഓരോ പ്രവിശ്യയിലെയും കുറഞ്ഞ വേതന നിരക്കുകളും തൊഴിൽ നിയമങ്ങളും വ്യത്യസ്തമായിരിക്കും.
- സാമ്പത്തിക സ്രോതസ്സും ബാങ്കിങ് സേവനങ്ങളും
ബിസിനസ്സ് ആവശ്യങ്ങൾക്കായി സ്വന്തം സമ്പാദ്യം, ബാങ്ക് വായ്പകൾ, ക്രെഡിറ്റ് ലൈനുകൾ അല്ലെങ്കിൽ കുടുംബാംഗങ്ങളിൽ നിന്നുള്ള സഹായം എന്നിവ പ്രയോജനപ്പെടുത്താം. ചെറുകിട ബിസിനസ്സുകൾക്കായി സർക്കാർ നൽകുന്ന ഗ്രാന്റുകളും പ്രയോജനപ്പെടുത്താവുന്നതാണ്. ബിസിനസ്സ് സാമ്പത്തിക ഇടപാടുകൾ എപ്പോഴും സുതാര്യമായിരിക്കാൻ വ്യക്തിഗത അക്കൗണ്ടുകൾക്ക് പുറമെ ഒരു പ്രത്യേക ബിസിനസ് ബാങ്ക് അക്കൗണ്ട് ആരംഭിക്കുന്നത് നന്നായിരിക്കും.
കാനഡയിൽ 160 വർഷത്തിലധികം പ്രവർത്തന പരിചയമുള്ള ടിഡി ബാങ്ക് (TD Bank), പ്രവാസികൾക്കായി പ്രത്യേക സ്മോൾ ബിസിനസ് ബാങ്കിങ് സേവനങ്ങളും അക്കൗണ്ടുകളും നൽകിവരുന്നുണ്ട്. ആയിരത്തിലധികം ബ്രാഞ്ചുകളുള്ള ടിഡി ബാങ്കിൽ 80-ലധികം ഭാഷകളിൽ ഉപഭോക്തൃ സേവനം ലഭ്യമാണ്.
കാനഡ പോലുള്ള ഒരു വിദേശ രാജ്യത്ത് പ്രവാസിയായി എത്തി സ്വന്തമായി ഒരു ബിസിനസ്സ് സാമ്രാജ്യം കെട്ടിപ്പടുക്കുക എന്നത് അഭിമാനകരമായ നേട്ടമാണ്. ബിസിനസ്സ് ആരംഭിക്കുന്നതിനുള്ള യോഗ്യതകൾ മുതൽ കൃത്യമായ പ്ലാനിങ്, രജിസ്ട്രേഷൻ, നികുതി വ്യവസ്ഥകൾ എന്നിവ മുൻകൂട്ടി മനസ്സിലാക്കി മുന്നോട്ട് പോയാൽ കാനഡയിലെ ബിസിനസ്സ് സ്വപ്നങ്ങൾ യാഥാർത്ഥ്യമാക്കാൻ ഏതൊരു പ്രവാസിക്കും സാധിക്കും.
Want to start your own business in Canada? 5 important things expats need to know
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt
