മോങ്ക്ടൺ : കാട്ടുതീ പ്രതിരോധ പ്രവർത്തനങ്ങൾ കൂടുതൽ ശക്തമാക്കുന്നതിന്റെ ഭാഗമായി കാനഡയിലെ ന്യൂ ബ്രൺസ്വിക്ക് പ്രവിശ്യാ സർക്കാർ നാല് പുതിയ ആംഫിബിയസ് (വെള്ളത്തിലും കരയിലും ഇറങ്ങാൻ കഴിയുന്ന) വിമാനങ്ങൾ വാങ്ങി. പുതുതായി വാങ്ങിയ ‘എയർ ട്രാക്ടർ AT-802 ഫയർ ബോസ്’ ഇനത്തിൽപ്പെട്ട വിമാനങ്ങൾ കഴിഞ്ഞ ചൊവ്വാഴ്ച നടന്ന ചടങ്ങിലാണ് ഔദ്യോഗികമായി പുറത്തിറക്കിയത്. പ്രവിശ്യയിലെ കുടുംബങ്ങളുടെയും ജനവാസമേഖലകളുടെയും വ്യവസായ സ്ഥാപനങ്ങളുടെയും സുരക്ഷ ഉറപ്പാക്കാൻ ഇത്തരം വിമാനങ്ങൾ അനിവാര്യമാണെന്ന് പ്രകൃതിവിഭവ മന്ത്രി ജോൺ ഹെറോൺ വ്യക്തമാക്കി. പ്രവിശ്യയുടെ 86 ശതമാനവും വനമേഖലയായതിനാൽ കാട്ടുതീ പോലുള്ള അടിയന്തിര സാഹചര്യങ്ങളെ നേരിടാൻ ഈ സജ്ജീകരണം സഹായിക്കുമെന്നും അദ്ദേഹം കൂട്ടിച്ചേർത്തു. പ്രവിശ്യാ സർക്കാരിന്റെയും, ജെ.ഡി ഇർവിങ്, ട്വിൻ റിവേഴ്സ് പേപ്പർ കമ്പനി, എ.വി നാക്വിക് തുടങ്ങിയ വന വ്യവസായ പങ്കാളികളുടെയും സംയുക്ത ഉടമസ്ഥതയിലുള്ള ‘ഫോറസ്റ്റ് പ്രൊട്ടക്ഷൻ ലിമിറ്റഡ്’ എന്ന സ്ഥാപനവുമായി സഹകരിച്ചാണ് പുതിയ വിമാനങ്ങൾ എത്തിച്ചിരിക്കുന്നത്.
വെള്ളവും ഫയർ ഫോമും തളിക്കാൻ ശേഷിയുള്ള നാല് ഫയർ ബോസ് വിമാനങ്ങൾ കൂടി എത്തിയതോടെ പ്രവിശ്യയുടെ തീപിടുത്ത പ്രതിരോധ വിമാനങ്ങളുടെ എണ്ണം 12 ആയി ഉയർന്നു. വെള്ളം, ഫോം, തീ കെടുത്താനുള്ള രാസവസ്തുക്കൾ (റിട്ടാർഡന്റ്) എന്നിവ തളിക്കാൻ ശേഷിയുള്ള നാല് വീൽഡ് എയർ ട്രാക്ടർ AT-802 വിമാനങ്ങളും, കാട്ടുതീ നിരീക്ഷിക്കുന്നതിനും പ്രതിരോധ പ്രവർത്തനങ്ങൾ ഏകോപിപ്പിക്കുന്നതിനുമുള്ള നാല് സെസ്ന C208 കാരവൻ വിമാനങ്ങളും നിലവിൽ പ്രവിശ്യയുടെ വ്യോമസേനയുടെ ഭാഗമാണ്. വിമാനത്താവളത്തിൽ നിന്നും 50 കിലോമീറ്റർ അകലെയുള്ള തീപിടുത്തം നിയന്ത്രിക്കാൻ നിലവിലുള്ള വിമാനങ്ങൾ ഉപയോഗിക്കുമ്പോൾ 20 മുതൽ 30 മിനിറ്റ് വരെ സമയമെടുക്കുമെന്നും, എന്നാൽ പുതിയ വിമാനങ്ങൾ ലഭ്യമായ ജലാശയങ്ങൾ പ്രയോജനപ്പെടുത്തി 5 മുതൽ 7 മിനിറ്റിനുള്ളിൽ വെള്ളം തളിക്കാൻ സഹായിക്കുമെന്നും ഫോറസ്റ്റ് പ്രൊട്ടക്ഷൻ ലിമിറ്റഡ് സി.ഇ.ഒ മൈക്ക് ഓ ബ്ലെനിസ് അറിയിച്ചു.
വിമാനത്തിന്റെ പോണ്ടൂണുകളുടെ അടിയിലുള്ള പ്രത്യേക സംവിധാനം (റിട്രാക്റ്റബിൾ ച്യൂട്ട്) വഴിയാണ് തടാകങ്ങളിൽ നിന്നും നദികളിൽ നിന്നും വെള്ളം ശേഖരിക്കുന്നത്. വെള്ളത്തിൽ പൂർണ്ണമായി ഇറങ്ങാതെ ഉപരിതലത്തിലൂടെ തെന്നിനീങ്ങിക്കൊണ്ടുതന്നെ വളരെ വേഗത്തിൽ ഇവയ്ക്ക് വെള്ളം നിറയ്ക്കാൻ സാധിക്കും. 800 ഗാലൻ വെള്ളം സംഭരിക്കാൻ ശേഷിയുള്ള വിമാനത്തിൽ 30 സെക്കൻഡിനുള്ളിൽ വെള്ളം പൂർണ്ണമായി നിറയ്ക്കാനാകും. പുതിയ വിമാനങ്ങൾ പറത്തുന്നതിനായി ആറ് പൈലറ്റുമാർക്ക് കൂടി പരിശീലനം നൽകിയതോടെ ഫോറസ്റ്റ് പ്രൊട്ടക്ഷൻ ലിമിറ്റഡിലെ ആകെ പൈലറ്റുമാരുടെ എണ്ണം 30 ആയി ഉയർന്നു. കഴിഞ്ഞ വർഷം പ്രവിശ്യയിൽ ഉണ്ടായ 448 കാട്ടുതീപിടുത്തങ്ങളിൽ 3,200 ഹെക്ടറോളം വനഭൂമി നശിച്ചിരുന്നു. പുതിയ വിമാനങ്ങൾ കഴിഞ്ഞ വർഷം ലഭ്യമായിരുന്നെങ്കിൽ നാശനഷ്ടങ്ങളുടെ വ്യാപ്തി ഒരു പരിധി വരെ കുറയ്ക്കാൻ സാധിക്കുമായിരുന്നുവെന്ന് മന്ത്രി ജോൺ ഹെറോൺ വിലയിരുത്തി.
New Brunswick province buys four new aircraft to strengthen wildfire defense
📢 കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=hq1tcla
