ഒട്ടാവ : ഒന്റാറിയോ, ക്യുബെക്ക് പ്രവിശ്യകളിൽ വിതരണം ചെയ്ത രണ്ട് പ്രമുഖ ബ്രാൻഡുകളുടെ ഓർഗാനിക് മൈക്രോ ഗ്രീൻസ് (മുളപ്പിച്ച ചെറുപയർ, ബ്രൊക്കോളി തുടങ്ങിയവയുടെ ഇലകൾ) വിപണിയിൽ നിന്ന് അടിയന്തിരമായി പിൻവലിക്കാൻ കനേഡിയൻ ഫുഡ് ഇൻസ്പെക്ഷൻ ഏജൻസി (CFIA) ഉത്തരവിട്ടു. മാരകമായ രോഗബാധയ്ക്ക് കാരണമാകുന്ന ‘ഇ-കോളി’ (E. coli) ബാക്ടീരിയയുടെ സാന്നിധ്യം കണ്ടെത്തിയതിനെ തുടർന്നാണ് നടപടി. കമ്പനി തന്നെ മുൻകൈയെടുത്ത് നടത്തിയ പരിശോധനകൾക്ക് പിന്നാലെയാണ് ഉത്പന്നങ്ങൾ തിരിച്ചുവിളിക്കാൻ (Food Recall) തീരുമാനിച്ചത്. ‘ഫാം ബോയ്’ (Farm Boy), ‘ക്യാൻ കൾച്ചർ’ (Kyan Culture) എന്നീ ബ്രാൻഡുകളുടെ വിവിധ മൈക്രോ ഗ്രീൻസ് ഉത്പന്നങ്ങളാണ് ഇത്തരത്തിൽ വിപണിയിൽ നിന്ന് മാറ്റുന്നത്.
വിപണിയിൽ നിന്ന് അടിയന്തിരമായി പിൻവലിക്കാൻ നിർദ്ദേശിച്ച പ്രധാന ഉത്പന്നങ്ങളുടെ വിവരങ്ങൾ ഫുഡ് ഇൻസ്പെക്ഷൻ ഏജൻസി ഔദ്യോഗികമായി പുറത്തുവിട്ടിട്ടുണ്ട്. 65 ഗ്രാമിന്റെ പാക്കറ്റുകളിൽ ലഭ്യമായിരുന്ന താഴെ പറയുന്ന ബാച്ചുകളാണ് മാറ്റേണ്ടത്; ഫാം ബോയ് ഓർഗാനിക് ബ്രൊക്കോളി മൈക്രോ ഗ്രീൻസ് (കാലാവധി മെയ് 22, 2026 വരെയുള്ളവ), ഫാം ബോയ് ഓർഗാനിക് മൈൽഡ് മിക്സ്, സ്പ്രിംഗ് മിക്സ് മൈക്രോ ഗ്രീൻസ് (കാലാവധി മെയ് 19, 2026 വരെയുള്ളവ), ക്യാൻ കൾച്ചർ ഓർഗാനിക് ബ്രൊക്കോളി മൈക്രോ ഗ്രീൻസ് (കാലാവധി മെയ് 22, 2026 വരെയുള്ളവ), ക്യാൻ കൾച്ചർ ഓർഗാനിക് മൈൽഡ് മിക്സ്, സ്പ്രിംഗ് മിക്സ് (കാലാവധി മെയ് 19, 2026 വരെയുള്ളവ). ഈ ഉത്പന്നങ്ങൾ വാങ്ങിയ ഉപഭോക്താക്കൾ ഇവ ഉപയോഗിക്കുകയോ വിതരണം ചെയ്യുകയോ അരുതെന്ന് കർശന നിർദ്ദേശമുണ്ട്.
ഇ-കോളി ബാക്ടീരിയ ബാധിച്ച ആഹാരസാധനങ്ങൾക്ക് കാഴ്ചയിലോ മണത്തിലോ യാതൊരുവിധ കേടുപാടുകളും തോന്നില്ലെങ്കിലും ഇവ ഉപയോഗിക്കുന്നത് കടുത്ത ആരോഗ്യപ്രശ്നങ്ങൾക്ക് കാരണമാകുമെന്ന് അധികൃതർ മുന്നറിയിപ്പ് നൽകുന്നു. ഓക്കാനം, ഛർദ്ദി, കഠിനമായ വയറുവേദന, രക്തത്തോടുകൂടിയ അതിസാരം എന്നിവയാണ് ഇതിന്റെ പ്രധാന ലക്ഷണങ്ങൾ. രോഗബാധ ഗുരുതരമാകുന്ന സാഹചര്യങ്ങളിൽ പക്ഷാഘാതം, അപസ്മാരം എന്നിവ ഉണ്ടാകാനും വൃക്കകൾക്ക് സ്ഥിരമായ കേടുപാടുകൾ സംഭവിക്കാനും സാധ്യതയുണ്ട്. ചില സന്ദർഭങ്ങളിൽ രോഗിയുടെ മരണത്തിന് വരെ ഇത് കാരണമായേക്കാം. എന്നാൽ നിലവിൽ ഈ ഉത്പന്നങ്ങൾ ഉപയോഗിച്ച് ആർക്കും തന്നെ രോഗബാധ റിപ്പോർട്ട് ചെയ്തിട്ടില്ല.
വിപണിയിൽ നിന്ന് ഇത്തരം ഉത്പന്നങ്ങൾ പൂർണ്ണമായി നീക്കം ചെയ്തിട്ടുണ്ടെന്ന് ഉറപ്പുവരുത്താൻ സിഎഫ്ഐഎയുടെ (CFIA) നേതൃത്വത്തിൽ വിപുലമായ ഭക്ഷ്യസുരക്ഷാ അന്വേഷണം പുരോഗമിക്കുകയാണ്. നിലവിൽ ഈ ഉത്പന്നങ്ങൾ കൈവശമുള്ള ഉപഭോക്താക്കൾ ഇവ എത്രയും വേഗം ചവറ്റുകുട്ടയിലേക്ക് കളയുകയോ അല്ലെങ്കിൽ വാങ്ങിയ കടകളിൽ തിരികെ ഏൽപ്പിച്ച് പണം കൈപ്പറ്റുകയോ ചെയ്യണമെന്ന് ഏജൻസി അറിയിച്ചു. ഈ ഉത്പന്നങ്ങൾ ഉപയോഗിച്ചതിന് ശേഷം എന്തെങ്കിലും തരത്തിലുള്ള ശാരീരിക അസ്വസ്ഥതകൾ അനുഭവപ്പെടുന്നവർ എത്രയും വേഗം ഡോക്ടറെ കണ്ട് ചികിത്സ തേടേണ്ടതാണ്. ഈ മാസം തുടക്കത്തിലും സമാനമായ രീതിയിൽ ‘ജെർമിന’ ബ്രാൻഡിന്റെ ബ്രൊക്കോളി വിത്തുകൾ ഇ-കോളി ഭീഷണിയെ തുടർന്ന് ഒന്റാറിയോയിൽ പിൻവലിച്ചിരുന്നു.
E-coli outbreak: CFIA to recall major brands of vegetables from the market in Canada
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt
