ക്യാൻസർ എന്ന രോഗനിർണ്ണയം പലപ്പോഴും ഒരു മനുഷ്യന്റെ ജീവിതത്തെയും പ്രതീക്ഷകളെയും പെട്ടെന്നാണ് മാറ്റിമറിക്കുന്നത്. എന്നാൽ ശാസ്ത്രത്തിന്റെ പുതിയ മുന്നേറ്റങ്ങളും പങ്കാളിയുടെ തളരാത്ത പോരാട്ടവീര്യവും ചേരുമ്പോൾ മരണവിധിപോലും തിരുത്തിയെഴുതപ്പെടാം. തലച്ചോറിനെ ബാധിക്കുന്ന ഏറ്റവും മാരകമായ ക്യാൻസർ ബാധിച്ച്, ജീവിതം വെറും മാസങ്ങൾ മാത്രമെന്ന് ഡോക്ടർമാർ വിധിയെഴുതിയ ഇടത്തുനിന്നും അത്ഭുതകരമായി ജീവിതത്തിലേക്ക് തിരിച്ചുവരികയാണ് 47 കാരനായ ഫ്രാൻസെസ്കോ കൊളോസിമോ എന്ന കനേഡിയൻ സ്വദേശി.
2025 മെയ് മാസത്തിന്റെ തുടക്കത്തിലാണ് ഫ്രാൻസെസ്കോയ്ക്ക് ആദ്യമായി അപസ്മാര ലക്ഷണങ്ങൾ ഉണ്ടാകുന്നത്. തുടർന്ന് നടത്തിയ പരിശോധനകളിലാണ് ‘ഗ്ലിയോബ്ലാസ്റ്റോമ’ (Glioblastoma) എന്ന അതീവ ഗുരുതരമായ മസ്തിഷ്ക അർബുദം അദ്ദേഹത്തെ ബാധിച്ചതായി കണ്ടെത്തിയത്. പുരുഷന്മാരിൽ ഏറ്റവും കൂടുതൽ കാണപ്പെടുന്ന ഈ പ്രൈമറി ബ്രെയിൻ ട്യൂമർ, കാനഡയിൽ പ്രതിവർഷം ഒരു ലക്ഷത്തിൽ അഞ്ച് പേർക്ക് എന്ന തോതിൽ പിടിപെടുന്നതാണെന്ന് ബ്രെയിൻ ട്യൂമർ ഫൗണ്ടേഷൻ ഓഫ് കാനഡയുടെ കണക്കുകൾ വ്യക്തമാക്കുന്നു. രോഗം നാലാം ഘട്ടത്തിലായതിനാൽ അടിയന്തര ശസ്ത്രക്രിയ, റേഡിയേഷൻ, കീമോതെറാപ്പി എന്നിവ നൽകിയെങ്കിലും ഫ്രാൻസെസ്കോയുടെ ആരോഗ്യം അതിവേഗം വഷളാവുകയായിരുന്നു.
ചികിത്സ ശക്തമായതോടെ ഫ്രാൻസെസ്കോയുടെ ഓർമ്മശക്തിയും സംസാരിക്കാനുള്ള ശേഷിയും പൂർണ്ണമായും നഷ്ടപ്പെട്ടു. ഒക്ടോബർ അവസാനത്തോടെ അദ്ദേഹം പൂർണ്ണമായി വീൽചെയറിലായി. നവംബർ, ഡിസംബർ മാസങ്ങളായപ്പോഴേക്കും സ്ഥിതി കൂടുതൽ ഗുരുതരമാവുകയും, ഫ്രാൻസെസ്കോയ്ക്ക് ഇനി പരമാവധി മൂന്ന് മുതൽ ആറ് മാസം വരെ മാത്രമേ ആയുസ്സുള്ളൂ എന്ന് ഡോക്ടർമാർ കുടുംബത്തെ അറിയിക്കുകയും ചെയ്തു. ജീവിതം അവസാനിപ്പിക്കുന്നതിനെക്കുറിച്ചുള്ള മെഡിക്കൽ നടപടികളെക്കുറിച്ച് പോലും ചിന്തിക്കേണ്ടി വന്ന ഘട്ടത്തിലാണ് ഫ്രാൻസെസ്കോയുടെ ഭാര്യ ഷോണ വഴിത്തിരിവായ ആ കണ്ടെത്തൽ നടത്തുന്നത്.
ക്യാൻസർ കോശങ്ങളുടെ വിഭജനം മന്ദഗതിയിലാക്കുകയോ തടയുകയോ ചെയ്യുന്ന ‘ഒപ്റ്റ്യൂൺ ജിയോ’ (Optune Gio) എന്ന അത്യാധുനിക ഉപകരണത്തെക്കുറിച്ച് റേഡിയേഷൻ തെറാപ്പിസ്റ്റായ ഷോണ ഇന്റർനെറ്റിലൂടെ മനസ്സിലാക്കി. ശരീരത്തിൽ ധരിക്കാൻ കഴിയുന്ന ഈ പോർട്ടബിൾ ഉപകരണത്തിന് 2022-ൽ തന്നെ ഹെൽത്ത് കാനഡയുടെ അംഗീകാരം ലഭിച്ചിരുന്നു. തുടർന്ന് ഡോക്ടർമാരുടെ നിർദ്ദേശപ്രകാരം ‘അവാസ്റ്റിൻ’ എന്ന മരുന്നിനൊപ്പം ഈ ഉപകരണം കൂടി ഉപയോഗിക്കാൻ തുടങ്ങിയതോടെ ഫ്രാൻസെസ്കോയുടെ ആരോഗ്യനിലയിൽ പ്രകടമായ പുരോഗതി ദൃശ്യമായി. ഇപ്പോൾ സംസാരിക്കാനും നടക്കാനും സുഹൃത്തുക്കളുമായി സമയം ചെലവഴിക്കാനും സാധിക്കുന്ന ഫ്രാൻസെസ്കോ, തന്റെ ആരോഗ്യം 90 ശതമാനത്തോളം തിരികെ കിട്ടിയതായി സാക്ഷ്യപ്പെടുത്തുന്നു.
വലിയ സാമ്പത്തിക ബാധ്യതയാണ് ഈ ആധുനിക ചികിത്സാരീതി വരുത്തിവെക്കുന്നത്. നിലവിൽ കാനഡയിലെ ബ്രിട്ടീഷ് കൊളംബിയ പ്രവിശ്യയിൽ മാത്രമാണ് ഈ ഉപകരണത്തിന്റെ ചെലവ് സർക്കാർ വഹിക്കുന്നത്. മാനിറ്റോബയിൽ താമസിക്കുന്ന ഫ്രാൻസെസ്കോയ്ക്ക് ഈ ചികിത്സയ്ക്കായി പ്രതിമാസം 28,000 കനേഡിയൻ ഡോളറിലധികം (ഏകദേശം 18 ലക്ഷത്തിലധികം ഇന്ത്യൻ രൂപ) സ്വന്തം പോക്കറ്റിൽ നിന്ന് ചെലവാക്കേണ്ടി വരുന്നു. സുഹൃത്തുക്കളുടെയും കാരുണ്യവതികളുടെയും സഹായം കൊണ്ടാണ് നിലവിൽ ഈ തുക കണ്ടെത്തുന്നത്. രോഗത്തിന്റെ തുടക്കത്തിൽ തന്നെ ഈ ചികിത്സ ലഭ്യമായിരുന്നെങ്കിൽ പാർശ്വഫലങ്ങൾ ഒരു പരിധി വരെ ഒഴിവാക്കാമായിരുന്നെന്ന് ഷോണ പറയുന്നു. മാനിറ്റോബ സർക്കാരും ഈ ചികിത്സയ്ക്ക് ധനസഹായം നൽകണമെന്നാണ് ഈ ദമ്പതികളുടെ ആവശ്യം.
കാനഡയിലെ ക്യാൻസർ ചികിത്സാ രംഗത്തെ പ്രാദേശികമായ ഇത്തരം വ്യത്യാസങ്ങൾ രോഗികൾക്ക് വലിയ ബുദ്ധിമുട്ടാണ് ഉണ്ടാക്കുന്നതെന്ന് കനേഡിയൻ ക്യാൻസർ സൊസൈറ്റിയിലെ സീനിയർ മാനേജർ ആഞ്ചലിൻ വെബ്ബ് ചൂണ്ടിക്കാണിക്കുന്നു. സാമ്പത്തിക ഭദ്രത നോക്കാതെ, ജീവനും ആരോഗ്യത്തിനും മുൻഗണന നൽകി എല്ലാ പൗരന്മാർക്കും തുല്യമായ ചികിത്സ ഉറപ്പാക്കാൻ സർക്കാർ സംവിധാനങ്ങൾ തയ്യാറാകണമെന്നും അവർ ആവശ്യപ്പെട്ടു. അതേസമയം, ഒപ്റ്റ്യൂൺ ജിയോ ഉപകരണത്തെ പുതിയ മെഡിക്കൽ സാങ്കേതികവിദ്യയായി ഉൾപ്പെടുത്തുന്ന കാര്യം പരിശോധിച്ചുവരികയാണെന്ന് മാനിറ്റോബ ആരോഗ്യ മന്ത്രി ഉസോമ അസഗ്വാര വ്യക്തമാക്കി.
തനിക്ക് ലഭിച്ച ഈ ബോണസ് ജീവിതം ഭാര്യയോടും മക്കളോടും ഒപ്പം സന്തോഷത്തോടെ ചെലവഴിക്കാനാണ് ഫ്രാൻസെസ്കോ ഇപ്പോൾ ആഗ്രഹിക്കുന്നത്. തന്നെപ്പോലെ സമാനമായ സാഹചര്യത്തിലൂടെ കടന്നുപോകുന്ന മറ്റ് ക്യാൻസർ രോഗികൾക്ക് കൃത്യമായ വിവരങ്ങളും പ്രതീക്ഷയും നൽകാൻ തന്റെ ഈ അതിജീവന കഥ സഹായിക്കുമെന്നാണ് ഫ്രാൻസെസ്കോ ഉറച്ചു വിശ്വസിക്കുന്നത്.
Love without surrendering to death; Francesco did not give up even though doctors wrote his verdict
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt
